ଖଣ୍ଡପଡା,୧୭।୧୨ (ସ୍ବ.ପ୍ର.):କମ୍ପ୍ୟୁଟର ଶିକ୍ଷା ମାଧ୍ୟମରେ ହାଇସ୍କୁଲ ଛାତ୍ରୀଛାତ୍ରମାନଙ୍କ ଦକ୍ଷତା ବୃଦ୍ଧି ପାଇଁ ୨୦୧୩ରେ କେନ୍ଦ୍ର ଓ ରାଜ୍ୟ ସରକାର ଇ-ବିଦ୍ୟାଳୟ ଯୋଜନା ଆରମ୍ଭ କରିଥିଲେ। ଏଥିପାଇଁ ପ୍ରତି ହାଇସ୍କୁଲରେ ଜଣେ ଲେଖାଏ ଶିକ୍ଷା ସଂଯୋଜକଙ୍କୁ ୫ବର୍ଷିୟା ଚୁକ୍ତିନାମାରେ ନିଯୁକ୍ତି ମିଳିଥିଲା। ଚୁକ୍ତିନାମା ଅନୁଯାୟୀ ବିଦ୍ୟାଳୟର ଶିକ୍ଷୟିତ୍ରୀ ଶିକ୍ଷକମାନେ ଶିକ୍ଷା ସଂଯୋଜକଙ୍କଠାରୁ କମ୍ପ୍ୟୁଟର ଜ୍ଞାନ ଆହରଣ କରିବେ, ଶିକ୍ଷା ସଂଯୋଜକମାନଙ୍କ କାର୍ଯ୍ୟ ଅବଧି ସମ୍ପନ୍ନ ହେବା ପରେ ସଂପୃକ୍ତ ଶିକ୍ଷୟିତ୍ରୀ ଶିକ୍ଷକମାନେ ଛାତ୍ରୀଛାତ୍ରମାନଙ୍କୁ କମ୍ପ୍ୟୁଟର ଶିକ୍ଷା ପ୍ରଦାନ କରିବେ। ହେଲେ ନୟାଗଡ଼ ଜିଲାର ଅଧିକାଂଶ ହାଇସ୍କୁଲରେ ତା’ର ବ୍ୟତିକ୍ରମ ଦେଖାଦେଇଛି। ଶିକ୍ଷା ସଂଯୋକମାନଙ୍କ ଚୁକ୍ତିନାମା ଅବଧି ସରିବା ପରେ ସେମାନେ ସ୍କୁଲ ଛାଡିଛନ୍ତି। ସେଦିନଠାରୁ କୋଟିଏରୁ ଊର୍ଦ୍ଧ୍ୱ ଟଙ୍କାର କମ୍ପ୍ୟୁଟର ଓ ଅନ୍ୟାନ୍ୟ ସାମଗ୍ରୀ ଏବେ ବିଭିନ୍ନ ସ୍କୁଲରେ ପଡି ଖତ ଖାଉଛି ବୋଲି ଅଭିଯୋଗ ହୋଇଛି।
ସଂପ୍ରତି କରୋନା କଟକଣା ପାଇଁ ରାଜ୍ୟର ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଛି। ରାଜ୍ୟ ସରକାର ଅନ୍ଲାଇନ୍ ଶିକ୍ଷା ଉପରେ ଗୁରୁତ୍ୱାରୋପ କରିଛନ୍ତି। ଏହି ଯୋଜନାର କୌଣସି ସୁଫଳ ମିଳିନାହିଁ ବୋଲି ଅଭିଭାବକମାନେ କହିଛନ୍ତି। ନୟାଗଡ ଜିଲାର ୧୧୯ ସରକାରୀ ହାଇସ୍କୁଲରେ ଏହି ଇ-ବିଦ୍ୟାଳୟ ଯୋଜନା ଚାଲିଥିଲା। ଏଥିରେ ନିଯୁକ୍ତି ପାଇଥିବା ଶିକ୍ଷା ସଂଯୋଜକମାନଙ୍କ ଚାକିରି ଅବଧି ସରିବା ପରେ ସେମାନେ ଗତ ଏକ ବର୍ଷ ତଳେ ସ୍କୁଲ ଛାଡ଼ିଥିଲେ। ଏହାପରେ ଛାତ୍ରୀଛାତ୍ରଙ୍କ ଆଗ୍ରହ ଥିଲେ ମଧ୍ୟ କମ୍ପ୍ୟୁଟର ଶିକ୍ଷା ପାଇପାରୁ ନାହାନ୍ତି। ନୟାଗଡ଼ ଜିଲାରେ ୨୦୧୪ ଏପ୍ରିଲ ୨ରୁ ଆରମ୍ଭ ହୋଇଥିବା ଏହି ଯୋଜନା ୨୦୧୯ ମାର୍ଚ୍ଚ ୩୧ରେ ବନ୍ଦ ହେବା ପରେ ଏପରି ପରିସ୍ଥିତି ସୃଷ୍ଟି ହୋଇଛି। ଜିଲାର ବିଭିନ୍ନ ହାଇସ୍କୁଲର ଆଇସିଟି ଲ୍ୟାବ୍ରେ ଶତାଧିକ କମ୍ପ୍ୟୁଟର, ପ୍ରିଣ୍ଟର, ଇଲେକ୍ଟ୍ରୋନିକ ଧଳା ପଟା(ଇଣ୍ଟରଆକ୍ଟିଭ ହ୍ବାଇଟ ବୋର୍ଡ), ଇନ୍ଭର୍ଟର, ପ୍ରୋଜେକ୍ଟର, ଅଗ୍ନି ନିର୍ବାପକ, ଜେନେରେଟର, ଟେବୁଲ, ଚୌକି ପ୍ରଭୃତି ନଷ୍ଟ ହେବାକୁ ବସିଛି।
ଏ ସଂକ୍ରାନ୍ତରେ ଖଣ୍ଡପଡା ଆର.ସି.ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ଜୟନ୍ତୀ ସାହୁ କୁହନ୍ତି, କୋଭିଡ୍ ସମୟରେ ପିଲାମାନେ ଯେହେତୁ ଅନ୍ଲାଇନ ପାଠପଢାକୁ ଗୁରୁତ୍ୱ ଦେଉଛନ୍ତି ସେଥିପାଇଁ ନିଶ୍ଚିତ ଭାବେ ଇ-ବିଦ୍ୟାଳୟ ଯୋଜନାର ଆବଶ୍ୟକତା ରହିଛି। ମାତ୍ର ସଂଯୋଜକମାନେ ଛଟେଇ ହେବା ପରେ ଆଇସିଟି ଲ୍ୟାବ୍ଗୁଡିକ ଅକାମୀ ହୋଇପଡିଛି। ତେବେ ଭୋକେଶନାଲ ଶିକ୍ଷକ ଥିବା ହାତଗଣତି କିଛି ସ୍କୁଲରେ କମ୍ପ୍ୟୁଟରଗୁଡିକ ଚାଲୁଛି। ପୂର୍ବରୁ ଥିବା କମ୍ପ୍ୟୁଟର ଶିକ୍ଷକମାନଙ୍କୁ ପୁନଃନିଯୁକ୍ତି କରାଗଲେ ଛାତ୍ରୀଛାତ୍ରମାନେ ଉପକୃତ ହୋଇପାରିବେ ବୋଲି ସେ କହିଛନ୍ତି। ଖଣ୍ଡପଡା ବ୍ଲକ ଶିକ୍ଷା ଅଧିକାରୀ ଚନ୍ଦନ କୁମାର ରଥ କୁହନ୍ତି, ସରକାର ଯୋଗାଇ ଦେଇଥିବା କମ୍ପ୍ୟୁଟରଗୁଡିକୁ ସମ୍ପୃକ୍ତ ସ୍କୁଲର ଶିକ୍ଷୟିତ୍ରୀ ଶିକ୍ଷକମାନେ କାମରେ ଲଗାଉଛନ୍ତି। ଛାତ୍ରୀଛାତ୍ରମାନେ ଯଦି ଏହି ଯୋଜନାରେ ସାମିଲ ହୋଇପାରନ୍ତେ ତେବେ କମ୍ପ୍ୟୁଟରଗୁଡିକ ଉପଯୋଗ ହୋଇପାରନ୍ତା। ସଂପ୍ରତି କରୋନା କଟକଣା ଏଥିରେ ପ୍ରତିବନ୍ଧକ ସୃଷ୍ଟି କରିଛି। ସମସ୍ତ କମ୍ପ୍ୟୁଟର ଓ ଅନ୍ୟାନ୍ୟ ସାମଗ୍ରୀ ଠିକ୍ ଥିବା ରଥ କହିଛନ୍ତି। ରାମଚନ୍ଦ୍ର ହାଇସ୍କୁଲର ଛାତ୍ର ଆଶୁତୋଷ ସିଂହ ସାମନ୍ତ କୁହନ୍ତି, ସରକାର ଏହି ଯୋଜନାରେ ବହୁ କୋଟି ଟଙ୍କା ଖର୍ଚ୍ଚ କରିଥିଲେ। ହେଲେ ନିୟୋଜିତ କମ୍ପ୍ୟୁଟର ଶିକ୍ଷକମାନଙ୍କୁ ବିଦା କରିଦେବା ପରେ ଛାତ୍ରୀଛାତ୍ରମାନେ ସେହି ଶିକ୍ଷାରୁ ବଞ୍ଚତ୍ତ ହୋଇଛନ୍ତି। ଏ ସଂକ୍ରାନ୍ତରେ ସରକାର ଆଉ ଥରେ ଚିନ୍ତା କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି।
