ଠାକୁରମୁଣ୍ଡା,୧।୧୦ (ଡି.ଏନ୍.ଏ.): ବାଇକ୍ ଧକ୍କାରେ ଚାଲିଗଲା ମହିଳାଙ୍କ ଜୀବନ। ଆନନ୍ଦପୁର ରାସ୍ତାର ମହୁଲଡ଼ିହା ଅଫିସ ସାହି ନିକଟରେ ଶନିବାର ଏଭଳି ଏକ ଦୁର୍ଘଟଣା ଘଟିଛି। ମୃତକ ମହିଳାଜଣଙ୍କ ଠାକୁରମୁଣ୍ଡା ବ୍ଲକ୍ ଅନ୍ତର୍ଗତ ଭଲିଆଡାଳ ଗ୍ରାମ ଢେଙ୍କିଶାଳ ସାହିର କାଇରୀ ବୋଲି ଜଣାପଡ଼ିଛି।
ସୂଚନାଯୋଗ୍ୟ, ଦୁର୍ଗାପୂଜା ପାଇଁ ସ୍କୁଲ ଛୁଟି ହେବାରୁ ହଷ୍ଟେଲରେ ଥିବା ଝିଅ ସୁରୁଙ୍କୁ ଘରକୁ ଆଣିବାକୁ ଶନିବାର ସକାଳୁ ମା’ ଓ ମାମୁଁ ତୁସିଲ ଦେଓଗାଁମ ଯାଇଥିଲେ। ଝିଅଙ୍କୁ ଆଣି ଚାଲିକି ଘରକୁ ଆସୁଥିବା ବେଳେ ବାଟରେ ପଛପଟୁ ଦ୍ରୁତ ଗତିରେ ଆସି ଏକ ବାଇକ୍ ଧକ୍କା ଦେଇଥିଲା। ଏହାପରେ କାଇରୀଙ୍କୁ ଗୁରୁତର ଅବସ୍ଥାରେ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଖବରପାଇ ମହୁଲଡ଼ିହା ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ କରୁଛି।
