ନୂଆଦିଲ୍ଲୀ, ୨୨।୯ : ଆରଏସଏସ ମୁଖ୍ୟ ମୋହନ ଭାଗଓ୍ବତ ଗୁରୁବାର ଦିଲ୍ଲୀରେ ଅଲ ଇଣ୍ଡିଆ ଇମାମ ସଂଗଠନର ମୁଖ୍ୟ ଇମାମ ଡ. ଇମାମ ଉମର ଅହମ୍ମଦ ଇଲିଆସିଙ୍କୁ ଭେଟିଛନ୍ତି। ଏହାପୂର୍ବରୁ ଭାଗଓ୍ବତଙ୍କୁ ପୂର୍ବତନ ମୁଖ୍ୟ ନିର୍ବାଚନ କମିଶନର ଏସ.ୟୁ କୁରେଶି ଏବଂ ଦିଲ୍ଲୀର ପୂର୍ବତନ ଉପରାଜ୍ୟପାଳ ନଜୀବ ଜଙ୍ଗ, ଜାମିରୁଦ୍ଦିନ ଶାହା, ସୟଦ ଶେରୱାନି ଏବଂ ସହିଦ ସିଦ୍ଦିକି ଙ୍କ ସମେତ କେତେକ ମୁସଲିମ ବୁଦ୍ଧିଜୀବୀମାନେ ଭେଟିଥିଲେ।
ମୁଖ୍ୟ ଇମାମ ଇଲିଆସିଙ୍କୁ ଭେଟିବା ପାଇଁ ଭାଗଓ୍ବତ ଦିଲ୍ଲୀର କସ୍ତୁରବା ଗାନ୍ଧୀ ମାର୍ଗ ମସଜିଦ ଠାରେ ତାଙ୍କ କାର୍ଯ୍ୟାଳୟରେ ପହଞ୍ଚିଥିଲେ। ନିକଟରେ ଆରଏସଏସ ମୁସଲମାନମାନଙ୍କ ସହ ଯୋଗାଯୋଗ ବୃଦ୍ଧି କରିଛି ଏବଂ ଭାଗଓ୍ବତ ସମ୍ପ୍ରଦାୟର ନେତାଙ୍କ ସହ କେତେକ ବୈଠକ ମଧ୍ୟ କରିଛନ୍ତି। ଆରଏସଏସ ମୁସଲମାନଙ୍କ ନିକଟତର ହେଉଥିବା ନେଇ ଚର୍ଚ୍ଚା ଆରମ୍ଭ ହୋଇଛି।
ପୂର୍ବତନ ଭାଜପା ସଂଗଠନର ସାଧାରଣ ସମ୍ପାଦକ ରାମଲାଲଙ୍କ ଉଦ୍ୟମରେ ଅନୁଷ୍ଠିତ ଏହି ବୈଠକରେ ଦୁଇ ସମ୍ପ୍ରଦାୟ ମଧ୍ୟରେ ମତଭେଦ ହ୍ରାସ ପାଇଁ ସମ୍ଭାବ୍ୟ ପଦକ୍ଷେପ ଉପରେ ମଧ୍ୟ ଆଲୋଚନା କରାଯାଇଥିଲା।
ଏହାପୂର୍ବରୁ ମୁସଲମାନମାନଙ୍କର ଏକ ସଂଗଠନ ଜାମିଆତ-ଉଲେମା-ଇ-ହିନ୍ଦ ନେତା ମୌଲାନା ଅର୍ଶଦ ମଦାନୀ ମଧ୍ୟ ଦିଲ୍ଲୀର ଝଣ୍ଡେୱାଲାନର ସଂଘ ମୁଖ୍ୟାଳୟରେ ପହଞ୍ଚି ୩୦ ଅଗଷ୍ଟ ୨୦୧୯ ରେ ଭାଗଓ୍ବତଙ୍କୁ ଭେଟିଥିଲେ। ମୁସଲିମ ରାଷ୍ଟ୍ରିୟ ମଞ୍ଚ ନେତା ଇନ୍ଦ୍ରଶ କୁମାରଙ୍କ ଉଦ୍ୟମରେ ଅନୁଷ୍ଠିତ ଏହି ବୈଠକରେ ମଧ୍ୟ ବହୁ ଆଲୋଚନା କରାଯାଇଥିଲା। ୯ ନଭେମ୍ବର ୨୦୧୯ରେ ଅଯୋଧ୍ୟାରେ ରାମ ମନ୍ଦିର ଉପରେ ସୁପ୍ରିମକୋର୍ଟଙ୍କ ରାୟ ଆସିବା ପୂର୍ବରୁ ଉଭୟ ସମ୍ପ୍ରଦାୟରେ ଶାନ୍ତି ବଜାୟ ରଖିବା ଦୃଷ୍ଟିକୋଣରୁ ଦୁଇ ବରିଷ୍ଠ ନେତାଙ୍କ ଏହି ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିବେଚନା କରାଯାଇଥିଲା।
ଆଗାମୀ ଦିନରେ କଶ୍ମୀରର କିଛି ମୁସଲମାନ ନେତାଙ୍କୁ ମଧ୍ୟ ଭାଗଓ୍ବତ ଭେଟି ପାରନ୍ତି ବୋଲି ଏକ ଆଲୋଚନା ହେଉଛି। କଶ୍ମୀରରେ ନିର୍ବାଚନ ରାଜନୀତି ଆରମ୍ଭ ହେବା ପରେ ଉପତ୍ୟକାରେ ଶାନ୍ତି ବଜାୟ ରଖିବା ଦୃଷ୍ଟିରୁ ଏହା ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଏହି ନେତାମାନେ କଶ୍ମୀର ବିଚ୍ଛିନ୍ନତାବାଦୀ ନେତାମାନଙ୍କୁ ଉପତ୍ୟକାରେ ପୁନର୍ବାର ସକ୍ରିୟ ନହେବା ଏବଂ କଶ୍ମୀରୀ ଯୁବବର୍ଗମାନଙ୍କୁ ନୂତନ ଭାରତ ସହିତ ଯୋଡିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି ଚର୍ଚ୍ଚା ହେଉଛି।
