ହାଇଦ୍ରାବାଦ, ୨୩ା୧୧: ଆଧୁନିକ ଶିକ୍ଷାର ପ୍ରକୃତି ଉପଯୋଗିତା ଯୋଗ୍ୟ। କିନ୍ତୁ ଏହା ପିଲାଙ୍କ ଚରିତ୍ର ଗଠନ କିମ୍ବା ନୈତିକ ମୂଲ୍ୟବୋଧ ପ୍ରଦାନ ଦିଗରେ ଉପଯୁକ୍ତ ନୁହେଁ। ପ୍ରକୃତ ଶିକ୍ଷାରେ ବ୍ୟକ୍ତିର ସାମଗ୍ରିକ ବିକାଶ ଅନ୍ତର୍ଭୂକ୍ତ ହେବା ଉଚିତ ବୋଲି ଭାରତର ପ୍ରଧାନ ବିଚାରପତି (ସିଜେଆଇ) ଏନ୍. ଭି. ରମନା କହିଛନ୍ତି।
ସୋମବାର ଆନ୍ଧ୍ରପ୍ରଦେଶସ୍ଥିତ ଶ୍ରୀ ସତ୍ୟସାଇ ଇନ୍ଷ୍ଟିଚ୍ୟୁଟର ଏକ କାର୍ଯ୍ୟକ୍ରମରେ ଯୋଗ ଦେଇ ଜଷ୍ଟିସ୍ ରମନା କହିଛନ୍ତି, ଆଧୁନିକ ଶିକ୍ଷା କେବଳ ଉପଯୋଗ କେନ୍ଦ୍ରିକ। ପ୍ରକୃତ ଶିକ୍ଷା ଧୈର୍ଯ୍ୟ, ବୁଝାମଣା, କ୍ଷମା, ପରସ୍ପରକୁ ସମ୍ମାନ, ମାନବିକତା, ନିଃସ୍ବାର୍ଥପରତା ଆଦି ଶିଖାଇଥାଏ। ହେଲେ ଆଜି ପିଲାଙ୍କୁ ଏସବୁ ସହ ସାମାଜିକ ଚେତନା ଏବଂ ଦାୟିତ୍ୱବାନ ହେବାର ଶିକ୍ଷା ପ୍ରଦାନ କରା ନ ଯିବା ଦୁର୍ଭାଗ୍ୟଜନକ। ଶିକ୍ଷା ନିଶ୍ଚିତ ଭାବରେ ଚରିତ୍ର ଗଠନ ଏବଂ ଚିନ୍ତାଧାରାକୁ ବିସ୍ତାର କରିବା ଆବଶ୍ୟକ। ଜୀବନରେ କଠିନ ସମୟର ସମ୍ମୁଖୀନ ହେବାବେଳେ ଏହା ଠିକ୍ ନିଷ୍ପତ୍ତି ନେବାକୁ ସକ୍ଷମ କରିବ ବୋଲି ସେ କହିଥିଲେ।
