ଯାଜପୁର ଟାଉନ୍,୨୪ା୧୦(ଡି.ଏନ.ଏ.): ଯାଜପୁରର ଅଧିଷ୍ଠାତ୍ରୀ ଦେବୀ ମା’ ବିରଜାଙ୍କ ରଥଯାତ୍ରା ଶନିବାର ଶେଷ ହୋଇଛି। ମା’ଙ୍କୁ ମହାମାୟା ବେଶରେ ସଜ୍ଜିତ କରାଯାଇଥିଲା। ଚଳିତ ବର୍ଷ ୯ ଦିନ ପରିବର୍ତ୍ତେ ୮ ଦିନ ରଥଯାତ୍ରା କରାଯାଇଥିବାରୁ ଅପରାହ୍ନରେ ରଥକୁ ବେଢ଼ା ପରିକ୍ରମା କରାଯାଇଥିଲା। ପରେ ରଥକୁ ମନ୍ଦିର ସମ୍ମୁଖକୁ ଅଣାଯାଇ ସୁସଜ୍ଜିତ ବିମାନରେ ମା’ଙ୍କ ବିଜୟ ପ୍ରତିମାକୁ ଲାଖବିନ୍ଧା ପଡ଼ିଆକୁ ନିଆଯାଇ ଦିଗବିଜୟ ଯାତ୍ରା କରାଯାଇଥିଲା। କରୋନା କଟକଣା ପାଇଁ ସ୍ବଳ୍ପ ସଂଖ୍ୟକ ପୋଲିସ ଓ ସେବାୟତ ଉକ୍ତ ଯାତ୍ରାରେ ସାମିଲ ହୋଇଥିଲେ। ପ୍ରତ୍ୟେକ ବର୍ଷ ହଜାରହଜାର ସଂଖ୍ୟକ ଭକ୍ତ ଯୋଗଦେଉଥିବା ବେଳେ ଚଳିତବର୍ଷ ବିନା ଭକ୍ତରେ ମା’ଙ୍କ ଷୋଡଶୋପଚାର ଓ ରଥଯାତ୍ରା ସମାପନ ହୋଇଛି। ଏଥିପାଇଁ ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ଯାଜପୁରବାସୀ, ସେବାୟତ ଓ ପୋଲିସ ପ୍ରଶାସନକୁ ଧନ୍ୟବାଦ ଜଣାଇଛନ୍ତି। ଯାଜପୁର ଏସ୍ପି ଚରଣ ସିଂ ମୀନା, ଉପଜିଲାପାଳ ତଥା ଟ୍ରଷ୍ଟି ନାରାୟଣ ଚନ୍ଦ୍ର ଧଳ, ପିଡି ଡିଆରଡିଏ ଇନ୍ଦ୍ରମଣି ନାୟକ, ଅତିରିକ୍ତ ଜିଲାପାଳ ମିହିର ପ୍ରସାଦ ମହାନ୍ତି, ତହସିଲଦାର ସୁଶାନ୍ତ କୁମାର ପତି, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ସନ୍ତୋଷ କୁମାର ସେଠୀ, ଯାଜପୁର ଥାନା ଅଧିକାରୀ ମାନସ ରଞ୍ଜନ ଚକ୍ରଙ୍କ ତତ୍ତ୍ୱାବଧାନରେ ପୂଜା କାର୍ଯ୍ୟ ସମାପ୍ତ ହୋଇଥିଲା।
