ରାସୋଳ, ୧୫।୧୨(ଡି.ଏନ୍.ଏ.): ବିଲରେ କଟାହୋଇ ପଡ଼ିଛି ଧାନ। ୧୦-୧୫ଦିନ ଭିତରେ ଅମଳ ସରନ୍ତା। ଘରକୁ ବୁହା ହୋଇଆସନ୍ତା ସୁନାର ଫସଲ। ମିଳନ୍ତା ବର୍ଷକର ଝାଳବୁହା ପରିଶ୍ରମର ମୂଲ୍ୟ। ହେଲେ ମାତ୍ର ୫ ଦିନ ମଧ୍ୟରେ ବଦଳି ଯାଇଛି ଚିତ୍ର। ଦଳବଦ୍ଧ ହୋଇ ବୁଲୁଥିବା ୬୦ରୁ ଊର୍ଦ୍ଧ୍ୱ ହାତୀ ଖାଇ ଚାଲିଛନ୍ତି ପାଚିଲା ଧାନ। ଶତାଧିକ ଏକର ଜମିରେ ଫସଲ ଦଳିଚକଟି ନଷ୍ଟ କରିସାରିଲେଣି। ବିଲ ହୁଡ଼ାରେ ଚାଷୀ ଅସହାୟ ଅବସ୍ଥାରେ ଛିଡ଼ା ହୋଇ ଦେଖୁଥିବାବେଳେ ଆଖି ଆଗରେ ଛାରଖାର ହୋଇଯାଉଛି ସବୁକିଛି। ବଳକା ଧାନ ହାତୀ ମୁହଁରୁ ଛଡ଼ାଇ ଆଣିବା ପାଇଁ ଚାଷୀ ସଂଘର୍ଷ କରୁଥିବାବେଳେ ଟ୍ରାକ୍ଟର ଅଭାବ ସେମାନଙ୍କ ସମସ୍ୟାକୁ ବହୁଗୁଣିତ କରିଦେଇଛି। ଏପରି କି ଅନେକ ସ୍ଥାନରେ ଭଡ଼ାରେ ଟ୍ରାକ୍ଟର ନେବାକୁ ବାଡ଼ିଆପିଟା ସ୍ଥିତି ଉପୁଜୁଛି, ଯାହାକୁ ନେଇ ଚିନ୍ତାରେ ପଡ଼ିଛନ୍ତି ଢେଙ୍କାନାଳ ଜିଲା ହିନ୍ଦୋଳ ବ୍ଲକ ରାସୋଳ ଅଞ୍ଚଳର ଚାଷୀ।
ବୁହାଳିପାଳ କାଳିଯୋଡ଼ି କ୍ଷୁଦ୍ର ଜଳସେଚନ ପ୍ରକଳ୍ପ ନିକଟରେ ଦଳବଦ୍ଧ ଭାବେ ରହୁଥିବା ୬୦ ହାତୀ ଏବେ ବିଭିନ୍ନ ପଲରେ ବିଭକ୍ତ ହୋଇ ଧାନ ଜମିମୁହଁା ହୋଇଛନ୍ତି। ସମାନ ଦୃଶ୍ୟ ଦେଖିବାକୁ ମିଳିଛି ଦଣ୍ଡିରି ଅଞ୍ଚଳରେ। ଏଠାରେ ମଧ୍ୟ ୪୦ ହାତୀ ଦୀର୍ଘଦିନ ହେଲା ଉପଦ୍ରବ ସୃଷ୍ଟି କରି ଚାଲିଛନ୍ତି। ନବକିଶୋରପୁର, ବୁହାଳିପାଳ, କୁନୁଆ, ଗଣ୍ଡାନାଳୀ, ଦଣ୍ଡିରି, ବାଙ୍କଟିଆ, କାଟେଣି ଅଞ୍ଚଳ ଛାଡୁନାହାନ୍ତି ହାତୀପଲ। ସେମାନଙ୍କ ଗର୍ଜନରେ ଅଞ୍ଚଳ ଥରହର ହେଉଛି। ହିଂସ୍ର ରୂପ ଧାରଣ କରୁଥିବା ହାତୀ ଆକ୍ରମଣ ଆଶଙ୍କାରେ ଚାଷୀମାନେ ବିଲରେ ପଡ଼ିଥିବା ଧାନ ଆଣିପାରୁନାହାନ୍ତି। କେବଳ ଏତିକି ନୁହେଁ, ଅନେକ ସମୟରେ ହାତୀପଲ ଜନବସତିମୁହଁା ହେଉଥିବାରୁ ଜୀବନ ହାନି ଆଶଙ୍କାକୁ ଏଡ଼ାଇ ଦିଆଯାଇପାରୁନାହିଁ। ସନ୍ଧ୍ୟା ହେଲେ ଅଞ୍ଚଳ ଦେଇ ଯାଇଥିବା ବ୍ୟସ୍ତବହୁଳ ପୁରୁଣା କଟକ-ସମ୍ବଲପୁର ରାସ୍ତା ଶୂନ୍ଶାନ ହୋଇପଡୁଛି। ଗ୍ରାମ ରାସ୍ତାରେ ନୀରବତା ଛାଇଯାଉଛି। ହାତୀଙ୍କ ପାଇଁ ଅଞ୍ଚଳବାସୀ ଏକପ୍ରକାର ଗୃହବନ୍ଦୀ ହୋଇ ରହିଛନ୍ତି। ଅନ୍ୟପଟେ ଏକକାଳୀନ ଧାନ ଅମଳ ଚାଲିଥିବାରୁ ଏବେ ଟ୍ରାକ୍ଟର ଅଭାବ ଚାଷୀଙ୍କ ମୁଣ୍ଡବ୍ୟଥା ବଢ଼ାଇଛି। ଯୁଦ୍ଧକାଳୀନ ଭିତ୍ତିରେ ସମସ୍ତେ ଧାନ ଅମଳ କରି ସୁରକ୍ଷିତ ଜାଗାରେ ରଖିବାକୁ ଏକପ୍ରକାର ପ୍ରତିଯୋଗିତା ଚଳାଇଛନ୍ତି। ଫଳରେ ପୂର୍ବରୁ ଘଣ୍ଟାକୁ ୮୦୦ ଟଙ୍କାରେ ମିଳୁଥିବା ଟ୍ରାକ୍ଟର ଏବେ ୧୨୦୦ ଟଙ୍କା ଦେଲେ ବି ମିଳୁନାହିଁ। ଏ ସଂକ୍ରାନ୍ତରେ କୁନୁଆର ଚାଷୀ ସରୋଜ ରାଉତ ଏବଂ ଜାପାନୀ ସାମଲ କୁହନ୍ତି, ଆରମ୍ଭରୁ ବର୍ଷା ଅଭାବରୁ ଚାଷ ପ୍ରଭାବିତ ହୋଇଥିଲା। ଋଣ କରି ବଡ଼ କଷ୍ଟରେ ଧାନ ଚାଷ କରିଥିଲୁ। ହେଲେ ଦୁଇରାତି ଭିତରେ ସବୁକିଛି ହାତୀ ଖାଇଯାଇଛନ୍ତି। କେମିତି କରଜ ଶୁଝିବୁ, ବର୍ଷସାରା କ’ଣ ଖାଇବୁ, କିପରି ଚଳିବୁ ତାହା ଭାବିଲା ବେଳକୁ ଚିନ୍ତା ମାଡ଼ିବସୁଛି। ସୁବିଧାରେ ଟ୍ରାକ୍ଟର ମିଳିଥିଲେ ଧାନ ଅମଳ କରିହୁଅନ୍ତା। ଅନ୍ତତଃ ବଞ୍ଚତ୍ୟାଇଥିବା ଫସଲ ଘରକୁ ଆସିପାରନ୍ତା।
ଏ ସଂକ୍ରାନ୍ତରେ ରେଞ୍ଜର ଲୋହିତ ରଥ କୁହନ୍ତି, ଜମିରେ ପାଚିଲା ଧାନ ଥିବାରୁ ହାତୀ ବିଲ ଛାଡୁନାହାନ୍ତି। ହାତୀଙ୍କୁ ଘଉଡ଼ାଇବା ପାଇଁ ଯେତେ ଉଦ୍ୟମ କରାଗଲେ ମଧ୍ୟ କିଛି ଲାଭ ମିଳୁନାହିଁ। ଅଧିକ କର୍ମଚାରୀଙ୍କୁ ମୁତୟନ କରାଯାଇ ଚାଷୀଙ୍କ ଫସଲ ସୁରକ୍ଷାକୁ ଗୁରୁତ୍ୱ ଦିଆଯିବ।
