ନୂଆଦିଲ୍ଲୀ,୯।୫ : କେନ୍ଦ୍ର ଆଇନ ଓ ନ୍ୟାୟ ରାଷ୍ଟ୍ରମନ୍ତ୍ରୀ ଏସପି ସିଂ ବାଘେଲ ଏପରି କିଛି କହିଛନ୍ତି ଯାହାକୁ ନେଇ ରାଜନୈତିକସ୍ତରରେ ଆଲୋଡ଼ନ ସୃଷ୍ଟି ହୋଇଛି। ଏକ କାର୍ଯ୍ୟକ୍ରମରେ ସେ କହିଥିଲେ, ଉପରାଷ୍ଟ୍ରପତି କିମ୍ବା ରାଜ୍ୟପାଳ ହେବା ପାଇଁ ମୁସଲମାନମାନେ ସହନଶୀଳତାର ମୁଖା ପିନ୍ଧନ୍ତି। ସହନଶୀଳ ମୁସଲମାନ ଦେଶରେ ବହୁତ କମ ଏବଂ ସେମାନଙ୍କୁ ଆଙ୍ଗୁଠିରେ ଗଣାଯାଇପାରିବ। ଉପରାଷ୍ଟ୍ରପତି, ରାଜ୍ୟପାଳ କିମ୍ବା କୁଳପତି ହେବାକୁ ସେମାନେ ଏକ ରଣନୀତି ଅନ୍ତର୍ଗତ ସହନଶୀଳତାର ମୁଖା ଲଗାନ୍ତି।
ଯେତେବେଳେ ଏହି ଲୋକମାନେ ସେମାନଙ୍କର କାର୍ଯ୍ୟକାଳ ସମାପ୍ତ କରି ଅବସର ନିଅନ୍ତି, ସେତେବେଳେ ସେମାନଙ୍କର ପ୍ରକୃତ ଚେହେରା ସାମ୍ନାକୁ ଆସିଥାଏ। ଏହି କାର୍ଯ୍ୟକ୍ରମକୁ ଆରଏସଏସର ମିଡିଆ ୱିଙ୍ଗ ପକ୍ଷରୁ ଆୟୋଜନ କରାଯାଇଥିଲା। ସହନଶୀଳ ମୁସଲମାନଙ୍କ ସଂଖ୍ୟା ହଜାରେ ମଧ୍ୟରେ ହେବ।
ଏହି କାର୍ଯ୍ୟକ୍ରମରେ ମୁଖ୍ୟ ସୂଚନା କମିଶନର ଉଦୟ ମହୁରକର ତାଙ୍କ ଅଭିଭାଷଣରେ କହିଥିଲେଧ୍, ଭାରତ ଇସଲାମିକ ମୌଳିକତା ବିରୋଧରେ ଲଢ଼ିବା ଉଚିତ କିନ୍ତୁ ସହନଶୀଳ ମୁସଲମାନମାନଙ୍କୁ ମଧ୍ୟ ଗ୍ରହଣ କରାଯିବା ଆବଶ୍ୟକ। ମୋଗଲ ସମ୍ରାଟ ଆକବର ହିନ୍ଦୁ-ମୁସଲମାନ ଏକତା ପାଇଁ ବହୁତ କାମ କରିଛନ୍ତି। ମହୁରକର ଦାବି କରିଥିଲେ ଛତ୍ରପତି ଶିବାଜୀ ମଧ୍ୟ ଆକବରଙ୍କୁ ଠିକ ବୋଲି ବିଶ୍ୱାସ କରିଥିଲେ। ତେବେ ବାଘେଲ ତାଙ୍କ ଅଭିଭାଷଣରେ ମହୁରକରଙ୍କ ଦାବିକୁ ସମ୍ପୂର୍ଣ୍ଣ ରୂପେ ଖଣ୍ଡନ କରିଥିଲେ।
ହିନ୍ଦୁ ମୁସଲମାନ ଏକତା କେବଳ ଆକବରଙ୍କ ରଣନୀତି ଥିଲା। କେନ୍ଦ୍ର ମନ୍ତ୍ରୀ କହିଛନ୍ତି,ଏହା ଆକବରଙ୍କ ରଣନୀତି ଏବଂ ଯୋଧା ବାଈଙ୍କ ସହ ମୋଗଲ ଶାସକଙ୍କ ବିବାହ ମଧ୍ୟ ତାଙ୍କ ରାଜନୈତିକ ରଣନୀତିର ଏକ ଅଂଶ। ହିନ୍ଦୁ-ମୁସଲମାନ ଏକତାର କଥାବାର୍ତ୍ତା ଆକବରଙ୍କ ହୃଦୟରୁ ବାହାରି ନ ଥିଲା, ନଚେତ ସେ ଚିତୋରଗଡରେ ନରସଂହାର କରି ନ ଥାନ୍ତେ। ୧୧୯୨ ମସିହାରେ ଯେତେବେଳେ ମହମ୍ମଦ ଘୋରୀ ରାଜପୁତ ରାଜା ପୃଥ୍ବରାଜ ଚୌହ୍ବାନଙ୍କୁ ପରାସ୍ତ କରିଥିଲେ ସେତେବେଳେ ଭାରତର ଖରାପ ଦିନ ଆରମ୍ଭ ହୋଇଥିଲା।
