ନୂଆଦିଲ୍ଲୀ,୧୦।୭ (ପି.ଟି.): ଦେଶର ବିଭିନ୍ନ ପ୍ରାନ୍ତରେ ଗୁରୁବାର ପ୍ରବଳ ମୌସୁମୀ ବର୍ଷା ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି। ଫଳରେ ରାସ୍ତାଘାଟ ବୁଡ଼ିଯିବା ସହ ଗଛ ଉପୁଡ଼ିବା, ସମ୍ପତ୍ତି ନଷ୍ଟ ହେବା ଏବଂ ଜନଜୀବନ ବାଧାପ୍ରାପ୍ତ ହୋଇଛି। ପ୍ରଶାସନ ପରିସ୍ଥିତିକୁ ସ୍ବାଭାବିକ କରିବା ପାଇଁ ଉଦ୍ୟମ ଜାରି ରଖିଛି। ଅନେକ ସହରରେ ରାସ୍ତା ଓ ଆବାସିକ ଅଞ୍ଚଳ ଜଳମଗ୍ନ ହୋଇରହିଛି। ଯାତ୍ରୀମାନେ ଆଣ୍ଠୁଏ ପାଣିରେ ପଶି ଯାତାୟାତ କରୁଥିବା ବେଳେ ମୁଖ୍ୟ ରାସ୍ତା ଏବଂ ଜାତୀୟ ରାଜପଥରେ ଗାଡ଼ିଗୁଡ଼ିକ ଧିମା ଗତିରେ ଚାଲୁଥିବା ଦେଖିବାକୁ ମିଳିଛି।
ପ୍ରବଳ ବର୍ଷା ଯୋଗୁଁ ଅଳିଆଗଦା ଭୁଶୁଡ଼ି ପଡ଼ିବା ପରେ ମହାରାଷ୍ଟ୍ରର ପୁଣେ ନିକଟସ୍ଥ ପିମ୍ପରି ଚିଞ୍ଚୱାଡ଼ରେ ଥିବା ଏକ ବର୍ଜ୍ୟବସ୍ତୁରୁ ଶକ୍ତି ଉତ୍ପାଦନ କରୁଥିବା (ୱେଷ୍ଟ-ଟୁ-ଏନର୍ଜି) ପ୍ଲାଣ୍ଟ କାର୍ଯ୍ୟ ବାଧାପ୍ରାପ୍ତ ହୋଇଛି। ଭୁଶୁଡ଼ି ପଡ଼ିଥିବା ଏକ ବିଲ୍ଡିଂସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଗୁରୁବାର ଜଣଙ୍କର ମୃତଦେହ ଉଦ୍ଧାର କରାଯାଇଥିବା ବେଳେ ପ୍ରାୟ ୮ ଜଣ ଏବେ ବି ଭଗ୍ନାବଶେଷ ତଳେ ଚାପି ହୋଇ ରହିଥିବା ଆଶଙ୍କା କରାଯାଉଛି। ବର୍ତ୍ତମାନ ସୁଦ୍ଧା ୯ ଜଣଙ୍କୁ ଉଦ୍ଧାର କରାଯାଇଛି।
ଦିଲ୍ଲୀରେ ଚଳିତ ବର୍ଷା ଋତୁର ସବୁଠାରୁ ପ୍ରବଳ ବର୍ଷା ଦେଖିବାକୁ ମିଳିଛି। ଏଥିଯୋଗୁ ବ୍ୟାପକ ଅଞ୍ଚଳ ଜଳବନ୍ଦୀ ହୋଇ ରହିଛି। ଗଛ ଉପୁଡ଼ିବା ଏବଂ ଟ୍ରାଫିକ୍ ସମସ୍ୟା ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପକ୍ଷରୁ ‘ରେଡ୍’ ଆଲର୍ଟ ମଧ୍ୟ ଜାରି କରାଯାଇଛି। ଏହି ସମୟ ମଧ୍ୟରେ ଉତ୍ତର-ପୂର୍ବ ଦିଲ୍ଲୀର ଖଜୁରି ଅନ୍ତର୍ଗତ ତୁଖମୀରପୁରରେ ସବୁଠାରୁ ଅଧିକ ୧୬୦ ମିମି ବର୍ଷା ହୋଇଛି। ମୁଖ୍ୟମନ୍ତ୍ରୀ ରେଖା ଗୁପ୍ତା ନିଜ ନିର୍ବାଚନମଣ୍ଡଳୀର ଶାଲିମାର ଭିଲେଜରେ ଜଳ ନିଷ୍କାସନ ବ୍ୟବସ୍ଥାର ସମୀକ୍ଷା କରିଛନ୍ତି ଏବଂ ଉପଯୁକ୍ତ ଜଳ ନିଷ୍କାସନ ନିଶ୍ଚିତ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ପଡ଼ୋଶୀ ଗୁରୁଗ୍ରାମରେ ବର୍ଷାଭିଜା ଗୁରୁବାର ସକାଳେ ଏକ ବିଳାସପୂର୍ଣ୍ଣ ଆପାର୍ଟମେଣ୍ଟ କମ୍ପ୍ଲେକ୍ସର ବାଲକୋନିର ଏକ ଅଂଶ ଭୁଶୁଡ଼ି ପଡ଼ିଥିଲା। ହେଲେ ଏଥିରେ କେହି ଆହତ ହୋଇନାହାନ୍ତି। ବାସିନ୍ଦାମାନେ ବିଲ୍ଡରଙ୍କ ଅବହେଳାକୁ ଦାୟୀ କରିଛନ୍ତି ଏବଂ ସମ୍ପୂର୍ଣ୍ଣ ହାଉସିଂ ପ୍ରକଳ୍ପର ଗଠନମୂଳକ ଯାଞ୍ଚ ପାଇଁ ଦାବି କରିଛନ୍ତି।
ରାଜସ୍ଥାନରେ ବ୍ୟାପକ ବର୍ଷା ଯୋଗୁ ରାଜ୍ୟର ଅନେକ ଅଞ୍ଚଳ ବୁଡ଼ି ରହିଛି। ପାଣିପାଗ ବିଭାଗ ଗୁରୁବାର କୋଟା ଏବଂ ଭରତପୁର ଡିଭିଜନର କେତେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷାର ପୂର୍ବାନୁମାନ କରିଛି। କେରଳର କେତେକ ସ୍ଥାନରେ ପ୍ରବଳ ବର୍ଷା ଜାରି ରହିଥିବାରୁ ଆଇଏମ୍ଡି ଗୁରୁବାର ରାଜ୍ୟର ୩ଟି ଜିଲ୍ଲା ପାଇଁ ‘ଅରେଞ୍ଜ’ ଆଲର୍ଟ ଜାରି କରିଛି। ୱାୟନାଡ ଭୂସ୍ଖଳନରେ ବିପର୍ଯ୍ୟୟ ସ୍ଥଳରୁ ଆଉ ଦୁଇଟି ମୃତଦେହ ଉଦ୍ଧାର ହେବା ପରେ ମୃତ୍ୟୁସଂଖ୍ୟା ୫କୁ ବୃଦ୍ଧି ପାଇଛି, ଯଦିଓ ଏବେ ବି ୩ ଜଣ ନିଖୋଜ ଅଛନ୍ତି। ସୂଚନାଯୋଗ୍ୟ, ଜୁଲାଇ ୭ରେ ଅନାକ୍କାମ୍ପୋୟିଲ-ମେପ୍ପାଡି ଟନେଲ୍ ପ୍ରକଳ୍ପ ସ୍ଥଳରେ ଏହି ଭୂସ୍ଖଳନ ହୋଇଥିଲା, ଯାହା ୱାୟନାଡ ଏବଂ କୋଝିକୋଡ୍ ଜିଲ୍ଲା ମଧ୍ୟରେ ଯୋଗାଯୋଗକୁ ସୁଧାରିବା ପାଇଁ ନିର୍ମାଣ କରାଯାଉଛି।