ମୁମ୍ବାଇ,୧୪।୨ : ରାଜଧାନୀ ଦିଲ୍ଲୀକୁ ପଛରେ ପକାଇ ମୁମ୍ବାଇ ଦେଶର ସବୁଠାରୁ ପ୍ରଦୂଷିତ ସହରରେ ପରିଣତ ହୋଇଛି। ବାୟୁ ଗୁଣବତ୍ତା ମନିଟର (ଏକ୍ୟୁଆଇ) ସ୍ବିଜରଲାଣ୍ଡର ଏୟାର ଟ୍ରାକିଂ ଇଣ୍ଡେକ୍ସ ଆଇକ୍ୟୁଏୟାର ଅନୁଯାୟୀ, ଜାନୁଆରୀ ୨୯ ରୁ ଫେବୃଆରୀ ୮ ମଧ୍ୟରେ ମୁମ୍ବାଇ ଭାରତର ସବୁଠାରୁ ପ୍ରଦୂଷିତ ସହର ଏବଂ ବିଶ୍ୱସ୍ତରରେ ଦ୍ୱିତୀୟ ସ୍ଥାନରେ ରହିଥିଲା।
ପ୍ରକାଶିତ ରିପୋର୍ଟ ଅନୁଯାୟୀ, ଜାନୁଆରୀ ୨୯ ରେ ମୁମ୍ବାଇ ଖରାପ ସହର ମାନ୍ୟତାରେ ଦଶମ ସ୍ଥାନ ଅଧିକାର କରିଥିଲା। ଅନ୍ୟପକ୍ଷରେ, ଫେବୃଆରୀ ୨ ରେ ମୁମ୍ବାଇ ଦ୍ୱିତୀୟ ସ୍ଥାନରେ ରହିଥିଲା। ତେବେ ଫେବୃଆରୀ ୧୩ ରେ, ମୁମ୍ବାଇ ଭାରତର ସବୁଠାରୁ ପ୍ରଦୂଷିତ ସହର ଭାବରେ ଦିଲ୍ଲୀକୁ ଅତିକ୍ରମ କରି ବାୟୁ ଗୁଣବତ୍ତା ଦୃଷ୍ଟିରୁ ବିଶ୍ୱରେ ଦ୍ୱିତୀୟ ପ୍ରଦୂଷିତ ସହର ପାଲଟି ଯାଇଛି।
ସିପିସିବି ତଥ୍ୟ ଅନୁଯାୟୀ, ଚଳିତ ବର୍ଷ ନଭେମ୍ବରରୁ ଜାନୁୟାରୀ ମଧ୍ୟରେ ମୁମ୍ବାଇରେ ପୂର୍ବ ତିନୋଟି ଶୀତ ତୁଳନାରେ ‘ଖରାପ’ ଏବଂ ‘ଅତ୍ୟଧିକ ଖରାପ’ ଦିନ ଦୁଇଗୁଣ ଅଧିକ ଥିଲା। ଜାତୀୟ ପରିବେଶ ଇଞ୍ଜିନିୟରିଂ ରିସର୍ଚ୍ଚ ଇନଷ୍ଟିଚ୍ୟୁଟ ଏବଂ ଆଇଆଇଟି-ବମ୍ବେର ୨୦୨୦ ଅନୁସନ୍ଧାନ ଅନୁଯାୟୀ ମୁମ୍ବାଇର ବାୟୁରେ ଥିବା କଣିକା ପଦାର୍ଥ ଭାରରେ ୭୧ ପ୍ରତିଶତରୁ ଅଧିକ ରାସ୍ତା କିମ୍ବା ନିର୍ମାଣ ଧୂଳି ରହିଛି। କାରଖାନା, ପାୱାର ପ୍ଲାଣ୍ଟ, ବିମାନବନ୍ଦର ଏବଂ ଅଳିଆ ଆବର୍ଜନା ମୁମ୍ବାଇର ବାୟୁକୁ ଖରାପରେ ପରିଣତ କରିବାରେ ସହାୟକ ହୋଇଛି।
ନୂତନ ତାଲିକା ଅନୁଯାୟୀ, ବିଶ୍ୱର ସବୁଠାରୁ ପ୍ରଦୂଷିତ ସହର ଭାବେ ପାକିସ୍ତାନର ଲାହୋରକୁ ଘୋଷଣା କରାଯାଇଛି। ମୁମ୍ବାଇ ଦ୍ୱିତୀୟ ସ୍ଥାନରେ, କାବୁଲ ତୃତୀୟ ସ୍ଥାନରେ ରହିଛି। ଏହି ତାଲିକାର ଶ୍ରେଷ୍ଠ ଦଶଟି ପ୍ରଦୂଷିତ ସହରରୁ ଭାରତର ରାଜଧାନୀ ହଟିଯାଇଛି। ଯଦିଓ ଦିଲ୍ଲୀରେ ପ୍ରଦୂଷଣର ସ୍ତର ନିର୍ଦ୍ଦିଷ୍ଟ ମାନଦଣ୍ଡ ଅନୁଯାୟୀ ଅତ୍ୟନ୍ତ ବିପଜ୍ଜନକ ଅବସ୍ଥାରେ ରହିଛି।
