ଦୁବାଇ,୨୮।୧୨: ଆଇସିସି ସୋମବାର ଅନେକ ପୁରସ୍କାର ଘୋଷଣା କରିଛି। ଏଥିରେ ଭାରତୀୟ ଦଳର ଅଧିନାୟକ ବିରାଟ କୋହଲି ଦୁଇଟି ପୁରସ୍କାର ଜିତିଥିବାବେଳେ ଧୋନୀଙ୍କୁ ଖେଳ ଭାବନା ପାଇଁ ବିଶେଷ ସମ୍ମାନ ପ୍ରଦାନ କରାଯାଇଛି। ବିରାଟଙ୍କୁ ଆଇସିସି ଦ୍ୱାରା ଦଶନ୍ଧିର ଶ୍ରେଷ୍ଠ ଏକଦିବସୀୟ କ୍ରିକେଟର ଭାବେ ଚୟନ କରାଯାଉଥିବାବେଳେ ଧୋନୀଙ୍କୁ ଦଶନ୍ଧିର ଆଇସିସି ସ୍ପିରିଟ ଅଫ କ୍ରିକେଟ ପୁରସ୍କାର ଦିଆଯିବ। ଆଇସିସି ‘ରନ ମେସିନ’ ବିରାଟଙ୍କୁ ଦଶନ୍ଧିର ଶ୍ରେଷ୍ଠ ଏକଦିବସୀୟ କ୍ରିକେଟର ଭାବରେ ଘୋଷଣା କରି ଲେଖିଛି, ଆଇସିସି ପୁରସ୍କାର ଅବଧି ମଧ୍ୟରେ ୧୦ ହଜାରରୁ ଅଧିକ ଏକଦିବସୀୟ ରନ ସଂଗ୍ରହ କରିଥିବା ଏକମାତ୍ର ଖେଳାଳି ହେଉଛନ୍ତି ବିରାଟ। ଏହି ସମୟ ମଧ୍ୟରେ ସେ ୩୯ ଶତକ, ୪୮ ଅର୍ଦ୍ଧଶତକ ଏବଂ ୧୧୨ଟି କ୍ୟାଚ୍ ନେଇଛନ୍ତି। ତାଙ୍କର ହାରାହାରି ମଧ୍ୟ ୬୧.୮୩ ଥିଲା। ତାଙ୍କର ଉଲ୍ଲେଖନୀୟ ପ୍ରଦର୍ଶନ ଏବଂ ପ୍ରତ୍ୟେକ ଫର୍ମାଟରେ ଅତୁଳନୀୟ ପ୍ରଦର୍ଶନ ପାଇଁ ବିରାଟଙ୍କୁ ଦଶନ୍ଧିର ଶ୍ରେଷ୍ଠ ପୁରୁଷ କ୍ରିକେଟର ଭାବରେ ସମ୍ମାନିତ କରାଯାଇଥିଲା ଏବଂ ତାଙ୍କୁ ସାର୍ ଗାରଫିଲ୍ଡ ସୋବର୍ସ ପୁରସ୍କାର ଦିଆଯିବ। ଏହି ଦଶନ୍ଧିରେ ବିରାଟ ସର୍ବାଧିକ ୨୦,୩୯୬ ରନ, ୬୬ ଶତକ, ୯୪ ଅର୍ଦ୍ଧଶତକ ହାସଲ କରିଛନ୍ତି। ସେହପରି ୨୦୧୧ରେ ଖେଳାଯାଇଥିବା ନଟିଂହାମ ଟେଷ୍ଟରେ ଦୁର୍ଭାଗ୍ୟଜନକ ରନ ଆଉଟ ହେବା ପରେ ଇଂଲଣ୍ଡର ବ୍ୟାଟ୍ସମ୍ୟାନ ଇଆନ ବେଲଙ୍କୁ ପୁଣି ଥରେ ଫେରିବାର ଇସାରା ଦେଇଥିଲେ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀ। ଧୋନୀଙ୍କ ଏହି କାର୍ଯ୍ୟ ପାଇଁ ସର୍ବସମ୍ମତି କ୍ରମେ ଆଇସିସି ସ୍ପିରିଟ ଅଫ କ୍ରିକେଟ ପୁରସ୍କାର ପାଇଁ ମନୋନୀତ ହୋଇଥିଲେ।
