ଓ୍ବାଶିଂଟନ/ନୂଆଦିଲ୍ଲୀ, ୨୨।୬ : ପୃଥିବୀରେ ପ୍ରତିଦିନ ରିକ୍ଟର ସ୍କେଲରେ ୨.୦ ତୀବ୍ରତାରୁ କମ ତୀବ୍ରତାଯୁକ୍ତ ଭୂକମ୍ପ ବହୁ ସଂଖ୍ୟାରେ ଘଟିଥାଏ। ଏହି ଭୂକମ୍ପକୁ ମାଇକ୍ରୋ ଶ୍ରେଣୀଭୁକ୍ତ କରାଯାଇଛି । ଏହି ଭୂକମ୍ପକୁ ଅନୁଭବ କରିହୋଇ ନଥାଏ। ରିକ୍ଟର ସ୍କେଲରେ ମାଇକ୍ରୋ ବର୍ଗର ୮,୦୦୦ ଭୂକମ୍ପ ସାରା ବିଶ୍ୱରେ ରେକର୍ଡ କରାଯାଇଥାଏ। ସେହିଭଳି ୨.୦ ରୁ ୨.୯ ତୀବ୍ରତାଯୁକ୍ତ ଭୂକମ୍ପକୁ ଛୋଟ ବର୍ଗରେ ରଖାଯାଇଛି। ପ୍ରତିଦିନ ଏହିପରି ୧୦୦୦ରୁ ଅଧିକ ଭୂକମ୍ପ ଘଟିଥାଏ। ସାଧାରଣତଃ ଏହାକୁ ଅନୁଭବ କରି ହୁଏ ନାହିଁ।
ପ୍ରତିଦିନ କ୍ଷୟକ୍ଷତି ଘଟୁନଥିବା ତଥା ନୁଭବ କରି ହେଉନଥିବା ୯୦୦୦ରୁ ଅଧିକ ଭୂକମ୍ପ ଅନୁଭୂତ ହୋଇଥାଏ। ୩.୦ ରୁ ୩.୯ ତୀବ୍ରତା ଯୁକ୍ତ ଅତି ହାଲୁକା ବର୍ଗର ଭୂକମ୍ପ ବର୍ଷକୁ ୪୯,୦୦୦ ଥର ରେକର୍ଡ କରାଯାଇଥାଏ। ଏହାକୁ ଅନୁଭବ କରିହୁଏ। କିନ୍ତୁ ଏହାଯୋଗୁ କୌଣସି କ୍ଷୟକ୍ଷତି ହୋଇ ନ ଥାଏ।
୪.୦ ରୁ ୪.୯ ତୀବ୍ରତାଯୁକ୍ତ ହାଲୁକା ବର୍ଗର ଭୂକମ୍ପ ସମଗ୍ର ପୃଥିବୀରେ ବର୍ଷକୁ ପ୍ରାୟ ୬,୨୦୦ରୁ ଅଧିକ ଥର ରିକ୍ଟର ସ୍କେଲରେ ରେକର୍ଡ କରାଯାଇଥାଏ। ଏଭଳି ଭୂକମ୍ପରେ କମ୍ପନ ଅନୁଭବ କରାଯାଏ ଏବଂ ଘରୋଇ ଜିନିଷଗୁଡ଼ିକରେ ମଧ୍ୟ କମ୍ପନ ଦେଖିବାକୁ ମିଳିଥାଏ। ଏହାଠାରୁ ଅଧିକ ତୀବ୍ରତାଯୁକ୍ତ ଭୂକମ୍ପରେ କ୍ଷୟକ୍ଷତିର ଆଶଙ୍କା ଅଧିକ ରହିଥାଏ।
