ରସୁଲପୁର,୫ା୪(ଡି.ଏନ.ଏ.):ରସୁଲପୁର ବ୍ଲକ ଅଞ୍ଚଳରେ ଖାଦ୍ୟ ସୁରକ୍ଷା ଆଇନର ବାଟ ଓଗାଳୁଛି ଆଧାର କାର୍ଡ ଓ ବ୍ୟାଙ୍କ ଜମାଖାତା। ଆଧର ଲିଙ୍କ୍ ହୋଇପାରୁ ନ ଥିବାରୁ ବ୍ଲକ ଅଞ୍ଚଳରେ ୨ହଜାରରୁ ଊର୍ଦ୍ଧ୍ୱ ହିତାଧିକାରୀଙ୍କ ଚାଉଳ ବନ୍ଦ ରହିଛି। ଆଧାର ଓ ବ୍ୟାଙ୍କ ଜମାଖାତା ନ ଥିବା ହିତାଧିକାରୀଙ୍କ ଚାଉଳ ବନ୍ଦ କରିବାକୁ ସରକାରୀ ନିର୍ଦ୍ଦେଶ ରହିଥିବା ଡିଲରମାନେ କହୁଛନ୍ତି। ଏହି ନିର୍ଦ୍ଦେଶନାମାକୁ ଯୋଗାଣ ବିଭାଗ ପାଳନ କରିବା ବେଳେ ଅଧିକାଂଶ ବୃଦ୍ଧାବୃଦ୍ଧ ହିତାଧିକାରୀ ଚାଉଳ ପାଇବାରୁ ବଞ୍ଚତ୍ତ ହେଉଛନ୍ତି। ଏବେ ବ୍ୟାଙ୍କ ଜମାଖାତା ନ ଥିବା ହିତାଧିକାରୀଙ୍କୁ ଚାଉଳ ବନ୍ଦ କରିବା ପାଇଁ ବଣ୍ଟନ ଦାୟିତ୍ୱରେ ଥିବା ଏଜେନ୍ସି ଖୋଲାଖୋଲି କହୁଛନ୍ତି। ଏହାକୁ ମିଶାଇଲେ ଚାଉଳ ବନ୍ଦ ହେଉଥିବା ହିତାଧିକାରୀଙ୍କ ସଂଖ୍ୟା ଆହୁରି ବଢିବ ବୋଲି ମତ ପ୍ରକାଶ ପାଇଛି।
ନିମୟାନୁଯାୟୀ, ଏହି ଯୋଜନାରେ ସାମିଲ ହିତାଧିକାରୀ ଚାଉଳ ପାଇବାରୁ ବଞ୍ଚତ୍ତ ହୋଇପାରିବେ ନାହିଁ। ଏ ନେଇ ରାଜ୍ୟ ସରକାର ହାଇକୋର୍ଟରେ ସତ୍ୟପାଠ ଦାଖଲ ବି କରିଛନ୍ତି। ଏହା ପରେ ଆଧାର, ବ୍ୟାଙ୍କ ପାସବୁକ୍, ଏକାଧିକ ସ୍ଥାନରେ ହିତାଧିକାରୀମାନଙ୍କ ନାମ ଥିବା ଆଳରେ ବହୁ ହିତାଧିକାରୀଙ୍କୁ ଚାଉଳରୁ ବଞ୍ଚତ୍ତ କରାଯାଉଛି। ଏହାଛଡା ସବୁ ସମୟରେ ଜଣେ ଯୋଗ୍ୟ ହିତାଧିକାରୀ ଯୋଜନାରେ ସାମିଲ ହେବେ ଓ ଅଯୋଗ୍ୟକୁ ଚିହ୍ନଟ କରାଯାଇ ଯୋଜନାରୁ ବାଦ୍ ଦିଆଯିବାର ନିୟମ ରହିଛି। ହେଲେ ଦୀର୍ଘ ସମୟ ଧରି ଖାଦ୍ୟ ସୁରକ୍ଷା ଯୋଜନା ସାଇଟ୍କୁ ବନ୍ଦ ରଖାଯାଇଛି।ଫଳରେ ନୂତନ ହିତାଧିକାରୀଙ୍କୁ ଖାଦ୍ୟ ସୁରକ୍ଷା ଯୋଜନାରେ ସାମିଲ କରିବା ସମ୍ଭବ ହେଉନାହିଁ, ଯାହାକି ଯୋଜନାର ଅସଲ ଉଦ୍ଦେଶ୍ୟ ପୂରଣ ହେବାରେ ବାଧା ସୃଷ୍ଟି କରୁଛି। ଏସବୁ ପରେ ସରକାର କୋର୍ଟରେ ସତ୍ୟପାଠ ଜରିଆରେ ଗୋଟିଏ କଥା କହୁଥିବା ବେଳେ ବାସ୍ତରେ କ୍ଷେତ୍ରରେ ଭିନ୍ନ କାର୍ଯ୍ୟ କରିବାକୁ ନିର୍ଦ୍ଦେଶ ଦିଆଯାଉଛି ବୋଲି ଅଭିଯୋଗ ହୋଇଛି।
ଏହି କ୍ରମରେ ଦେଖିଲେ ୨୦୧୧ ଜନଗଣନା ଅନୁସାରେ ରସୁଲପୁର ବ୍ଲକରେ ୩୬ହଜାରୁ ଊର୍ଦ୍ଧ୍ୱ ପରିବାର ଅଛନ୍ତି। ସେଥିମଧ୍ୟରୁ ୩୧,୭୭୨ ପରିବାରର ୧ଲକ୍ଷ୨୩ହଜାର୬୫୩ ବ୍ୟକ୍ତି ଜାତୀୟ ଖାଦ୍ୟ ସୁରକ୍ଷା ଯୋଜନାରେ ସାମିଲ ଅଛନ୍ତି ା ଅନ୍ତେଦ୍ୱୟ ଅନ୍ନ ଯୋଜନା ଜରିଆରେ ୪୩୪୪ ପରିବାରର, ୧୫,୨୮୬ଜଣଙ୍କୁ ଓ ରାଜ୍ୟ ଖାଦ୍ୟ ସୁରକ୍ଷା ଯୋଜନା ଜରିଆରେ୨୪୭୨ ପରିବାରର ୮,୧୬୪ଜଣଙ୍କୁୁ ଚାଉଲ ଉପଲବ୍ଧ ହେଉଛି। ତେବେ ମୋଟରେ ୪୪,୨୮୦ ପରିବାରର ୧ଲକ୍ଷ ୪୭ହଜାର୧୦୩ ପରିବାର ଏହି ଯୋଜନାରେ ସାମିଲ ହୋଇଛନ୍ତି। ଉକ୍ତ ପରିବାରର ଶତ ପ୍ରତିଶତ ଲୋକଙ୍କ ଆଧାର ସିଡିଲିଂ କରିବା ପାଇଁ ଏକ ପ୍ରକାର ବାଧ୍ୟତାମୂଳକ ବୋଲି କୁହାଯାଉଛି। ବ୍ଲକ ଯୋଗାଣ ଅଧିକାରୀଙ୍କ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ୩୧,୫୦୪ ପରିବାରର ଆଧାର କାର୍ଡ ଭାଲିଡେଶନ ହୋଇସାରିଛି ା ଅନ୍ତେଦ୍ୱୟ ଅନ୍ନ ଯୋଜନାରୁ ୩୯ଟି ପରିବାର ଓ ପିଏଚଏଚ କାର୍ଡ ପରିବାର ମଧ୍ୟରୁ ୯୮ଟି ପରିବାରକୁ ମିଶାଇ୧୩୭ଟି ପରିବାରର ଆଦୌ ଆଧାର କାର୍ଡ ନ ଥିବା ଜଣାଯାଇଛି। ଏଭଳି ମୋଟାମୋଟି ଭାବେ ଦେଖିଲେ ଏବେ ବି ୨୫୦୦ରୁ ଊର୍ଦ୍ଧ୍ୱ ପରିବାରର ଆଧାର ଭାଲିଡେଶନ ହୋଇପାରି ନାହିଁ। ଆଧାର ଭାଲିଡେଶନ ହୋଇ ପାରି ନ ଥିବାରୁ ସେମାନଙ୍କ ଚାଉଲ ବନ୍ଦ ହୋଇଯିବା ନିଶ୍ଚିତ ହୋଇଛି। ହିତାଧିକାରୀମାନେ ବିଡିଓଙ୍କଠାରୁ ଆରମ୍ଭ କରି ଜିଲାସ୍ତରୀୟ ଅଧିକାରୀଙ୍କ ନିକଟରେ ଅଭିଯୋଗ କରୁଛନ୍ତି। ହେଲେ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇ ପାରୁନାହିଁ। ବିଭାଗ ସହ ଯୋଗାଯୋଗ କରିବାରୁ ସେମାନଙ୍କୁ ଯାହା ସରକାରୀ ନିର୍ଦ୍ଦେଶ ମିଳିଛି, ସେହି ଆଧାରରେ ସେମାନେ କାମ କରୁଛନ୍ତି। ଖାଦ୍ୟ ସୁରକ୍ଷା ଯୋଜନା ସାଇଟ୍ ଖୋଲିବା ପରେ ଯାହାକିଛି ସମସ୍ୟା ସମାଧାନ ହୋଇପାରିବ ବୋଲି ବ୍ଲକ ଯୋଗାଣ ଅଧିକାରୀଙ୍କ କାର୍ଯ୍ୟାଳୟ ଆଶାପୋଷଣ କରୁଛି।
