ହିଞ୍ଜିଳିକାଟୁ,୯।୩(ଡିଏନଏ): ଗଞ୍ଜାମ ଜିଲା ହିଞ୍ଜିଳି ଥାନା କାଞ୍ଜିଆମା ଗ୍ରାମରେ ଜଣେ ଯୁବତୀଙ୍କୁ ଗ୍ରାମର ଜଣେ ଯୁବକ ମଦ ପିଇ ଆକ୍ରମଣ କରି ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଅଭିଯୋଗକୁ ଭିତ୍ତି କରି ପୋଲିସ ଘଟଣାରେ ସମ୍ପୃକ୍ତ ଥିବା ଯୁବକଙ୍କୁ ଗିରଫ କରିଛି। ସେ ହେଲେ ବିକାଶ ବେହେରା ଓରଫ କାଳିଆ।
ଅଭିଯୋଗ ମୁତାବକ, ଯୁବତୀ ଜଣକ ଘର ପିଣ୍ଡାରେ ବସି ଥିବାବେଳେ ଅଭିଯୁକ୍ତ କାଳିଆ ତାଙ୍କୁ ମାରପିଟ୍ କରିଥିଲେ। ଯୁବତୀ ଜଣକ ଭୟଭୀତ ଅବସ୍ଥାରେ ଘର ଭିତରକୁ ପଶିଯିବାରୁ କାଳିଆ ବଳପୂର୍ବକ ପଶି ତାଙ୍କୁ ଦୁର୍ବ୍ୟବହାର କରିଥିଲେ। ଏହା ଦେଖି ଯୁବତୀଙ୍କ ମା’ ପ୍ରତିରୋଧ କରିବାରୁ ତାଙ୍କୁ ମଧ୍ୟ ଏକ କାତିରେ ଆକ୍ରମଣ କରିଥିଲେ। ଫଳରେ ଯୁବତୀଙ୍କ ମା’ଙ୍କ ହାତରେ କ୍ଷତ ସୃଷ୍ଟି ହୋଇଛି। ମା’ ଝିଅ ପାଟି କରିବାରୁ କାଳିଆ ଅନୁରୂପ ଭାବେ ପଡ଼ିଶା ଘରେ ପଶି ମହିଳାମାନଙ୍କୁ ଦୁର୍ବ୍ୟବହାର କରିଥିଲେ। ଏହି ଘଟଣା ପରେ ଗ୍ରାମରେ ଉତ୍ତେଜନା ପ୍ରକାଶ ପାଇଥିଲା। ଗ୍ରାମବାସୀ କାଳିଆଙ୍କୁ କାବୁ କରି ପୋଲିସ ଜିମା ଦେଇଥିଲେ। ଏପରି କି ଗାଁର ମହିଳାମାନେ ହିଞ୍ଜିଳି ଥାନାରେ ପହଞ୍ଚି ଅଭିଯୁକ୍ତଙ୍କ ବିରୋଧରେ କାର୍ଯ୍ୟନୁଷ୍ଠାନ ଦାବି କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ.୧୪୮/୨୩) ରୁଜୁ କରି କାଳିଆଙ୍କୁ ଗିରଫ କରିଥିଲା।
