ବେଜିଂ, ୨।୭: ନକଲି ସାମଗ୍ରୀ ତିଆରି କରିବାରେ ଚାଇନା ବେଶ୍ ଜଣାଶୁଣା। କରୋନା ମହାମାରୀ ସଂକ୍ରମଣର ଏନ୍ତୁଡ଼ିଶାଳ ପାଲଟି ଥିବା ଉହାନ ଏବେ ପୁଣି ଚର୍ଚ୍ଚାରେ ରହିଛି। ଏଠାରେ ହୋଇଥିବା ଏକ ବଡ଼ ଧରଣର ଠକେଇ ସମ୍ପର୍କରେ ଜଣାପଡ଼ିଛି। ଏନେଇ ଜିରୋ ହେଜ୍ ନାମକ ଏକ ଓ୍ବେବସାଇଟ୍ରେ ତଥ୍ୟ ପ୍ରକାଶ ପାଇଛି। ଉହାନର କିଂଗୋଲ୍ଡ ଅଳଙ୍କାର ନିର୍ମାତା ଗତ ୫ ବର୍ଷ ମଧ୍ୟରେ ୧୪ଟି ଆର୍ଥିକ ସଂସ୍ଥାରେ ନକଲି ସୁନା ବନ୍ଧକ ରଖି ୨୧ ହଜାର ୧୪୮ କୋଟି ଟଙ୍କାର ଋଣ ନେଇଛି। ଏଥିପାଇଁ କିଂଗୋଲ୍ଡ ପକ୍ଷରୁ ୮୩ ଟନ୍ ଓଜନର ନକଲି ସୁନା ଇଟା ବନ୍ଧକ ରଖାଯାଇଥିବା ଅଭିଯୋଗ ହୋଇଛି। ଚାଇନାରେ ଗଚ୍ଛିତ ଥିବା ମୋଟ ସୁନାର ଏହା ୪ ପ୍ରତିଶତରୁ ଅଧିକ ବୋଲି ଅନୁମାନ କରାଯାଉଛି। କିଂଗୋଲ୍ଡ ଅଳଙ୍କାର ନେସଡେକ୍ ଷ୍ଟକ ଏକ୍ସ୍ଚେଞ୍ଜ୍ରେ ତାଲିକାଭୁକ୍ତ। ଏହାର ବାର୍ଷିକ କାରବାର ୬୦ କୋଟି ୪୧ ଲକ୍ଷ ଟଙ୍କାରୁ ଅଧିକ। ପୂର୍ବତନ ମିଲିଟାରି ଅଫିସର ଜିୟା ଝିହୋଙ୍ଗ୍ ଏହାର ମାଲିକ। ଏହା ୨୦୦୨ରେ ସ୍ଥାପିତ ହୋଇଥିଲା। ଫେବୃୟାରୀରେ ଠକେଇ ସମ୍ପର୍କରେ ଜଣାପଡ଼ିଥିଲା। ଏବେ ୩୨ ହଜାର ୭୩ କୋଟି ଟଙ୍କା କିଂଗୋଲ୍ଡଠାରୁ ଆଦାୟ କରାଯିବ। ଏହି କାର୍ଯ୍ୟ ବୀମା କମ୍ପାନୀ ପିଆଇସିସି ପ୍ରପର୍ଟି ଆଣ୍ଡ୍ କାଜୁଆଲିଟି କୋପରେଟିଭ୍ ଲିମିଟେଡ୍ ଦ୍ୱାରା କରାଯିବ। ସୂଚନାଯୋଗ୍ୟ, ପୃଥିବୀରେ ଆମେରିକାରେ ସର୍ବାଧିକ ୮୧୩୪ ଟନ୍ ସୁନା ଗଚ୍ଛିତ ରହିଛି। ଏହାପଛକୁ ଦ୍ୱିତୀୟ ସ୍ଥାନରେ ଥିବା ଜର୍ମାନୀ ପାଖରେ ୩୩୬୪ ଟନ୍ ସୁନା ରହିଛି। ସେହିପରି ତୃତୀୟ ସ୍ଥାନରେ ଥିବା ଇଟାଲୀ ପାଖରେ ୨୪୫୨ ଟନ୍ ସୁନା ରହିଛି। ଚାଇନା ଏହି ତାଲିକାର ଷଷ୍ଠ ସ୍ଥାନରେ ରହିଛି। ଚାଇନାରେ ୧୯୪୮.୩୦ ଟନ୍ ସୁନା ରହିଛି। ଭାରତ ତାଲିକାର ନବମ ସ୍ଥାନରେ ଅଛି। ଭାରତରେ ୬୪୨ ଟନ୍ ସୁନା ଗଚ୍ଛିତ ରହିଛି।
