ନୂଆଦିଲ୍ଲୀ,୧ା୧୧: ୨୦୨୨ରେ ଭାରତର ସଡ଼କଗୁଡ଼ିକ ଉପରେ ମୋଟ ୪,୬୧,୩୧୨ ଦୁର୍ଘଟଣା ଘଟିଥିଲା। ସେଥିରେ ୧,୬୮,୪୯୧ ଜଣଙ୍କ ମୃତ୍ୟୁ ଘଟିଥିବାବେଳେ ୪,୪୩,୩୬୬ ଆହତ ହୋଇଥିଲେ। କେନ୍ଦ୍ର ସରକାର ମଙ୍ଗଳବାର ଜାରି କରିଥିବା ‘ରୋଡ୍ ଆକ୍ସିଡେଣ୍ଟ୍ସ ଇନ୍ ଇଣ୍ଡିଆ-୨୦୨୨’ ରିପୋର୍ଟରେ ଏହି ଉଦ୍ବେଗଜନକ ତଥ୍ୟ ଉଲ୍ଲେଖ କରାଯାଇଛି।
ପରିବହନ ଓ ରାଜପଥ ମନ୍ତ୍ରଣାଳୟ ଅନୁସାରେ ଗତବର୍ଷ ଦେଶରେ ଦୁର୍ଘଟଣା ୧୧.୯% ଏବଂ ତଦ୍ଜନିତ ମୃତ୍ୟୁ ୯.୪% ବୃଦ୍ଧି ପାଇଥିଲା। ସେହିପରି ଆହତଙ୍କ ସଂଖ୍ୟା ପୂର୍ବବର୍ଷ ତୁଳନାରେ ୧୫.୩% ବଢ଼ିଥିଲା। ୪,୬୧,୩୧୨ ଦୁର୍ଘଟଣା ମଧ୍ୟରୁ ୧,୫୧,୯୯୭ଟି (୩୨.୯%) କେବଳ ଜାତୀୟ ରାଜପଥ ଏବଂ ଏକ୍ସପ୍ରେସ୍ଓ୍ବେଗୁଡ଼ିକରେ ଘଟିଥିଲା। ସେହିପରି ୧,୦୬,୬୮୨ଟି (୨୩.୧%) ଦୁର୍ଘଟଣା ରାଜ୍ୟ ରାଜପଥରେ ଘଟିଥିବାବେଳେ ୨,୦୨,୬୩୩ଟି (୪୩.୯୫) ଗ୍ରାମାଞ୍ଚଳ ଓ ଅନ୍ୟ ରାସ୍ତାଗୁଡ଼ିକ ଉପରେ ଘଟିଥିଲା। ମୋଟ ୧,୬୮,୪୯୧ ମୃତକଙ୍କ ମଧ୍ୟରୁ ୬୧,୦୩୮ ଜଣ (୩୬.୨%) ଜାତୀୟ ରାଜପଥରେ ଦୁର୍ଘଟଣାର ଶିକାର ହୋଇ ପ୍ରାଣ ହରାଇଥିଲେ। ଅନୁରୂପ ଭାବେ ରାଜ୍ୟ ରାଜପଥଗୁଡ଼ିକରେ ୪୧,୦୧୨ ଜଣ (୨୪.୩%) ଏବଂ ଅନ୍ୟ ରାସ୍ତା ଉପରେ ୬୬,୪୪୧ ଜଣ ବା ୩୯.୪ ପ୍ରତିଶତଙ୍କ ଜୀବନ ଯାଇଥିଲା।
ରିପୋର୍ଟରେ ଆହୁରି ଦର୍ଶାଯାଇଛି ଯେ, ସଡ଼କ ଦୁର୍ଘଟଣାର ମୃତକଙ୍କ ମଧ୍ୟରୁ ସର୍ବାଧିକ ହେଉଛନ୍ତି ଯୁବଗୋଷ୍ଠୀ। ୨୦୨୨ରେ ଦୁର୍ଘଟଣାର ଶିକାର ହୋଇ ପ୍ରାଣ ହରାଇଥିବା ମୋଟ ମୃତକଙ୍କ ମଧ୍ୟରୁ ୬୬.୫% ଥିଲେ ୧୮ରୁ ୪୫ ବର୍ଷ ବୟସ୍କ। ୮୩.୪ ପ୍ରତିଶତ ଥିଲେ କାର୍ଯ୍ୟକ୍ଷମ ଥିବା ବୟସ (୧୮-୬୦)ର। ପ୍ରାୟ ୬୮% ସଡ଼କ ଦୁର୍ଘଟଣାଜନିତ ମୃତ୍ୟୁ ଗ୍ରାମାଞ୍ଚଳରେ ଘଟିଥିବାବେଳେ ସହରାଞ୍ଚଳରେ ୩୨% ଘଟିଥିଲା। ମନ୍ତ୍ରଣାଳୟର ରିପୋର୍ଟ ଅନୁସାରେ ଦୁର୍ଘଟଣାଗ୍ରସ୍ତ ହେଉଥିବା ଯାନବାହନଗୁଡ଼ିକ ମଧ୍ୟରୁ ସର୍ବାଧିକ ୨ ଚକିଆ ବା ବାଇକ୍। କାର୍, ଜିପ୍ ଓ ଟ୍ୟାକ୍ସି ଭଳି ଲାଇଟ୍ ଭେହିକିଲ୍ଗୁଡ଼ିକର ମୋଟ ଦୁର୍ଘଟଣା ଦ୍ୱିତୀୟରେ ଆସୁଛି। ଦୁଇଚକିଆ ଯାନ ଆରୋହୀ ସର୍ବାଧିକ ୪୪.୫% ଦୁର୍ଘଟଣାରେ ପଡ଼ି ପ୍ରାଣ ହରାଇଥିଲେ। ରାସ୍ତାରେ ଯିବାବେଳେ ୧୯.୫% ପଥଚାରୀ ଦୁର୍ଘଟଣାର ଶିକାର ହୋଇ ଜୀବନ ହାରିଥିଲେ। ଜାତୀୟ ରାଜପଥ ଦୁର୍ଘଟଣାଗୁଡ଼ିକୁ ଅନୁଧ୍ୟାନ କଲେ ତାମିଲନାଡୁରେ ସର୍ବାଧିକ ୬୪,୧୦୫ (୧୩.୯%) ଓ ମଧ୍ୟପ୍ରଦେଶରେ ୫୪,୪୩୨ (୧୧.୮%) ଘଟିଥିଲା। ମୃତକମାନଙ୍କ ମଧ୍ୟରୁ ସର୍ବାଧିକ ଉତ୍ତର ପ୍ରଦେଶର। ଏହି ରାଜ୍ୟର ୨୨,୫୯୫ ଜଣ (୧୩.୪%) ଏବଂ ତାମିଲନାଡୁର ୧୭.୮୮୪ ଜଣ (୧୦.୬%)ଙ୍କର ଗତବର୍ଷ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପୋଲିସ ବିଭାଗ ପକ୍ଷରୁ ପ୍ରଦତ୍ତ ତଥ୍ୟାନୁସାରେ ଏହି ରିପୋର୍ଟ ପ୍ରସ୍ତୁତ କରାଯାଇଥିବା ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ପକ୍ଷରୁ ଜାରି ଉକ୍ତ ରିପୋର୍ଟରେ ସ୍ପଷ୍ଟ କରାଯାଇଛି।
