ବଲାଙ୍ଗୀର,୧୪ା୧୨(ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର ଜିଲା ଆଗଲପୁର ବ୍ଳକ ବିନ୍ଧାପାଲି ଗାଁର ସରୋଜ ସାହୁଙ୍କ ଘରେ ପ୍ରାୟ ୯ ମାସ ତଳେ ଏକ ଶିଶୁକନ୍ୟା ଜନ୍ମ ହୋଇଥିଲା। ଉକ୍ତ ଶିଶୁକନ୍ୟା ଆରତୀ (୯ମାସ)ଙ୍କ ଖାଦ୍ୟନଳୀ ନଥିବା ଜଣାପଡିବା ପରେ ତାଙ୍କୁ କଟକ ବଡ ଡାକ୍ତରଖାନାକୁ ନିଆଯାଇଥିଲା। ସେଠାରେ ଏକ କୃତ୍ରିମ ଖାଦ୍ୟନଳୀ ଲଗାଯାଇ ତାଙ୍କ ଜୀବନ ବଞ୍ଚାଯାଇଥିଲା। ତେବେ କୃତ୍ରିମ ଖାଦ୍ୟନଳୀଟି ଶରୀର ବାହାରେ ଲଗାଯାଇଛି। ଶିଶୁକନ୍ୟାକୁ ବଞ୍ଚାଇବାକୁ ହେଲେ ଆଉ ଏକ ଅସ୍ତ୍ରୋପଚାରର ଆବଶ୍ୟକତା ରହିଛି ବୋଲି ଡାକ୍ତରମାନେ କହିଥିଲେ। ଶିଶୁକନ୍ୟାକୁ ୧୨ ମାସ ହେଲା ପରେ ଅସ୍ତ୍ରୋପଚାର କରାଯାଇ ଶରୀରରେ କୃତ୍ରିମ ଖାଦ୍ୟନଳୀକୁ ପ୍ରତିରୋପଣ କରାଯିବ। ତେବେ ଶରୀରରେ କୃତ୍ରିମ ଖାଦ୍ୟନଳୀ ପ୍ରତିରୋପଣ ପର୍ଯ୍ୟନ୍ତ ପ୍ରତି ସପ୍ତାହରେ ଲଗାଯାଇଥିବା ଖାଦ୍ୟନଳୀକୁ ସଫା କରାଯିବ ଓ ପ୍ରତି ମାସରେ କଟକସ୍ଥିତ ଶିଶୁଭବନକୁ ଆସିବାକୁ ପଡ଼ିବ ବୋଲି ସେଠାକାର ବିଶେଷଜ୍ଞ ଡାକ୍ତରମାନେ ପରାମର୍ଶ ଦେଇଛନ୍ତି। ତେବେ ଦିନ ମଜୁରିଆ ଭାବେ କାମ କରି ପରିବାର ପ୍ରତିପୋଷଣ କରୁଥିବା ସରୋଜ ନିଜ ଝିଅକୁ କଟକ ୬ ଥର ନେବା ପରେ ଅର୍ଥାଭାବରୁ ଆଉ ନେଇ ପାରି ନ ଥିଲେ। ଏହା ଜାଣିବା ପରେ ଆଗଲପୁର ମାହେଶ୍ୱରୀ ସଙ୍ଗଠନ ସ୍ବେଚ୍ଛାସେବୀ ସନ୍ୟାସୀ ମେହେର ଓ ଅନ୍ୟ ସଦସ୍ୟ ସରୋଜଙ୍କ ଝିଅକୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲ ଆଣି ଚିକିତ୍ସା କରାଉଛନ୍ତି। ଇତିମଧ୍ୟରେ ସରୋଜ ମଧ୍ୟ ବହୁ ଧାର ଉଧାର କରି ଋଣଗ୍ରସ୍ତ ବି ହୋଇଯାଇଛନ୍ତି। ଝିଅର ବିରଳ ଅସ୍ତ୍ରୋପଚାର ପାଇଁ ଆଉ ୩ ମାସ ସମୟ ରହିଛି। ଏଥିପାଇଁ ଅର୍ଥ ପ୍ରତିବନ୍ଧକ ସାଜିଛି। ଝିଅର ଚିକିତ୍ସା କରି ଏଇ ଦମ୍ପତି ସର୍ବସ୍ବାନ୍ତ ହୋଇପଡିଛନ୍ତି। ଆଗକୁ ଚିକିତ୍ସା କରିବାକୁ ପାଖରେ ଅର୍ଥ ନାହିଁ। ଏଣୁ ମୁଖ୍ୟମନ୍ତ୍ରୀଙ୍କ ସହାୟତା ଲୋଡିଛନ୍ତି ଏଇ ଗରିବ ଦମ୍ପତି। ଝିଅର ଅସ୍ତ୍ରୋପଚାର ପାଇଁ ସବୁ ପ୍ରକାର ସହାୟତା ପ୍ରଦାନ କରିବାକୁ ସାହୁ ଦମ୍ପତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଆକୁଳ ନିବେଦନ କରିଛନ୍ତି।
