କଣିହଁା, ୧୯।୩ (ଡି.ଏନ.ଏ.): ଅନୁଗୋଳ ଜିଲା କଣିହାଁ ବ୍ଲକ ଅଞ୍ଚଳରେ ଥିବା ବିଭିନ୍ନ ବିଦ୍ୟୁତ୍ ପ୍ରକଳ୍ପ ଠିକ୍ ଭାବେ ପାଉଁଶ ପରିଚାଳନା କରୁ ନ ଥିବାରୁ ଏହାର ସିଧାସଳଖ ପ୍ରଭାବ ଅଞ୍ଚଳବାସୀଙ୍କୁ ଭୋଗିବାକୁ ପଡ଼ୁଥିବା ଅଭିଯୋଗ ହେଉଛି। ପଶ୍ଚିମା ଝଡ଼ ପ୍ରଭାବରେ ଶନିବାର ଅପରାହ୍ନରେ ଜୋର୍ଦାର ପବନ ହେବାରୁ ପ୍ରବଳ ମାତ୍ରାରେ ପାଉଁଶ ଉଡ଼ି ୫୦ରୁ ଅଧିକ ଗଁା ପରିବେଶକୁ ପାଉଁଶମୟ କରିଦେଇଥିଲା। ୨ ଘଣ୍ଟାରୁ ଅଧିକ ସମୟ ଧରି ଏହି ପାଉଁଶ ଉଡିବାରୁ ଅଞ୍ଚଳ କୁହୁଡ଼ି ତଳେ ଥିବା ଭଳି ଦୃଶ୍ୟମାନ ହୋଇଥିଲା। ଫଳରେ ଘର, ବଜାର, ସ୍ବାସ୍ଥ୍ୟକେନ୍ଦ୍ର, ବିଭିନ୍ନ କାର୍ଯ୍ୟାଳୟରେ ମୋଟା ଆସ୍ତରଣର ପାଉଁଶ ଜମିଯାଇଥିଲା। ତେବେ ସାରେ ପବନ ଥମିବା ଓ ସାମାନ୍ୟ ବର୍ଷା ଯୋଗୁ ପାଉଁଶରୁ ନିସ୍ତାର ମିଳିଥିଲା।
ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, କଣିହାଁ ବ୍ଲକରେ ରହିଥିବା ବିଭିନ୍ନ ବିଦ୍ୟୁତ୍ ପ୍ରକଳ୍ପରେ ଉପଯୁକ୍ତ ଭାବେ ପାଉଁଶ ପରିଚାଳନା କରାଯାଉ ନାହିଁ। ପରିବହନ ନାମରେ ବେଆଇନ ପାଉଁଶ ଗଦା, ପାଉଁଶ ପୋଖରୀରେ ଅବ୍ୟବସ୍ଥା ସହିତ ମାଟି ଘୋଡାଇବା ଆଦି କରାଯାଉ ନ ଥିବାରୁ ପ୍ରାୟ ସମୟରେ ପାଉଁଶ ଉଡ଼ୁଛି। ସେହିପରି କଣିହଁା କୋଇଲା ଖଣିରୁ ମଧ୍ୟ କୋଇଲା ଗୁଣ୍ଡ ଉଡ଼ୁଛି। ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ଘଟଣାସ୍ଥଳ ପରିଦର୍ଶନ କରୁ ନ ଥିବା ଓ ବଳିଷ୍ଠ ପଦକ୍ଷେପ ନେଉ ନ ଥିବା ପ୍ରତିବାଦ କରି ଅଞ୍ଚଳବାସୀ କଣିହାଁ ବରଛକଠାରେ ସାରେ ରାସ୍ତା ଅବରୋଧ କରିଥିଲେ। ଏଥିଯୋଗୁ ଏହି ରାସ୍ତା ଦେଇ ଯାତାୟାତ କରୁଥିବା କୋଇଲା ଓ ପାଉଁଶ ପରିବହନ ଗାଡ଼ିଗୁଡ଼ିକ ଖବର ଲେଖାହେବା ବେଳଯାଏ ଅଟକି ରହିଛି। ଏ ନେଇ ତହସିଲଦାର ଡାନିଏଲ ଏକ୍କା କହିଛନ୍ତି, ଅଞ୍ଚଳବାସୀ କିପରି ପାଉଁଶ ସମସ୍ୟାର ସମ୍ମୁଖୀନ ନ ହେବେ ସେ ନେଇ ପ୍ରକଳ୍ପ କର୍ତ୍ତୃପକ୍ଷଙ୍କ ସମେତ ଉଚ୍ଚ ପଦାଧିକାରୀଙ୍କୁ ଅବଗତ କରାଯିବ।
