ରାୟଗଡ଼ା,୨୯ା୪(ସ୍ବ.ପ୍ର.): ଖରାତାତିକୁ ନଜରରେ ରଖି ରାଜ୍ୟ ସରକାର ଅଧିକାଂଶ ସରକାରୀ କାର୍ଯାଳୟ ସକାଳୁଆ ଖୋଲିବା ପାଇଁ ଘୋଷଣା କରିଛନ୍ତି । ହେଲେ ଅଧିକାରୀ ଓ କର୍ମଚାରୀମାନେ ଠିକ୍ ସମୟରେ କାର୍ଯାଳୟରେ ପହଞ୍ଚୁ ନ ଥିବା ଦେଖାଯାଉଛି। ମଧ୍ୟାହ୍ନ ୧୨ଟା ପର୍ଯ୍ୟନ୍ତ ସେମାନଙ୍କ ଚୌକି ଖାଲି ପଡ଼ୁଛି। ଜିଲାପାଳଙ୍କ କାର୍ଯ୍ୟାଳୟ ଠାରୁ ଆରମ୍ଭ କରି ଜିଲାର ସମସ୍ତ ଅଧିକାରୀଙ୍କ କାର୍ଯ୍ୟାଳୟରେ ମାଳ ମାଳ କର୍ମଚାରୀ ଥିଲେ ମଧ୍ୟ କାର୍ଯ୍ୟାଳୟ ଖାଲି ପଡ଼ି ରହୁଛି। ଲୋକେ ନିଜ କାର୍ଯ୍ୟ ପାଇଁ ଭୋରରୁ ଆସି ଅପେକ୍ଷା କରି ରହୁଛନ୍ତି । ସେପଟେ ବିଭିନ୍ନ ବିଭାଗର କିରାଣିଙ୍କଠାରୁ ଆରମ୍ଭ କରି ଅନ୍ୟ କର୍ମଚାରୀମାନେ ଘର କାମ ସାରି କାର୍ଯାଳୟକୁ ଆସୁଛନ୍ତି । ପୁଣି ଅଫିସ ଅପରାହ୍ନ ୧ଟାରେ ଛୁଟି ହୋଇଯାଉଛି। ଏଥିପ୍ରତି କାହାରି ନଜର ପଡ଼ୁନି ।
ବୁଧବାର ରାୟଗଡ଼ା ଜିଲା ସଦର ମହକୁମାର ବିଭିନ୍ନ କାର୍ଯ୍ୟାଳୟରେ କର୍ମଚାରୀମାନଙ୍କ ଚୌକି ଖାଲି ପଡ଼ି ଥିବା ଦେଖାଯାଇଥିଲା। ଜିଲାପାଳଙ୍କ କାର୍ଯାଳୟଠାରୁ ଆରମ୍ଭ କରି ଫେକ୍ଟୋରି ଓ ବଏଲର ବିଭାଗ, ବୈଧମାପ ବିଭାଗ କାର୍ଯ୍ୟାଳୟରେ କର୍ମଚାରୀଙ୍କ ଦେଖା ମିଳି ନ ଥିଲା । ସେହିପରି ଜିଲା ଶିକ୍ଷା ବିଭାଗ, ମଙ୍ଗଳ ବିଭାଗ, ପୂର୍ତ୍ତ ବିଭାଗ, ଜିଲା ପରିଷଦ କାର୍ଯ୍ୟାଳୟ ଆଦ ସକାଳ ସମୟରେ ଖୋଲା ରହୁଥିଲେ ମଧ୍ୟ କର୍ମଚାରୀ ଠିକ୍ ସମୟରେ ଆସୁନାହାନ୍ତି। ଯାହା ଫଳରେ ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ବିଳମ୍ବରେ ଆସୁଥିବା ଏବଂ ଆଦୌ ଅଫିସ ଆସୁ ନ ଥିବା କର୍ମଚାରୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
