ଭୁବନେଶ୍ୱର,୫ା୫(ସତ୍ୟଜିତ୍ ରାଉତ):ରାଜଧାନୀ ବଡ଼ଗଡ଼ ଥାନା ଅଞ୍ଚଳରେ ଏକ ଲଜ୍ଜାଜନକ ଘଟଣା ଘଟିଛି। ଜଣେ ଯୁବକ ବ୍ଲାକମେଲ୍ କରି ମହିଳା ଓ ତାଙ୍କ ୧୪ବର୍ଷୀୟା ନାବାଳିକା ଝିଅଙ୍କୁ ଏକାଧିକ ଥର ବଳାତ୍କାର କରିଛନ୍ତି। ଏନେଇ ଅଭିଯୋଗକ୍ରମେ ବଡ଼ଗଡ଼ ଥାନା ପୋଲିସ ସମ୍ପୃକ୍ତ ଅଭିଯୁକ୍ତଙ୍କୁ ରବିବାର ଗିରଫ କରିଛି। ସେ ହେଲେ ରବିଟକିଜ୍ ଛକ ନିକଟରେ ରହୁଥିବା ଯାଜପୁର ଜିଲା ଟମକା ଥାନା ଅଞ୍ଚଳର ସରୋଜ କୁମାର ବେହେରା ଓରଫ ରବି (୨୨)। ରବି ପୀଡିତାଙ୍କ ଭଡ଼ାଘର ପାଖରେ ଅନ୍ୟଜଣଙ୍କ ଘରେ ଘରୋଇ ସହାୟକ ଭାବେ କାମ କରନ୍ତି। କୋର୍ଟଚାଲାଣ ପରେ ରବିଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ଅନୁଯାୟୀ, ଅଭିଯୋଗକାରିଣୀ ମହିଳା ଜଣକ ପରିବାର ସହ ବଡଗଡ ଥାନା ଅଞ୍ଚଳରେ ରହୁଛନ୍ତି। ଅଭିଯୁକ୍ତ ରବି ତାଙ୍କ ପଡ଼ୋଶୀଙ୍କ ଘରେ କାମ କରୁଥିବା ବେଳେ ମହିଳାଙ୍କ ସହ ପରିଚିତ ହୋଇଥିଲେ। ପରେ ପିଡ଼ୀତା ଓ ତାଙ୍କ ଝିଅଙ୍କୁ ରବି ଟାର୍ଗେଟ୍ କରିଥିଲେ। ମା’, ଝିଅ ବାଥୁରମ୍ରେ ଗାଧୋଇବା ବେଳେ କୌଶଳ କରି ରବି ନିଜ ମୋବାଇଲରେ ଫଟୋ ଓ ଭିଡିଓ ଶୁଟ୍ କରିଥିଲେ। ଏହାପରେ ଉକ୍ତ ଫଟୋ ଓ ଭିଡିଓକୁ ଆଧାର କରି ରବି ବ୍ଲାକମେଲ୍ କରିବା ଆରମ୍ଭ କରିଥିଲେ। ସେସବୁକୁ ସୋସିଆଲ ମିଡିଆରେ ଭାଇରାଲ କରିଦେବାର ଧମକ ଦେଇ ମା’ ଓ ଝିଅଙ୍କୁ ଏକାଧିକଥର ବଳାତ୍କାର କରିଥିଲେ। ମହିଳା ଓ ତାଙ୍କ ଝିଅ ଲୋକଲଜ୍ଜା ପାଇଁ ଚୁପ ରହିଥିଲେ। ଏପରିକି ସ୍ବାମୀ ବାହାରକୁ କାମ କରିବାକୁ ଯାଉଥିବା ବେଳେ ରବି ଏହି କାମ କରୁଥିଲେ। ଏପରିରିକ ଅଭିଯୁକ୍ତ ରବି ଉଭୟ ମା ଓ ଝିଅଙ୍କୁ ଅଧିକାଂଶ ସମୟରେ ଗାଳିଗୁଲଜ କରିବା ସହ ନାନା ଧମକ ଦେଉଥିଲେ। ପରେ ରବି ଉକ୍ତ ଫଟୋ ଓ ଭିଡିଓକୁ ପିଡ଼ୀତା ଏବଂ ତାଙ୍କ ସ୍ବାମୀଙ୍କ ପାଖକୁ ପଠାଇ ଦେଇଥିଲେ। ସ୍ବାମୀ ଏହା ଦେଖି ପଚାରିବାରୁ ଘଟଣା ବିଷୟରେ ନିଜ ପତ୍ନୀଙ୍କଠୁ ରବିଙ୍କ କଳା କାରନାମା ବିଷୟରେ ଜାଣିବାକୁ ପାଇଥିଲ। ଏନେଇ ପୀଡିତା ମହିଳାଙ୍କ ଏତଲାକ୍ରମେ ପୋଲିସ ଶନିବାର ଏକ ମାମଲା (ନଂ.୨୩୮/୨୦୨୫) ରୁଜୁ କରି ତଦନ୍ତ ଜାରି ରଖିଛି। ତେବେ ରବିଙ୍କ ନାମରେ ପୂର୍ବରୁ ଯାଜପୁର ଥାନାରେ ଏକ ମାମଲା ରହିଥିବା ପୋଲିସ କହିଛି।
