ମୁମ୍ବାଇ,୨୨।୫: ମୁମ୍ବାଇ ଏନସିବିର ପୂର୍ବତନ ଜୋନାଲ ନିର୍ଦ୍ଦେଶକ ଏନସିବି ସମୀର ୱାନଖେଡେ ଏବଂ ତାଙ୍କ ସ୍ତ୍ରୀଙ୍କୁ ହତ୍ୟା ଧମକ ମିଳିଛି। ଏନେଇ ସେ ନିଜେ ସୂଚନା ଦେଇଛନ୍ତି। ସେ କହିଛନ୍ତି, ମୋତେ ଏବଂ ମୋର ସ୍ତ୍ରୀଙ୍କୁ ଗତ ୪ ଦିନ ଧରି ଧମକ ମିଳୁଛି ଏବଂ ସୋସିଆଲ ମିଡିଆରେ ଅଶ୍ଳୀଳ ମେସେଜ ଆସୁଛି। ଏନେଇ ଆଜି ମୁମ୍ବାଇ ପୋଲିସ କମିଶନରଙ୍କୁ ଏକ ଚିଠି ଲେଖି ସ୍ବତନ୍ତ୍ର ସୁରକ୍ଷା ଦାବି କରିବି ବୋଲି ସମୀର ୱାନଖେଡେ କହିଛନ୍ତି।
୨୦୨୧ ପର୍ଯ୍ୟନ୍ତ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋର ଜୋନାଲ ମୁଖ୍ୟ ଭାବରେ ସମୀର ୱାନଖେଡେ ବଲିଉଡରେ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁରେ ଡ୍ରଗ୍ସ ଲିଙ୍କ୍ , ଡ୍ରଗ୍ସ ଏବଂ କ୍ରୁଜ ମାମଲାରେ ଆର୍ଯ୍ୟନ ଖାନଙ୍କୁ ଗିରଫ କରିବା ଭଳି ଅନେକ ହାଇ-ପ୍ରୋଫାଇଲ ମାମଲାର ତଦନ୍ତର ନେତୃତ୍ୱ ନେଇଥିଲେ।
ନିକଟରେ ଆର୍ୟନ ଖାନଙ୍କ ଗିରଫକୁ ନେଇ ଶାହାରୁଖ ଖାନଙ୍କଠାରୁ ୨୫ କୋଟି ଟଙ୍କା ଲାଞ୍ଚ ମାଗିଥିବା ନେଇ ସିବିଆଇ ସମୀର ୱାନଖେଡେଙ୍କ ବିରୋଧରେ ଏଫଆଇଆର ପଞ୍ଜିକରଣ କରିଥିବା ଜଣାପଡିଛି।
