୧୧ଲକ୍ଷରୁ ଉର୍ଦ୍ଧ୍ୱ ଟଙ୍କା ଠକେଇ, ୨ ଦମ୍ପତି କୋର୍ଟ ଚାଲାଣ
8:30 pmJanuary 7, 2021January 7, 2021 / 43

ହିଞ୍ଜିିଳିକାଟୁ,୭ା୧(ଡି.ଏନ୍‌.ଏ.)-ହିଞ୍ଜିଳି ଥାନା କାଞ୍ଜିଆମ୍ମା ଓ କୋଦଳା ଥାନା ଡେଙ୍ଗାପଦର ଗ୍ରାମର ୨ ଦମ୍ପତି ଚାକିରି, ଗ୍ରୁପ୍‌ ଲୋନ୍‌ ଆଦି କରାଇଦେବେ କହି ୧୧ଲକ୍ଷ ୨୨ହଜାର ଟଙ୍କା ଠକେଇ କରିଥିବା ଅଭିଯୋଗରେ ଗୁରୁବାର ଗିରଫ ହୋଇଛନ୍ତି। ସେମାନେ ହେଲେ କାଞ୍ଜିଆମ୍ମା ଗ୍ରାମର ମାଧବ ଜେନା, ତାଙ୍କ ସ୍ତ୍ରୀ ବନିତା ଜେନା ଓ ଡ଼େଙ୍ଗାପଦରର ସୁଜିତ କୁମାର ପ୍ରଧାନ ଏବଂ ତାଙ୍କ ସ୍ତ୍ରୀ ଅନିତା ପ୍ରଧାନ। ଅଭିଯୁକ୍ତମାନଙ୍କୁ କୋର୍ଟଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ୨ ଦମ୍ପତିଙ୍କୁ ବ୍ରହ୍ମପୁର ମଣ୍ଡଳ କାରାଗାରକୁ ପଠାଯାଇଛି।
ଦୁଇ ଦମ୍ପତି ଚାକିରି ଦେବା, ଗ୍ରୁପ୍‌ଲୋନ ଓ ଅନ୍ୟ ସୁବିଧା ଯୋଗାଇଦେବା ପ୍ରଲୋଭନ ଦେଖାଇ କାଞ୍ଜିଆମ୍ମା ଓ ଆଖପାଖ ଗ୍ରାମର ପ୍ରାୟ ୩୯ ଜଣଙ୍କଠାରୁ ୧୧ଲକ୍ଷ ୨୨ହଜାର ଟଙ୍କା ଠକେଇ କରିଥିଲେ। ତେବେ ଧାର୍ଯ୍ୟ ସମୟ ମଧ୍ୟରେ ଚାକିରି କି ଲୋନ୍‌ ନ ମିଳିବାରୁ ସେମାନେ ଅର୍ଥ ଫେରାଇବାକୁ ଦାବି କରିଥିଲେ। ଅଭିଯୁକ୍ତ ୨ ଦମ୍ପତି ଟଙ୍କା ଫେରସ୍ତ ନ କରି ଧମକ ଦେଉଥିଲେ। ଠକେଇର ଶିକାର ହୋଇଥିବା କଞ୍ଜିଆମ୍ମାର ରୀତା ଜେନା, ଜଗଦୀଶ ବେହେରା, କାମେଶ୍ୱରୀ ଜେନା, ମିନତୀ ସ୍ବାଇଁ, ଦାଶରଥୀ ନାୟକ ପ୍ରମୁଖ ଏନେଇ ସୋମବାର ହିଞ୍ଜିିଳି ଥାନାରେ ଅଭିଯୋଗ କରିଥିଲେ। ନଂ. ୪/୨୧ରେ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଥିଲା ବୋଲି ଆଇଆଇସି ଅଭିମନ୍ୟୁ ଦାଶ କହିଛନ୍ତି।