ଭୁବନେଶ୍ୱର,୮।୩(ବ୍ୟୁରୋ): ପୂର୍ବ ଶତ୍ରୁତାକୁ କେନ୍ଦ୍ର କରି ଶନିବାର ନୟାପଲ୍ଲୀ ଥାନା ଅଞ୍ଚଳରେ ଜଟ ଓରଫ ଟୁକୁନା ଦାସଙ୍କୁ ରାସ୍ତା ଉପରେ ଏକ ପିକ୍ଅପ୍ ଭ୍ୟାନ୍ ଭିତରେ ହତ୍ୟା କରାଯାଇଥିଲା। ଏହି ଘଟଣାରେ ପୋଲିସ ଅଭିଯୁକ୍ତ ଦୁଇ ଭାଇ ସୁଧୀର ପୃଷ୍ଟି ଓ ସାଗର ପୃଷ୍ଟିଙ୍କୁ ରବିବାର କୋର୍ଟ ଚାଲାଣ କରିଛି। ଏଥିସହିତ ଘଟଣା ସମୟରେ ପିସିଆର ଭ୍ୟାନ୍ ଭାଙ୍ଗିବା ସହ ଅଭିଯୁକ୍ତଙ୍କୁ ସେଥିରୁ ଟାଣିଆଣି ମରଣାନ୍ତକ ଆକ୍ରମଣ ଘଟଣାରେ ପୋଲିସ ସିସିଟିଭି ଫୁଟେଜ ଓ ସୋସିଆଲ ମିଡିଆ ଭିଡିଓରୁ ପ୍ରାୟ ୧୫ଜଣଙ୍କୁ ଚିହ୍ନଟ କରିଛି। ସେମାନଙ୍କ ମଧ୍ୟରୁ
୫ଜଣଙ୍କୁ ଗିରଫ କରାଯାଇ ଥିବାବେଳେ ଅନ୍ୟ ୧୦ଜଣଙ୍କୁ ଧରିବା ପାଇଁ ଖୋଜା ଚାଲିଥିବା ଡିସିପି ଉମାଶଙ୍କର ଦାଶ ସୂଚନା ଦେଇଛନ୍ତି। ପୋଲିସ ଭ୍ୟାନ୍ ଭାଙ୍ଗିବା, କାର୍ଯ୍ୟରତ ପୋଲିସ କର୍ମଚାରୀଙ୍କୁ ଦୁର୍ବ୍ୟବହାର କରିବା ଓ ଅଭିଯୁକ୍ତଙ୍କୁ ମରଣାନ୍ତକ ଆକ୍ରମଣ କରିବା ଆଦିକୁ ନେଇ ପୋଲିସ ସେମାନଙ୍କ ନାମରେ ମାମଲା ରୁଜୁ କରିଛି।
ସୂଚନା ଅନୁଯାୟୀ, ମୃତ ଟୁକୁନା ଏବଂ ଅଭିଯୁକ୍ତ ଦୁଇ ଭାଇ ସୁଧୀର ଓ ସାଗରଙ୍କ ଘର ସାଲିଆ ସାହିରେ। ଟୁକୁନାଙ୍କ ଘର ସାମ୍ନାରେ ଅଭିଯୁକ୍ତ ଦ୍ୱୟଙ୍କ ଘର ହୋଇଥିବାବେଳେ ବିଭିନ୍ନ କାରଣକୁ ନେଇ ଦୀର୍ଘଦିନ ହେବ ଶତ୍ରୁତା ଲାଗି ରହିଥିଲା। ଟୁକୁନାଙ୍କ ଘର ସାମ୍ନାରେ ଅଭିଯୁକ୍ତ ଦ୍ୱୟ ପିକ୍ଅପ୍ ଗାଡ଼ି ପାର୍କିଂ କରୁଥିଲେ। ଏହାକୁ ନେଇ ୧୫ଦିନ ତଳେ ସେମାନଙ୍କ ମଧ୍ୟରେ ପ୍ରବଳ ଝଗଡା ହୋଇଥିଲା। ପୁଣି ଶୁକ୍ରବାର ରାତିରେ ମଧ୍ୟ ବଚସା ହୋଇଥିଲା। ଶନିବାର ସକାଳେ ଅଭିଯୁକ୍ତ ଦ୍ୱୟ ଗାଡି ନେଇ ଆସୁଥିବାବେଳେ ଟୁକୁନା ଅଟକାଇ ଆକ୍ରମଣ କରିଥିଲେ। ଏହାପରେ ଦୁଇ ଭାଇ ତାଙ୍କୁ କାବୁ କରି ଗାଡିରେ ପୂରାଇ ନୟାପଲ୍ଲୀ ଥାନାକୁ ଆଣୁଥିଲେ। ନୟାପଲ୍ଲୀ ଏନ୍-୨ ଛକ ଟ୍ରାଫିକ ନିକଟରେ ଟୁକୁନା ଲୁଚାଇ ରଖିଥିବା ଏକ ଭୁଜାଲିରେ ସୁଧୀରଙ୍କ ଗୋଡ଼ରେ ଭୁସିଦେଇଥିଲେ। ଏହାପରେ ଅଭିଯୁକ୍ତ ଦୁଇଭାଇ ଟୁକୁନାଙ୍କଠାରୁ ଭୁଜାଲି ଛଡାଇ ତାଙ୍କ ଛାତି ଓ ବେକରେ ଭୁସି ଦେଇଥିଲେ। ଗାଡ଼ି ଭିତରେ ଚିତ୍କାର ଶୁଣି ସ୍ଥାନୀୟ ଲୋକେ ସୁଧୀର ଓ ସାଗରଙ୍କୁ କାବୁ କରି ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚତ୍ ଅଭିଯୁକ୍ତଙ୍କୁ କାବୁ କରି ପିସିଆର ଭ୍ୟାନ୍ରେ ନେଉଥିବା ସମୟରେ କେତେଜଣ ଲୋକ ଉତ୍ତ୍ୟକ୍ତ ହୋଇ ପିସିଆର ଭ୍ୟାନ୍କୁ ଅଟକାଇଥିଲେ। ଭ୍ୟାନ୍ ଚାବି ନେଇଯିବା ସହ କାଚ ଭାଙ୍ଗି ଦୁଇ ଭାଇଙ୍କୁ ମାଡ଼ମାରି ରକ୍ତାକ୍ତ କରିଦେଇଥିଲେ।
