ନୂଆଦିଲ୍ଲୀ: ବର୍ତ୍ତମାନ କରୋନା ସ୍ଥିତିରେ ପରିବର୍ତ୍ତନ ଆସୁଥିବାରୁ ବଜାରରେ ଅର୍ଥନୈତିକ ସୁଧାର ପରିଲକ୍ଷିତ ହେଉଛି। ଲୋକମାନେ ସାମଗ୍ରୀ ବ୍ୟବହାର ବଢାଇବାରୁ ଅର୍ଥ ବ୍ୟବସ୍ଥାରେ ସୁଧାର ତ୍ୱରାନ୍ବିତ ହୋଇଛି। ଗୁଜରାଟ, ରାଜସ୍ଥାନ, ତାମିଲନାଡୁ ଏବଂ ପଶ୍ଚିମବଙ୍ଗ ଭଳି ରାଜ୍ୟରେ ବଜାର ବେଶ୍ ଉତ୍ସାହିତ ହୋଇଛି। ଏହି ସ୍ଥାନଗୁଡିକରେ ଲୋକମାନେ କିଣାକିଣି ତ୍ୱରାନ୍ବିତ କରୁଥିବା ଆସୋଚାମ ପକ୍ଷରୁ ଏକ ସର୍ଭେରେ ପ୍ରକାଶ ପାଇଛି।
ଜିଏସ୍ଟି ଡାଟାକୁ ନେଇ ହୋଇଥିବା ଏହି ଅଧ୍ୟୟନରେ କୁହାଯାଇଛି ଯେ, ୨୩ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରେ ଜିଏସ୍ଟି ସଂଗ୍ରହ ବେଶ୍ ଉନ୍ନତ ହୋଇଛି। ବିଶେଷ କରି ସାମଗ୍ରୀ ଉପଯୋଗିତା ବଢିବାରୁ ଟିକସ ସଂଗ୍ରହ ବେଶ୍ ଉନ୍ନତ ହେଉଥିବା କୁହାଯାଉଛି। ସାମଗ୍ରୀ କ୍ରୟରେ ଗୁଜରାଟ ସବୁଠାରେ ଆଗରେ ରହିଛି। ଏଠାରେ ରାଜସ୍ବ ସଂଗ୍ରହ ୧୪% ବଢ଼ି ୮୨୨୧ କୋଟି ଟଙ୍କା ଛୁଇଁଛି। ଏହା ପୂର୍ବରୁ ୭୨୧୫ କୋଟି ଟଙ୍କାର ଟିକସ ସଂଗ୍ରହ ହୋଇଛି। ମହାରାଷ୍ଟ୍ର ଏବଂ କର୍ନାଟକରେ ଗ୍ରାହକଙ୍କ ଆତ୍ମବିଶ୍ୱାସ ବଢିଛି। ମହାରାଷ୍ଟ୍ରରେ ୧୬,୧୦୩ କୋଟି ଜିଏସ୍ଟି ସଂଗ୍ରହ ହୋଇଛି। ଏଠାରେ ଟିକସ ସଂଗ୍ରହରେ ୨% ଅଭିବୃଦ୍ଧି ହୋଇଛି। ସେହିଭଳି କର୍ନାଟକରେ ଜିଏସ୍ଟି ସଂଗ୍ରହ ୨% ବଢିବା ଯୋଗୁ ୭୫୮୧ କୋଟି ଟଙ୍କା ଆଦାୟ ହୋଇଛି।
ମାନୁଫାକ୍ଚରିଂ, ଏଫ୍ଏମ୍ସିଜି, କେମିକାଲ୍ସ, ସାର, ରିୟଲଇଷ୍ଟେଟ, ନିର୍ମାଣ, ଇସ୍ପାତ ଏବଂ ସିମେଣ୍ଟ ଭଳି କ୍ଷେତ୍ରର ପ୍ରଡକ୍ଟ ବିକ୍ରି ଉନ୍ନତ ରହିଛି। ଶିଳ୍ପର କ୍ଷମତା ଉପଯୋଗ ସମ୍ପୂର୍ଣ୍ଣ ହେଲେ ନିବେଶ ବଢିବା ସହ ଅର୍ଥ ବ୍ୟବସ୍ଥା ଆହୁରି ଗତିଶୀଳ ହେବ ବୋଲି ଆସୋଚାମ ମହାସଚିବ ଦୀପକ ସୁଦ କହିଛନ୍ତି। ୨୦୨୨ରେ ଭି-ଆକୃତିର ଅଭିବୃଦ୍ଧି ହେବା ନେଇ ଆସୋଚାମ ଆକଳନ କରିଛି। ସୂଚନାଯୋଗ୍ୟ, ଫେବୃୟାରୀରେ ମୋଟ ୧.୧୩ ଲକ୍ଷ କୋଟି ଟଙ୍କାର ଜିଏସ୍ଟି ଆଦାୟ ହୋଇଛି। ଗତ ବର୍ଷ ସମାନ ମାସ ତୁଳନାରେ ଏହା ୭% ଅଧିକ। ସେହିଭଳି ସାମଗ୍ରୀ ବ୍ୟବହାରରେ ତ୍ୱରିତ ସୁଧାର କରୁଥିବା ରାଜ୍ୟଗୁଡିକ ମଧ୍ୟରେ ଓଡ଼ିଶା, ତାମିଲନାଡୁ, ହିମାଚଳପ୍ରଦେଶ, ପଞ୍ଜାବ, ହରିୟାଣା, ସିକିମ, ଅରୁଣାଚଳ ପ୍ରଦେଶ, ଝାଡଖଣ୍ଡ, ମଧ୍ୟପ୍ରଦେଶ, ଛତିଶଗଡ, ଜମ୍ମୁ ଏବଂ କଶ୍ମୀର ରହିଛି। ଟିକା ପ୍ରଦାନ ଧାରା ତ୍ୱରାନ୍ବିତ ହେଉଥିବାରୁ ସେବା କ୍ଷେତ୍ର କାର୍ଯ୍ୟକଳାପ ବଢିବ ବୋଲି ଏହି ଏଜେନ୍ସି ଅନୁମାନ ଲଗାଇଛି।
