ଗୁଡାରି,୧୬।୨(ଡି.ଏନ୍.ଏ.): ରାୟଗଡ଼ା ଜିଲା ଗୁଡାରି ବ୍ଲକ ଚିଟିସେର୍ମା ଗାଁର ହଳଧର ନିମାଲଙ୍କ ପୁଅ ପବିତ୍ର, ବୋହୂ ମଞ୍ଜୁଳା ଏବଂ ନାତୁଣୀ ପିଙ୍କି ହାଇଦ୍ରାବାଦରେ ରନ୍ଧନ ଗ୍ୟାସ୍ ଲିକ୍ ଯୋଗୁ ନିଆଁ ଲାଗିି ଗୁରୁତର ହୋଇଥିଲେ। ଚିକିତ୍ସାଧୀନ ଅବସ୍ଥାରେ ହାଇଦ୍ରାବାଦରେ ସୋମବାର ପିଙ୍କି(୭)ଙ୍କ ମୃତ୍ୟୁ ଘଟିଥିବାବେଳେ ମଙ୍ଗଳବାର ମା’ ମଞ୍ଜୁଳା ମଧ୍ୟ ଆଖି ବୁଜିଛନ୍ତି।
ପିଙ୍କିଙ୍କ ମୃତଦେହ ମଙ୍ଗଳବାର ବ୍ୟବଚ୍ଛେଦ ପରେ ସମ୍ପର୍କୀୟ ଓ ସେଠାରେ ରହୁଥିବା ଗାଁ ଲୋକଙ୍କ ସହାୟତାରେ ସତ୍କାର କରାଯାଇଛି। ସେହିପରି ମଞ୍ଜୁଳାଙ୍କ ମୃତଦେହ ବୁଧବାର ବ୍ୟବଚ୍ଛେଦ ହେବାପରେ ଗାଁକୁ ଆଣିବା ବ୍ୟବସ୍ଥା କରାଯାଉଥିବା ଜଣାପଡ଼ିଛି। ତେବେ ଅର୍ଥ ଅଭାବ ରହିଥିବା ସମ୍ପର୍କୀୟ ପ୍ରମୋଦ ଓ ରାଜେନ୍ଦ୍ର କହିଛନ୍ତି। ପରିବାରର ଦୁଇ ସଦସ୍ୟଙ୍କ ମୃତ୍ୟୁ ପରେ ପବିତ୍ର ଜୀବନ ସହ ସଂଗ୍ରାମ କରୁଛନ୍ତି। ପବିତ୍ରଙ୍କ ବାପା ମଙ୍ଗଳବାର ଗୁଡ଼ାରି ତହସିଲଦାର ଭାରତୀ ଦେବୀଙ୍କୁ ଦରଖାସ୍ତ ମାଧ୍ୟମରେ ସହାୟତା ନିମନ୍ତେ ନିବେଦନ କରିଛନ୍ତି। ଏ ବିଷୟରେ ଗୁଣପୁର ବିଧାୟକ ରଘୁନାଥ ଗମାଙ୍ଗଙ୍କୁ ଫୋନ୍ରେ ଯୋଗାଯୋଗ କରିବାରୁ ମୃତଦେହ ଗାଁକୁ ଆଣିବାକୁ ଚାହିଁଲେ ସେ ଖର୍ଚ୍ଚ ବହନ କରିବେ ବୋଲି କହିଛନ୍ତି। ତେବେ ଜିଲା ପ୍ରଶାସନ ପକ୍ଷରୁ ଏ ଦିଗରେ କୌଣସି ପଦକ୍ଷେପ ନେଇଥିବା ଜଣାପଡ଼ିନାହିଁ। ପବିତ୍ରଙ୍କ ଉନ୍ନତ ଚିକିତ୍ସା ନ ହେଲେ ତାଙ୍କ ଜୀବନ ପ୍ରତି ମଧ୍ୟ ବିପଦ ରହିଥିବା ଭାଇ ପ୍ରମୋଦ କହିଛନ୍ତି। ସୂଚନାଯୋଗ୍ୟ, ପବିତ୍ର ଏବଂ ସ୍ତ୍ରୀ ମଞ୍ଜୁଳା ଝିଅ ସହ ହାଇଦ୍ରାବାଦରେ ରହି ସିମେଣ୍ଟ ମିସ୍ତ୍ରି କାମ କରୁଥିଲେ। ଫେବୃୟାରୀ ୧୦ ସାରେ ଦମ୍ପତି କାମରୁ ଆସି ରୋଷେଇ କରିବା ପାଇଁ ଯିବାବେଳେ ହଠାତ୍ କୋଠରି ମଧ୍ୟରେ ନିଆଁ ଲାଗିଯାଇଥିଲା। ଏଥିରେ ତିନି ଜଣ ପୋଡ଼ିହୋଇ ଗୁରୁତର ହୋଇଥିଲେ। ଚିତ୍କାର ଶୁଣି ଭଡ଼ାଘର ମାଲିକ ସେମାନଙ୍କୁ ଉଦ୍ଧାରକରି ସେଠାକାର ଡାକ୍ତରଖାନାରେ ଭର୍ତ୍ତି କରିଥିଲେ।
