ନୂଆଦିଲ୍ଲୀ/କାଇଭ୍, ୩୧।୧ : ପୁଣି ଥରେ ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ପରିସ୍ଥିତି ସୃଷ୍ଟି ହୋଇଛି। ଏନେଇ ୟୁକ୍ରେନରେ ଅଧ୍ୟୟନ କରୁଥିବା ୧୮ ହଜାରରୁ ଅଧିକ ଭାରତୀୟ ଛାତ୍ରୀଛାତ୍ରଙ୍କ ସୁରକ୍ଷା ନେଇ ସରକାରଙ୍କ ଚିନ୍ତା ବଢ଼ିବାରେ ଲାଗିଛି। ପରିସ୍ଥିତିକୁ ନିରନ୍ତର ନଜରରେ ରଖି ଭାରତ ସରକାର କହିଛନ୍ତି ଯେ, ଅଧିକାଂଶ ଭାରତୀୟ ଛାତ୍ରୀଛାତ୍ର ୟୁକ୍ରେନ୍ରେ ମେଡିସିନ ଏବଂ ଇଞ୍ଜିନିୟରିଂ ପଢୁଛନ୍ତି। ଏଭଳି ପରିସ୍ଥିତିରେ ଭାରତ ସେଠାରେ ରହୁଥିବା ନାଗରିକମାନଙ୍କୁ କାଇଭ୍ରେ ଥିବା ଭାରତୀୟ ଦୂତାବାସରେ ପଞ୍ଜିକୃତ କରିବାକୁ କହିଛି, ଯାହାଫଳରେ ଆବଶ୍ୟକ ହେଲେ ସେମାନଙ୍କୁ ଶୀଘ୍ର ସାହାଯ୍ୟ କରାଯାଇପାରିବ।
ଏଠାରେ ହୁଏତ କେତେକଙ୍କ ମନରେ ପ୍ରଶ୍ନ ଉଙ୍କି ମାରିବା ସ୍ବାଭାବିକ ଯେ ୟୁକ୍ରେନରେ ଅସ୍ଥିରତା ସତ୍ତ୍ୱେ ମଧ୍ୟ ବହୁ ସଂଖ୍ୟକ ଭାରତୀୟ ଛାତ୍ରୀଛାତ୍ର ସେଠାକୁ ଯାଆନ୍ତି କାହିଁକି? ଏବେ ମଧ୍ୟ ଭାରତ ଭଳି ଦେଶରେ ଏମବିବିଏସ୍ ଡିଗ୍ରୀ ଭଲ ରୋଜଗାରର ଗ୍ୟାରେଣ୍ଟି ପ୍ରଦାନ କରିଥାଏ। ଭାରତରେ କେବଳ ୮୮ ହଜାର ଏମବିବିଏସ୍ ସିଟ ଅଛି। କିନ୍ତୁ ୨୦୨୧ ରେ ମେଡିକାଲ ପ୍ରବେଶିକା ପରୀକ୍ଷା, ଏନ୍ ଇଇଟି ରେ ୮ ଲକ୍ଷରୁ ଅଧିକ ପ୍ରାର୍ଥୀ ପରୀକ୍ଷା ଦେଇଥିଲେ। ତେଣୁ ଭାରତରେ ୭ ଲକ୍ଷରୁ ଅଧିକ ଛାତ୍ରୀଛାତ୍ରଙ୍କ ଡାକ୍ତର ହେବାର ସ୍ବପ୍ନ ପ୍ରତିବର୍ଷ ପୂରଣ ହୋଇ ପାରି ନଥାଏ। ଡାକ୍ତର ହେବାର ସ୍ବପ୍ନକୁ ସାକାର କରିବା ପାଇଁ ପ୍ରତିବର୍ଷ ହଜାର ହଜାର ଭାରତୀୟ ଛାତ୍ରୀଛାତ୍ର ୟୁକ୍ରେନ ଏବଂ ଅନ୍ୟ ଦେଶକୁ ପାଠ ପଢ଼ିବାକୁ ଯାଇଥାନ୍ତି।
ଏହାର ଅନ୍ୟ ଏକ କାରଣ ହେଉଛି ଭାରତରେ ଘରୋଇ ମେଡିକାଲ କଲେଜଗୁଡ଼ିକରେ ଡାକ୍ତରୀ ଶିକ୍ଷାର ମୂଲ୍ୟ ମଧ୍ୟ ବହୁତ ମହଙ୍ଗା। ଦେଶର ଏକ ଘରୋଇ ମେଡିକାଲ କଲେଜରେ ପଢ଼ିିବା ପାଇଁ ପ୍ରାୟ ଏକ କୋଟି ଟଙ୍କାର ଖର୍ଚ୍ଚ ହୋଇଥାଏ। ତେବେ ୟୁକ୍ରେନ ପରି ଦେଶରେ ଡାକ୍ତରୀ ଶିକ୍ଷା ମାତ୍ର ୨୫ ଲକ୍ଷ ଟଙ୍କାରେ ହୋଇ ପାରିଥାଏ।
ଏହି କାରଣରୁ ବହୁ ଛାତ୍ରୀଛାତ୍ର ୟୁକ୍ରେନ ଏବଂ ଅନ୍ୟ ଦେଶକୁ ଡାକ୍ତରୀ ପଢ଼ିବା ହେବା ପାଇଁ ଯାଇଥାନ୍ତି। ମେଡିକାଲ ଏବଂ ଇଞ୍ଜିନିୟରିଂ ପରି କ୍ଷେତ୍ରରେ ଶସ୍ତା ଅଧ୍ୟୟନ ଖର୍ଚ୍ଚ ଯୋଗୁ ଭାରତୀୟ ଛାତ୍ରୀଛାତ୍ରମାନଙ୍କ ପାଇଁ ୟୁକ୍ରେନ ଏବଂ ଅନ୍ୟ ଦେଶକୁ ଯିବା ଏକ ପ୍ରମୁଖ କାରଣ। ଆମେରିକାରେ ଡାକ୍ତରୀ ଶିକ୍ଷା ଖର୍ଚ୍ଚ ପ୍ରାୟ ସାତରୁ ଆଠ କୋଟି ଟଙ୍କା। ସେହିପରି ବ୍ରିଟେନ୍,ନ୍ୟୁଜିଲାଣ୍ଡ୍, କାନାଡ଼ା ଏବଂ ଅଷ୍ଟ୍ରେଲିଆରେ ଏହା ୪ କୋଟି ଟଙ୍କା ରହିଛି। ଅପରପକ୍ଷରେ ରୁଷିଆ, ୟୁକ୍ରେନ, ନେପାଳ, ଚାଇନା, ଫିଲିପାଇନ୍ସ ଏବଂ ବାଂଲାଦେଶରେ ଅଧ୍ୟୟନ ଖର୍ଚ୍ଚ ଏହାର ପ୍ରାୟ ଏକ ଚତୁର୍ଥାଂଶ।
ୟୁକ୍ରେନ ପରି ଦେଶରୁ ଡାକ୍ତରୀ ଅଧ୍ୟୟନ କରିବା ପରେ ଫେରୁଥିବା ଛାତ୍ରୀଛାତ୍ରମାନଙ୍କ ପାଇଁ ତୁରନ୍ତ ଭାରତରେ ଅଭ୍ୟାସ କରିବା କଷ୍ଟକର। ବିଦେଶରେ ଡାକ୍ତରୀ ଅଧ୍ୟୟନ ସମାପ୍ତ କରିବା ପରେ ଭାରତକୁ ଫେରୁଥିବା ମେଡିକାଲ ଛାତ୍ରମାନଙ୍କୁ ବିଦେଶୀ ମେଡିକାଲ ଗ୍ରାଜୁଏଟ୍ସ ପରୀକ୍ଷା (ଏଫ୍ଏମ୍ଜିଇ) ଦୋବକଊ ପଡ଼ିଥାଏ। ଏହା ଅତ୍ୟନ୍ତ କଠିନ ପରୀକ୍ଷା ଏବଂ ଏହାକୁ ପାଶ କରିବା ସହଜ ନୁହେଁ ।
ଏଥିପାଇଁ ଅନେକ ଛାତ୍ର କୋଚିଂ ମଧ୍ୟ ନିଅନ୍ତି, କାରଣ ଏହି ପରୀକ୍ଷାରେ ଉତ୍ତୀର୍ଣ୍ଣ ନହୋଇ ସେମାନେ ଭାରତରେ ଚିକିତ୍ସା ଅଭ୍ୟାସ କରିପାରିବେ ନାହିଁ। ଏପରିକି ସେମାନେ ଲାଇସେନ୍ସ ପାଇବେ ନାହିଁ। ପରିସଂଖ୍ୟାନ ଏହା ମଧ୍ୟ ଦର୍ଶାଏ ଯେ ବିଦେଶରୁ ଆସୁଥିବା କେବଳ ୧୫ ପ୍ରତିଶତ ଛାତ୍ରୀଛାତ୍ର ଏଫଏମଜିଇ ପରୀକ୍ଷା କ୍ଲିୟର କରିବାକୁ ସକ୍ଷମ ହୋଇଥାନ୍ତି। ମାତ୍ର ୭୫ ପ୍ରତିଶତ ଅସଫଳ ହୋଇଥାନ୍ତି।
