ଧାମନଗର,୧।୩(ଡି.ଏନ.ଏ): ଭଦ୍ରକ ଜିଲା ଧାମନଗର ବ୍ଲକ ଦୋବଲ ବଜାର ନିକଟରେ ଗେଙ୍ଗୁଟି ନଦୀ ଉପରେ ଏକ ଉଚ୍ଚସୋପାନ ସେତୁ ନିର୍ମାଣ କରାଯାଇଛି। ହେଲେ ଦୁଇପାର୍ଶ୍ୱରେ ଆପ୍ରୋଚ ରୋଡ୍ କରା ନ ଯିବାରୁ ପୋଲ ଲୋକଙ୍କ କାମରେ ଆସୁନି। ବୈତରଣୀ ନଦୀରେ ବନ୍ୟା ଆସିଲେ ଶାଖା ଗେଙ୍ଗୁଟିରେ ବଡ଼ ବନ୍ୟା ଆସି ଏଠାରେ ଥିବା ପୁରୁଣା କଂକ୍ରିଟ ପୋଲ ବୁଡ଼ିଯାଇ ଯାତାୟାତ ବନ୍ଦ ହୋଇଥାଏ। ବନ୍ୟା ସମୟରେ ୫ ପଞ୍ଚାୟତର ଲୋକେ ଧାମନଗର କିମ୍ବା ଦୋବଲ ବଜାରକୁ ଆସିପାରନ୍ତି ନାହିଁ। ବିଶେଷକରି ଆନନ୍ଦପୁର, ପାହାଡ଼ପୁର, ଦକ୍ଷିଣକୁରୁଆ, କାଞ୍ଜିଆପାଳ, ଖଡ଼ିପଦା, ସୋହଡ଼ା, ଖଙ୍ଗରା, ଷେଣ୍ଢପୁର, ବେଦପୁର ଓ ସାପୁଆପାଟଣା ଅଞ୍ଚଳର ଲୋକ ବ୍ଲକ ହେଡକ୍ବାର୍ଟରଠାରୁ ବିଚ୍ଛିନ୍ନ ହୋଇଯାଆନ୍ତି। ଏଣୁ ଏଠାରେ ଉଚ୍ଚସୋପାନ ପୋଲ ନିର୍ମାଣ କାମ ବର୍ଷେରୁ ଊର୍ଦ୍ଧ୍ୱ ହେଲା ସରିଥିଲେ ମଧ୍ୟ ଜମିଅଧିଗ୍ରହଣ ସମସ୍ୟା ଯୋଗୁ ଆପ୍ରୋଚ୍ ରୋଡ୍ ହୋଇପାରୁ ନାହିଁ। ମଙ୍ଗଳବାର ଅପରାହ୍ନରେ ଏମ୍ପି ମଞ୍ଜୁଲତା ମଣ୍ଡଳ, ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର, ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳ, ତହସିଲଦାର କ୍ଷୀରୋଦ କୁମାର ପଣ୍ଡା, ପୂର୍ତ୍ତ ଓ ଗୃହ ବିଭାଗ ସହକାରୀ ଯନ୍ତ୍ରୀ ଅମ୍ବିକା ବଲ୍ଲଭ ସ୍ବାଇଁ ପ୍ରମୁଖ ଏହି ସେତୁ ପରିଦର୍ଶନ କରିଛନ୍ତି। ପାରିପାର୍ଶ୍ୱିକ ଅବସ୍ଥା ଅନୁଧ୍ୟାନ କରି ତୁରନ୍ତ ଜମି ଅଧିଗ୍ରହଣ ସମସ୍ୟା ସମାଧାନ ପାଇଁ ଧାମନଗର ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଛି। ତୁରନ୍ତ ଉଭୟ ପକ୍ଷଙ୍କୁ ଡାକି ଓ ଜମି ମାପଚୁପ କରିବାକୁ ଜିଲାପାଳ ତହସିଲଦାର ପଣ୍ଡାଙ୍କୁ ନିର୍ଦ୍ଦେଶ ଦେଇଛନ୍ତି।
ସୂଚନାଥାଉ କି, ବନ୍ୟା ସମୟରେ ସମସ୍ୟା ନେଇ ଲୋକେ ବାରମ୍ବାର ଧାମନଗରର ତତ୍କାଳୀନ ବିଧାୟକ ମୁକ୍ତିକାନ୍ତ ମଣ୍ଡଳଙ୍କୁ ଗେଙ୍ଗୁଟି ନଦୀରେ ପୁରୁଣା ପୋଲ ନିକଟରେ ଆଉ ଗୋଟିଏ ଉଚ୍ଚସୋପାନ ସେତୁ ନିର୍ମାଣ ଲାଗି ଅନୁରୋଧ କରିଥିଲେ। ସେ ମଧ୍ୟ ପ୍ରତିଶ୍ରୁତି ଦେଇଥିଲେ। ଅର୍ଥ ମଞ୍ଜୁର ପରେ ୨୦୧୮ ଜାନୁୟାରୀ ୩୦ରେ ପୂର୍ତ୍ତ ବିଭାଗ ପକ୍ଷରୁ ପୋଲ ନିର୍ମାଣ ପାଇଁ ଟେଣ୍ଡର ଡକାଯାଇଥିଲା। ରାଜ୍ୟ ସରକାରଙ୍କ ପକ୍ଷରୁ ୧୦ କୋଟି ୬୭ ଲକ୍ଷ ୫୫ ହଜାର ୨୪୭ ଟଙ୍କା ବ୍ୟୟବରାଦ ହୋଇଥିଲା।
