ବଇଣ୍ଡା,୨ା୬: କିଶୋରନଗର ବ୍ଲକ ହଣ୍ଡପା ରେଞ୍ଜ ଅଧୀନରେ ଥିବା ପାହାଡ଼ ଗୁଡ଼ିକରୁ ବଢ଼ୁଛି ମୋରମ ଲୁଟ୍। ବିଶେଷକରି କଦଳୀମୁଣ୍ଡା, ଜାମୁନାଳୀ, ନୁନୁକାପଶି, କମରେଇ, ଗାଁ ବଇଣ୍ଡା, ବଣିନାଳୀ, ନାକିଚି, ବାମୁର ରେଞ୍ଜ ଅଧୀନରେ ଥିବା ଗୁରୁଜାଙ୍ଗ, ଆମ୍ବପାଳ ଆଦି ଅଞ୍ଚଳରେ ଥିବା ପାହାଡ଼ରୁ ରାତିରେ ମୋରମ ଚୋରି ହେଉଛି। ଜଙ୍ଗଲ ଜମିରୁ ମାଟି ଖୋଳି ନିଆଯାଉଛି। କିଶୋରନଗର ବ୍ଲକ ଅଞ୍ଚଳରେ ବିଭିନ୍ନ ରାସ୍ତା ନିର୍ମାଣ ହେଉଥିବା ବେଳେ ୫୫ ନମ୍ବର ଜାତୀୟ ରାଜପଥର ସମ୍ପ୍ରସାରଣ ଜାରି ରହିଛି। ଏଥିରେ କାର୍ଯ୍ୟରତ କେତୋଟି ଠିକାସଂସ୍ଥା ବିନା ସରକାରୀ ଅନୁମତିରେ ଏହି ମୋରମ ଓ ମାଟି ଲୁଟ୍ କରୁଥିବା ଅଭିଯୋଗ ହେଉଛି। ଏହି ଠିକାସଂସ୍ଥାର କର୍ମଚାରୀମାନେ ଜଙ୍ଗଲ ଓ ରାଜସ୍ବ ବିଭାଗର କେତେଜଣ କର୍ମଚାରୀଙ୍କୁ ହାତ କରି ମେଶିନ ମାଧ୍ୟମରେ ପାହାଡ଼ କାଟି ମୋରମ ଓ ମାଟି ଟିପର, ଟ୍ରକ୍ ଜରିଆରେ ଚାଲାଣ କରୁଛନ୍ତି। ଏଥିସହ ପାହାଡ଼ ଉପରେ ଥିବା ବଡ଼ ବଡ଼ ଶାଗୁଆନ, ଶିଶୁ, ଶାଳ ଗଛଗୁଡିକୁ କାଟି ଗଣ୍ଡିଗୁଡ଼ିକୁ ବାହାରକୁ ପଠାଉଛନ୍ତି। ୨୦୨୦ -୨୦୨୧ ମସିହାରେ ଏପରି ବେଆଇନ କାର୍ଯ୍ୟ ଉପରେ ବଇଣ୍ଡା ରାଜସ୍ବ ବିଭାଗ ପକ୍ଷରୁ ଚଢ଼ାଉ କରାଯାଇ ୪ ଲକ୍ଷ ୮୯ ହଜାର ୬୯୧ ଟଙ୍କା ଓ ୨୦୨୨ ମସିହାରେ ୫ ଲକ୍ଷ ୩୦ ହଜାର ଟଙ୍କା ଜରିମାନା ଆଦାୟ କରାଯାଇଥିଲା। କିନ୍ତୁ ଅଧିକ କାର୍ଯ୍ୟାନୁଷ୍ଠାନ ନିଆଯାଉ ନ ଥିବା ବଇଣ୍ଡା ଗ୍ରାମବାସୀ ଅଭିଯୋଗ କରିଛନ୍ତି। ଜାମୁନାଳି ପଞ୍ଚାୟତରେ ଥିବା ୪ଟି ପାହାଡ଼ରୁ ଏକ ଠିକାସଂସ୍ଥା ନିୟମିତ ମୋରମ ଚାଲାଣ କରୁଥିବାବେଳେ ଗ୍ରାମବାସୀଙ୍କ ପକ୍ଷରୁ ୧୨ ଏପ୍ରିଲ ୨୦୨୨ ଓ ୫ ମାର୍ଚ୍ଚ ୨୦୨୩ରେ କିଶୋରନଗର ତହସିଲ କାର୍ଯ୍ୟାଳୟ ଠାରେ ଅଭିଯୋଗ କରାଯାଇଥିଲା। ବିଭାଗ ପକ୍ଷରୁ ଚଢାଉ କରାଯାଇଥିଲେ ମଧ୍ୟ ପ୍ରଶାସନ ଆଖିରେ ଧୁଳି ଦେଇ ଠିକାସଂସ୍ଥା ପାହାଡ଼କୁ ସମ୍ପୂର୍ଣ୍ଣ କାଟି ଦେଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ସେହିପରି କେତେଜଣ ଠିକାଦାର କଦଳୀମୁଣ୍ଡା ସଂରକ୍ଷିତ ଜଙ୍ଗଲରୁ ବିଳମ୍ବିତ ରାତିରେ ଟ୍ରିପ୍ ଟ୍ରିପ୍ ମୋରମ, ମାଟି ବଇଣ୍ଡା ତଥା ଆଖପାଖ ଅଞ୍ଚଳକୁ ଚାଲାଣ କରୁଥିବା ବଇଣ୍ଡା ଗ୍ରାମବାସୀ ରାଜସ୍ବ କାର୍ଯ୍ୟାଳୟ ଓ ହଣ୍ଡପା ରେଞ୍ଜ କାର୍ଯାଳୟ ଠାରେ ଅଭିଯୋଗ କରିଛନ୍ତି। ହେଲେ ବନ ବିଭାଗ ଓ ରାଜସ୍ବ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଦୀର୍ଘଦିନ ହେଲା ଏପରି ଚୋରା କାରବାର ଜାରି ରହିଥିଲେ ବି ପ୍ରଶାସନ ଆଖିବୁଜି ବସିଥିବା ନୁନୁକାପଶି ଗ୍ରାମବାସୀ କହିଛନ୍ତି। ବିଭାଗର କେତେଜଣ କର୍ମଚାରୀ ଠିକାସଂସ୍ଥା ସହ ସଲାସୁତରା କରି ଏହି ବେଆଇନ ମୋରମ ଓ ମାଟି ଚାଲାଣରେ ସହଯୋଗ କରୁଥିବା ବଇଣ୍ଡା ଛକ ବିକାଶ ପରିଷଦ ପକ୍ଷରୁ ଅଭିଯୋଗ କରାଯାଇଛି। ତୁରନ୍ତ ଏଥିପ୍ରତି ଜିଲା ପ୍ରଶାସନ ପକ୍ଷରୁ ପଦକ୍ଷେପ ନେବାକୁ ବଇଣ୍ଡା ଗ୍ରାମବାସୀ ଦାବି କରିଛନ୍ତି।
(ପରିକ୍ଷିତ ସାହୁ)
