ନୂଆଦିଲ୍ଲୀ,୫।୮: ଭାରତୀୟ ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀ ପୁଣି ଥରେ ଚର୍ଚ୍ଚାରେ ଆସିଛନ୍ତି। ଏଥର ତାଙ୍କ ପ୍ରଦର୍ଶନ ଅପେକ୍ଷା ଅନ୍ତର୍ଜାତିକ କ୍ରିକେଟରେ ଡେବ୍ୟୁକୁ ନେଇ ଅଧିକ ଚର୍ଚ୍ଚା ହେଉଛି। ଭାରତର ପୂର୍ବତନ କ୍ରିକେଟର ମହମ୍ମଦ କୈଫଙ୍କ ମତରେ, ଟିମ ମ୍ୟାନେଜମେଣ୍ଟ ଯୁବ ବ୍ୟାଟରଙ୍କ କ୍ଷେତ୍ରରେ ତରବରିଆ ଏବଂ ଭୁଲ ରଣନୀତି ଅପଣାଇଥିଲା। ତାଙ୍କ କହିବା ଅନୁସାରେ, ବୈଭବଙ୍କୁ ପ୍ରଥମେ ଆୟରଲ୍ୟାଣ୍ଡ ଗସ୍ତରେ ଡେବ୍ୟୁ କରାଯିବା ଉଚିତ୍ ଥିଲା, ଯାହାଦ୍ୱାରା ସେ କମ ଚାପରେ ଆନ୍ତର୍ଜାତିକ କ୍ରିକେଟର ପରିବେଶ ସହ ନିଜକୁ ଖାପ ଖୁଆଇ ପାରିଥାନ୍ତେ।
ବୈଭବ ଆଇପିଏଲ ୨୦୨୬ରେ ଦମଦାର ବ୍ୟାଟିଂ କରି ଅରେଞ୍ଜ କ୍ୟାପ ଜିତିଥିଲେ। ସମଗ୍ର ସିଜନରେ ସେ କ୍ରମାଗତ ଭାବେ ରନ ସଂଗ୍ରହ କରିବା ସହ ନିଜର ବିସ୍ଫୋରକ ବ୍ୟାଟିଂରେ ସମସ୍ତଙ୍କୁ ପ୍ରଭାବିତ କରିଥିଲେ। ଏହି ପ୍ରଦର୍ଶନ ଆଧାରରେ ତାଙ୍କୁ ଆୟରଲ୍ୟାଣ୍ଡ ଓ ଇଂଲଣ୍ଡ ଗସ୍ତ ପାଇଁ ଭାରତୀୟ ଟି-୨୦ ଦଳରେ ସ୍ଥାନ ମିଳିଥିଲା।
ତେବେ ଆୟରଲ୍ୟାଣ୍ଡ ଗସ୍ତରେ ତାଙ୍କୁ ଗୋଟିଏ ବି ମ୍ୟାଚ ଖେଳିବାର ସୁଯୋଗ ମିଳିନଥିଲା। ପରେ ଇଂଲଣ୍ଡ ଗସ୍ତରେ ସଞ୍ଜୁ ସାମସନଙ୍କ ଖରାପ ପ୍ରଦର୍ଶନ ପରେ ବୈଭବଙ୍କୁ ଡେବ୍ୟୁ କରାଯାଇଥିଲା। କିନ୍ତୁ ଇଂଲଣ୍ଡର ଶକ୍ତିଶାଳୀ ବୋଲିଂ ଆକ୍ରମଣ ସମ୍ମୁଖରେ ସେ ବଡ଼ ଇନିଂସ ଖେଳିପାରିନଥିଲେ ଏବଂ ତିନୋଟି ମ୍ୟାଚରେ ଯଥାକ୍ରମେ ୧୪, ୧୩ ଓ ୧୫ ରନ କରିଥିଲେ। ଏହାପରେ ତାଙ୍କୁ ଶେଷ ମ୍ୟାଚରୁ ବାଦ ଦିଆଯାଇଥିଲା।
ମହମ୍ମଦ କୈଫ ନିଜ ୟୁଟ୍ୟୁବ ଚ୍ୟାନେଲରେ କହିଛନ୍ତି ଯେ, ବୈଭବ ସୂର୍ଯ୍ୟବଂଶୀ କୌଣସି ସାଧାରଣ ଖେଳାଳି ନୁହଁନ୍ତି। ସେ ଆଇପିଏଲରେ କେବଳ ଗୋଟିଏ କିମ୍ବା ଦୁଇଟି ମ୍ୟାଚରେ ନୁହେଁ, ବରଂ ସମ୍ପୂର୍ଣ୍ଣ ସିଜିନରେ ଦମଦାର ପ୍ରଦର୍ଶନ କରି ଅରେଞ୍ଜ କ୍ୟାପ ହାସଲ କରିଥିଲେ। ଏଭଳି ଜଣେ ପ୍ରତିଭାଶାଳୀ ଖେଳାଳିଙ୍କୁ ଆରମ୍ଭରୁ ହିଁ ଦଳର ଭରସା ମିଳିବା ଉଚିତ ଥିଲା।
କୈଫ ଆହୁରି କହିଛନ୍ତି, ଯଦି ବୈଭବଙ୍କୁ ଆୟରଲ୍ୟାଣ୍ଡ ଗସ୍ତରେ ଖେଳିବାର ସୁଯୋଗ ମିଳିଥାନ୍ତା, ତେବେ ତାଙ୍କର ପ୍ରାରମ୍ଭିକ ଚାପ ଓ ନର୍ଭସନେସ ସେଠାରେ ହିଁ ଶେଷ ହୋଇଯାଇଥାନ୍ତା। ଏହାପରେ ସେ ଇଂଲଣ୍ଡ ବିପକ୍ଷରେ ଅଧିକ ଆତ୍ମବିଶ୍ୱାସ ସହ ପଡ଼ିଆକୁ ଓହ୍ଲାଇଥାନ୍ତେ।
