ପୁଣେ,୨୯।୧: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିମାନ ଦୁର୍ଘଟଣାରେ ମୃତ୍ୟୁ ପୂର୍ବରୁ, ତାଙ୍କ ମାଆ ଆଶାତାଇ ଏକ ମରାଠୀ ନ୍ୟୁଜ ଚ୍ୟାନେଲରେ ଖବର ଦେଖୁଥିଲେ। ଯେତେବେଳେ ଅଜିତ ପାୱାରଙ୍କ ବିମାନ ଦୁର୍ଘଟଣାର ଖବର ସ୍କ୍ରିନରେ ପ୍ରକାଶ ପାଇଲା, ସେ ପଚାରିଲେ, ଆରେ ଦାଦାଙ୍କର କ’ଣ ଦୁର୍ଘଟଣା ଘଟିଛି?
ଜିଲା ପରିଷଦ ନିର୍ବାଚନ ପାଇଁ ପ୍ରଚାର କରିବା ପାଇଁ ଅଜିତ ପାୱାର ବୁଧବାର ସକାଳେ ବାରାମତିରେ ପହଞ୍ଚିବାର କାର୍ଯ୍ୟକ୍ରମ ଥିଲା। କିନ୍ତୁ ବାରାମତି ବିମାନବନ୍ଦରରେ ପହଞ୍ଚିବା ପୂର୍ବରୁ ତାଙ୍କ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣାରେ ଅଜିତ ପାୱାରଙ୍କ ସମେତ ୫ ଜଣଙ୍କର ମୃତ୍ୟୁ ହୋଇଥିଲା। ତାଙ୍କ ମୃତ୍ୟୁ ଖବର ପାଇବା ମାତ୍ରେ ସମଗ୍ର ମହାରାଷ୍ଟ୍ରରେ ଶୋକର ଲହରୀ ଖେଳିଯାଇଥିଲା।
ଏହି ଦୁର୍ଘଟଣା ସହିତ ଜଡିତ ଏକ ଅତ୍ୟନ୍ତ ଭାବପ୍ରବଣ ଘଟଣା ଅଜିତ ପାୱାରଙ୍କ ବାରାମତି ଫାର୍ମହାଉସରୁ ସାମ୍ନାକୁ ଆସିଛି। ଦୁର୍ଘଟଣାର କିଛି ସମୟ ପୂର୍ବରୁ, ଅଜିତ ପାୱାରଙ୍କ ମା’ ଆଶାତାଇ ପାୱାର ଫାର୍ମହାଉସରେ ଟିଭି ଦେଖୁଥିଲେ, ଯେତେବେଳେ ଅଜିତ ପାୱାରଙ୍କ ବିମାନ ଦୁର୍ଘଟଣାର ଖବର ହଠାତ୍ ଟିଭିରେ ପ୍ରସାରିତ ହେବା ଆରମ୍ଭ ହେଲା।
ଫାର୍ମହାଉସ ପରିଚାଳିକା ସମ୍ପତ ଧୈଗୁଡେ ଏହି ଘଟଣାର ବିବରଣୀ ଶେୟାର କରିଥିଲେ। ସେ କହିଛନ୍ତି, ପ୍ରାୟ ସକାଳ ୭ଟା ସମୟରେ ଆଶାତାଇ ପାୱାର ଟେଲିଭିଜନ ଦେଖୁଥିଲେ। ତାଙ୍କ ପାଇଁ ଜଳଖିଆ ପ୍ରସ୍ତୁତ ହେଉଥିଲା। ପ୍ରାୟ ସକାଳ ପ୍ରାୟ ୮.୩୦ଟାରେ, ଅଜିତ ପାୱାରଙ୍କ ବିମାନ ଦୁର୍ଘଟଣାର ଖବର ଟିଭିରେ ପ୍ରସାରିତ ହେବା ଆରମ୍ଭ ହେଲା। ଏହା ଦେଖି ଆଶାତାଇ ତୁରନ୍ତ ପଚାରିଲେ, ଦାଦାଙ୍କର ଦୁର୍ଘଟଣା ହୋଇଛି କି? ତଥାପି ସେ ଭାବିଲେ ଯେ ତାଙ୍କୁ ସାମାନ୍ୟ ଆଘାତ ଲାଗିଛି ଏବଂ କିଛି ଗୁରୁତର ନାହିଁ।
ସମ୍ପତ ଧୈଗୁଡେଙ୍କ ଅନୁସାରେ, କିଛି ସମୟ ପରେ ଟିଭିରେ ଖବର ଆସିଲା ଯେ ଅଜିତ ପାୱାରଙ୍କୁ ବାରାମତିର ଏକ ହସ୍ପିଟାଲକୁ ଅଣାଯାଇଛି। ଆଶାତାଇଙ୍କୁ ଆଉ କୌଣସି ଗୁରୁତର ସୂଚନା ପାଇବାରୁ ରୋକିବା ପାଇଁ ପରିବାର ଏକ ଯାନ୍ତ୍ରିକ ସମସ୍ୟା ବୋଲି କହି ବଙ୍ଗଳାର ଟିଭି କେବୁଲ କାଟି ଟିଭି ବନ୍ଦ କରିଦେଲେ।
ତାଙ୍କ ମୋବାଇଲ ଫୋନକୁ ମଧ୍ୟ ଫ୍ଲାଇଟ ମୋଡରେ ରଖାଯାଇଥିଲା। ସମସ୍ତେ ତାଙ୍କୁ ବୁଝାଇ ଚାଲିଥିଲେ ଯେ, କିଛି ଗୁରୁତର ଘଟଣା ଘଟିନାହିଁ। ତଥାପି ଆଶାତାଇ ପାୱାର ଅଜିତ ପାୱାରଙ୍କୁ ଭେଟିବାକୁ ଜିଦ ଧରି ଫାର୍ମହାଉସରୁ ଚାଲିଗଲେ। ଡ୍ରାଇଭର ତାଙ୍କୁ ଗାଡ଼ି ଖରାପ ହୋଇଯାଇଥିବା ମଧ୍ୟ କହିଥିଲେ, କିନ୍ତୁ ସେ ମନା କରିଦେଲେ। ଶେଷରେ ତାଙ୍କୁ ବାରାମତିର ତାଙ୍କ ବଙ୍ଗଳାକୁ ନେବାକୁ ବାଧ୍ୟ କରାଯାଇଥିଲା ବୋଲି ସମ୍ପତ ଧୈଗୁଡେ ସୂଚନା ଦେଇଛନ୍ତି।
Dharitri – Odisha’s No.1 Odia Daily
