ପାରାଦୀପ,୧୨ା୨(ସ୍ବ.ପ୍ର.): ଜଗତ୍ସିଂହପୁର ଜିଲା ପାରାଦୀପ ଆଦର୍ଶ ଥାନା ଅନ୍ତର୍ଗତ ବିଜୟଚନ୍ଦ୍ରପୁର ତାରିଣୀଗଡ଼ାଠାରେ ଏକ ନକଲି ମଶାଧୂପ କାରଖାନା ଉପରେ ପୋଲିସ ଓ ମହାରାଷ୍ଟ୍ରର ଏକ ତଦନ୍ତକାରୀ ଟିମ ମିଳିତ ଭାବେ ଚଢ଼ାଉ କରିଛନ୍ତି। ଏଥିରେ ସ୍ଲିପ୍ଓ୍ବେଲ ନାମକ ମଶାଧୂପ ତିଆରି କରିବାରେ ସମସ୍ତ ସାମଗ୍ରୀ ଜବତ କରାଯାଇଛି। ଏଥିରେ ଜଡ଼ିତ ବାପ ପୁଅଙ୍କୁ ପୋଲିସ ନିଜ ହେପାଜତକୁ ନେଇଛି। ଅଭିଯୁକ୍ତ ହେଲେ ରବୀନ୍ଦ୍ର ନାୟକ ଓ ତାଙ୍କ ପୁଅ ବିକାଶ। ଏମାନେ କର୍ନାଟକରେ ଥିବା ଅଂଶିକା କମ୍ପାନୀର ସ୍ଲିପ୍ଓ୍ବେଲ ମଶାଧୂପର ଅବିକଳ ନକଲ କରି ମାର୍କେଟରେ ବିକ୍ରି କରୁଥିଲେ। ଓଡ଼ିଶାର ଏହି ମଶାଧୂପ ଓ ଅଂଶିକା କମ୍ପାନୀର ଧୂପ ମଧ୍ୟରେ ପ୍ରଭେଦ ସମ୍ପର୍କରେ କେତେକ ଖାଉଟି ଅଭିଯୋଗ କରିଥିଲେ। ଏହାପରେ ଏହି ଧୂପକୁ କମ୍ପାନୀର ଏକ ଟିମ୍ ଯାଞ୍ଚ କରି ନକଲି ବୋଲି ଜାଣିପାରିଥିଲେ। ପରେ ମୁମ୍ବାଇରେ ଅର୍ଥନୈତିକ ଆପରାଧିକ ଶାଖାରେ ଅଭିଯୋଗ କରିଥିଲେ। ଉକ୍ତ ଟିମ୍ ପାରାଦୀପ ଆସି ସ୍ଥାନୀୟ ଆଦର୍ଶ ଥାନା ପୋଲିସ ସହିତ ମିଶି ଶୁକ୍ରବାର ରାତିରେ ଚଢ଼ାଉ କରିଥିଲେ। ରିପୋର୍ଟ ଲେଖା ହେବା ସୁଦ୍ଧା ବିପୁଳ ପରିମାଣର ମଶାଧୂପ, ଏଥିରେ ବ୍ୟବହୃତ ସାମଗ୍ରୀ, ମେଶିନ, ଗୋଟିଏ ୪୦୭ ଗାଡ଼ି (ଓଡି୦୫ଏଲ୬୨୨୪) ଆଦି ଜବତ କରାଯାଇଛି। ଏ ସମ୍ପର୍କରେ ପାରାଦୀପ ଆଦର୍ଶ ଥାନା ଅଧିକାରିଣୀ ଶୁଭଲକ୍ଷ୍ମୀ ପୂଜାରୀ କୁହନ୍ତି, ତଦନ୍ତ ଚାଲିଛି। ଏଥିରେ ଆଉ କିଏ ସଂପୃକ୍ତ ଅଛନ୍ତି ଏବଂ ବ୍ୟାଙ୍କ କାରବାର ଆଦି ଉପରେ ଯାଞ୍ଚ ଚାଲିଛି।
