ବଲାଙ୍ଗୀର ଅଫିସ/ଗୁଡଭେଲା,୨୬ା୨(ଡି.ଏନ୍.ଏ.): ବଲାଙ୍ଗୀର ଜିଲା ତୁଷରା ଥାନା ବୀରାମୁଣ୍ଡା ପଞ୍ଚାୟତ ଅଧୀନ କର୍ଲାଖମନ ଗାଁ ନିକଟ ରାହୁଲ ନଦୀ କୂଳରୁ ବୁଧବାର ସନ୍ଧ୍ୟାରେ ବୌଦ୍ଧ ଜିଲା କଣ୍ଟାମାଳ ଥାନା ଅନ୍ତର୍ଗତ ଉଦେର ଗ୍ରାମର ସହକାରୀ ଶିକ୍ଷକ ବାସୁଦେବ ଭୋଇ (୨୫)ଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ହୋଇଥିଲା। ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ତଦନ୍ତରୁ ସ୍ପଷ୍ଟ ହେବା ପରେ ପୋଲିସ ମୃତ ଶିକ୍ଷକଙ୍କ ପ୍ରେମିକାଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ଗିରଫ ଯୁବତୀ ଜଣକ କର୍ଲାଖମନ ଗ୍ରାମର ପ୍ରମଦା ବଗର୍ତ୍ତୀ (୨୨)। ଏହି ହତ୍ୟାକାଣ୍ଡରେ ସମ୍ପୃକ୍ତ ପ୍ରମଦାଙ୍କ ଭିଣୋଇ ଫେରାର ହୋଇଯାଇଥିବା ଜଣାପଡିଛି।
ମିଳିଥିବା ସୂଚନା ଅନୁସାରେ ମୃତ ବାସୁଦେବ ଓ ପ୍ରମଦାଙ୍କ ଭିତରେ ପ୍ରେମ ସମ୍ପର୍କ ରହିଥିଲା। ତେବେ ଆସନ୍ତା ମାର୍ଚ୍ଚ ୯ ତାରିଖରେ ବାସୁଦେବଙ୍କ ବିବାହ ସ୍ଥିର ହୋଇଯାଇଥିଲା। ବିବାହ ସ୍ଥିର ହେବା ପରେ ମଧ୍ୟ କିଛି ଫଟୋକୁ ନେଇ କୁଆଡେ ବାସୁଦେବ ପ୍ରେମିକାଙ୍କୁ ବ୍ଳାକ୍ମେଲିଂ କରୁଥିଲେ। ଏହି କାରଣକୁ ନେଇ ପ୍ରମଦା ଓ ତାଙ୍କ ଭିଣୋଇ ବାସୁଦେବଙ୍କୁ ହତ୍ୟା ପାଇଁ ଯୋଜନା କରିଥିବା ପୋଲିସ ପକ୍ଷରୁ କୁହାଯାଇଛି। ଗତ ୧୨ ତାରିଖ ଦିନ ଯୁବତୀ ଜଣକ କୁଆଡେ ଫୋନ୍ କରି ବାସୁଦେବଙ୍କୁ କର୍ଲାଖମନ ଆସିବାକୁ କହିଥିଲେ। ସେଠାରେ ପୂର୍ବରୁ ତାଙ୍କ ଭିଣୋଇ ରହିଥିଲେ। ଖର୍ଲାଖମନ୍ ରାହୁଲ ନଦୀ କୂଳ ଜଙ୍ଗଲ ନିକଟକୁ ବାସୁଦେବ ଆସିବା ପରେ ପୂର୍ବ ଯୋଜନା ମୁତାବକ ଏକ ଶାବଳରେ ବାସୁଦେବଙ୍କ ମୁଣ୍ଡରେ ପ୍ରହାର କରିଥିଲେ। ସେଠାରେ ବାସୁଦେବଙ୍କ ମୃତ୍ୟୁ ଘଟିଥିଲା। ପରେ ମୃତଦେହରେ ନିଆଁ ଲଗାଇ ପୋଡି ଦେଇଥିଲେ।
