ନୂଆଦିଲ୍ଲୀ,୨୫।୩: ଦୀର୍ଘ ୧୪ ବର୍ଷ ଧରି ଚେନ୍ନାଇ ସୁପର କିଙ୍ଗ୍ସ ସହ ଯୋଡ଼ି ହୋଇ ରହିଛନ୍ତି ମହାନ ଉଇକେଟକିପର ବ୍ୟାଟ୍ସମ୍ୟାନ୍ ମହେନ୍ଦ୍ର ସିଂହ ଧୋନୀ। ହେଲେ ହଠାତ ସିଏସ୍କେ ଅଧିନାୟକ ପଦରୁ ହଟିଯାଇ ସେ ସମସ୍ତଙ୍କୁ ଚମକାଇଦେଇଛନ୍ତି। ଫ୍ରାଞ୍ଚାଇଜ୍ ୧୬ କୋଟି ଟଙ୍କାରେ କିଣିଥିବା ରବିନ୍ଦ୍ର ଜାଡେଜାଙ୍କୁ ସେ ଦଳର ନେତୃତ୍ୱ ହସ୍ତାନ୍ତର କରିଛନ୍ତି। ତେବେ ଧୋନୀଙ୍କ ଏହି ନିଷ୍ପତ୍ତି ପରେ ଜଣେ ଖେଳାଳି ଭାବେ ୨୦୨୨ ଆଇପିଏଲ୍ ଧୋନୀଙ୍କ ଶେଷ ସିଜନ୍ ହୋଇପାରେ ବୋଲି ଚର୍ଚ୍ଚା ବଢ଼ିବାରେ ଲାଗିଛି। ଏନେଇ ପ୍ରତିକ୍ରିୟା ରଖି ଭାରତର ପୂର୍ବତନ ଓପନର ଆକାଶ ଚୋପ୍ରା ମଧ୍ୟ ବଡ଼ ବୟାନ ଦେଇଛନ୍ତି।
ନିଜର ୟୁଟ୍ୟୁବ୍ ଚ୍ୟାନେଲ୍ରେ ଆକାଶ କହିଛନ୍ତି, ସିଏସ୍କେ ଅଧିନାୟକତ୍ୱ ଛାଡ଼ିବା ପରେ ଆଇପିଏଲ୍ରେ ଧୋନୀ ନିଜର ଶେଷ ସିଜନ୍ ଖେଳୁଥିବା ପ୍ରାୟ ନିଶ୍ଚିତ ହୋଇଛି। ଧୋନୀ ଆଉ ରାଜା ନ ରହି ରାଜମହଲର ସଦସ୍ୟ ଭାବେ ସେବା ଯୋଗାଇବେ। ମାତ୍ର ସତ୍ୟତା ଏହା ଯେ ସେ ଜଣେ ରାଜା ଏବଂ ଶ୍ରେଷ୍ଠ ଅଧିନାୟକ। ସେ ସିଏସ୍କେର ରାଜା। ମାତ୍ର ସେ ଆସନ୍ତା ବର୍ଷ ଖେଳିବେ ନାହିଁ ବୋଲି ସ୍ପଷ୍ଟ ହୋଇଛି। ଚଳିତ ବର୍ଷ ଆରମ୍ଭରୁ ସିଏସ୍କେ ଧୋନୀଙ୍କୁ ରିଟେନ୍ କରି ପଇସା ଲଗାଇବ ବୋଲି ବିଶ୍ୱାସ ନ ଥିଲା। ସେଥିଲାଗି ପ୍ରଥମେ ଜାଡେଜାଙ୍କୁ ରିଟେନ୍ କରାଯାଇଥିଲା। ଏବେ ଜଣେ ଖେଳାଳି ଭାବେ ଧୋନୀ କେବେହେଲେ ଜାଡେଜାଙ୍କ ନିଷ୍ପତ୍ତିରେ ହସ୍ତକ୍ଷେପ କରିବେ ନାହିଁ। ହେଲେ ଯଦି ସେ ପରାମର୍ଶ ମାଗିବେ ଧୋନୀ ଦେବେ। କାରଣ ତାଙ୍କର ସ୍ବଭାବ ସେଭଳି ବୋଲି ମାହିଙ୍କ ପ୍ରଶଂସାରେ ପୂର୍ବ ଓପନର୍ କହିଛନ୍ତି।
