ଦାରିଙ୍ଗବାଡି, ୧।୪ (ଅରୁଣ ସାହୁ):ଏକ ଦଶନ୍ଧିରୁ ଅଧିକା ଦିନ ବିତିଲା, ହେଲେ ଜନଜାତିଙ୍କ ଉଦ୍ଦେଶ୍ୟରେ କରାଯାଇଥିବା ଜନଜାତି ହାଟଟି ଆଜି ପର୍ଯ୍ୟନ୍ତ କାହା କାର୍ଯ୍ୟରେ ଲାଗିପାରି ନାହିଁ। ଏଭଳି ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସିମନବାଡି ପଞ୍ଚାୟତ ଅଞ୍ଚଳରେ। ଉକ୍ତ ବ୍ଲକର ଦାରିଙ୍ଗବାଡି ପରେ ସିମନବାଡି ବଜାର ଉପରେ ପ୍ରାୟ ୧୦ରୁ ଉର୍ଦ୍ଧ୍ୱ ପଞ୍ଚାୟତର ଲକ୍ଷାଧିକ ଲୋକ ନିର୍ଭର କରୁଥିବାବେଳେ ଜନଜାତି ଅଧ୍ୟ୍ୟୁଷିତ ଅଞ୍ଚଳ ଭାବେ ରହିଥିବା ଏହି ଅଞ୍ଚଳରେ ଜନଜାତି ସମ୍ପ୍ରଦାୟର ବ୍ୟବସାୟୀ ମଧ୍ୟ ରହି ବ୍ୟବସାୟ କରୁଛନ୍ତି। ସେମାନେ ରାସ୍ତା କଡ଼ରେ ଉଠାଦୋକାନ କରି ପନିପରିବା ବ୍ୟବସାୟଠାରୁ ଆରମ୍ଭ କରି ଅଦା, ହଳଦୀ, କାନ୍ଦୁଲ ଆଦି ବ୍ୟବସାୟ କରୁଛନ୍ତି। କିନ୍ତୁ ତାଙ୍କୁ ଏହି ହାଟ ଘର ଯୋଗାଇ ଦିଆଯାଉନାହିଁ। ସେହିପରି ବଜାରକୁ ଆସୁଥିବା ଲୋକମାନେ ଯଦି ଏହି ହାଟ ଖୋଲାଯାଇଥାନ୍ତା ତେବେ ଅଞ୍ଚଳରେ ଅମଳ ହେଉଥିବା ପାରମ୍ପରିକ ପନିପରିବା ଓ ଅନ୍ୟ ସାମଗ୍ରୀ କିଣିପାରିଥାନ୍ତେ। ଏହି ଜନଜାତି ହାଟ ଖୋଲିଥିଲେ ଉଠା ଦୋକାନୀମାନଙ୍କୁ ଏହି ହାଟ ଭିତରେ ଦୋକାନ ଖୋଲିବାକୁ ସୁଯୋଗ ମିଳିପାରିଥାନ୍ତା ଓ ଜାତୀୟ ରାଜପଥରେ ଟ୍ରାଫିକ ନିୟନ୍ତ୍ରଣ ହୋଇପାରିଥାନ୍ତା ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି।
ଉକ୍ତ ହାଟ ପ୍ରଥମେ ବାଲିଗୁଡା ସମନ୍ବିତ ଆଦିବାସୀ ଉନ୍ନୟନ ସଂସ୍ଥା (ଆଇଟିଡିଏ )ପକ୍ଷରୁ ନିର୍ମାଣ କରାଯାଇଥିଲା ପରବର୍ତ୍ତୀ ଦମୟରେ ଆଇଟିଡିଏ ପଞ୍ଚାୟତକୁ ହସ୍ତାନ୍ତର କରିବା ପରେ ପଞ୍ଚାୟତ ପୁଣି ଲକ୍ଷାଧିକ ଟଙ୍କା ଖର୍ଚ୍ଚ କରି ତାର ରୂପାନ୍ତର କାର୍ଯ୍ୟ ସହ ହାଟ ଭିତରେ ଜଣେ ଦୋକାନ ଖୋଲିବା ପାଇଁ ଆବଶ୍ୟକ ବ୍ୟବସ୍ଥା କଲା ଏଥିରେ ସରକାରଙ୍କ ଅର୍ଥ ଖର୍ଚ୍ଚ ହେଲା। ଠିକାଦାର ମାଲାମାଲ ହେଲେ କିନ୍ତୁ ଜନଜାତିଙ୍କ କୌଣସି କାର୍ଯ୍ୟରେ ଆସିଲା ନାହିଁ। ଏହାକୁ ନେଇ ଅଞ୍ଚଳରେ ବସବାସ କରୁଥିବା ଜନଜାତି ସମ୍ପ୍ରଦାୟଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି। ବାରମ୍ବାର ଅଞ୍ଚଳବାସୀ ଏହି ହାଟକୁ କାର୍ଯ୍ୟରେ ଲଗାଇବାକୁ ଦାବି କରିଆସୁଥିଲେ ସୁଦ୍ଧା ତାହା କାର୍ଯ୍ୟରେ ଆସୁନଥିବା ଅଭିଯୋଗ ହେଉଛି।
ଏନେଇ ସରପଞ୍ଚ ଅମିତା ପ୍ରଧାନ କହିଛନ୍ତି,ଲୋକଙ୍କ ଦାବିକୁ ସେ ସ୍ବୀକାର କରିବା ସହ ହାଟ ଖୋଲାଗଲେ ଲୋକମାନେ ଶସ୍ତାସ୍ରେ ସାମଗ୍ରୀ କିଣିପାରିବେ। ତେଣୁ ପଞ୍ଚାୟତ ଫଣ୍ଡ ରୁ ଖର୍ଚ୍ଚ କରାଯାଇ ୧୧ଟି ଦୋକାନ ଗୃହ ଖୋଲାଯିବ ବୋଲି ସେ କହିଛନ୍ତି। ଉକ୍ତ ହାଟରେ ଆହୁରି ରୂପାନ୍ତର କରାଯିବାକୁ ବାକି ରହିଛି ବୋଲି ସେ କହିଛନ୍ତି।
