ଚେନ୍ନାଇ,୧୩।୩: ତାମିଲନାଡ଼ୁରେ ଚାଲିଥିବା ଭାଷା ବିବାଦ ମଧ୍ୟରେ ଷ୍ଟାଲିନ ସରକାର ବଡ଼ ନିଷ୍ପତ୍ତି ନେଇଛନ୍ତି। ବଜେଟ ସମୟରେ ସରକାର ଟଙ୍କାର ପ୍ରତୀକକୁ ହଟାଇ ଦେଇ ‘ரூ’ ରଖିଛନ୍ତି। ସାରା ଦେଶରେ ଟଙ୍କାର ପ୍ରତୀକକୁ ଆଧିକାରୀକ ଭାବେ ଆପଣାଯାଇଛି। ହେଲେ ଷ୍ଟାଲିନ ସରକାର ଭିନ୍ନ ପ୍ରତୀକ ଆଣିଛନ୍ତି। ବଜେଟ ସମୟରେ ସେ ନୂଆ ପ୍ରତୀକ ଜାରି କରିଛନ୍ତି। ପ୍ରଥମ ରାଜ୍ୟ ଭାବେ ଏଠାକାର ସରକାର ବଡ଼ ପଦକ୍ଷେପ ନେଇଥିବା କୁହାଯାଉଛି।
ତେବେ ଷ୍ଟାଲିନ ସରକାରଙ୍କ ଏହି ପଦକ୍ଷେପ ଏଭଳି ସମୟରେ ଆସିଛି ଯେତେବେଳେ ହିନ୍ଦୀକୁ ନେଇ କିଛିଦିନ ଧରି ବିବାଦ ଲାଗି ରହିଛି। ସୋସିଆଲ ମିଡିଆରେ ଏକ ପୋଷ୍ଟ କରି ଷ୍ଟାଲିନ କହିଥିଲେ ଯେ, ସାରା ଦେଶରେ ହିନ୍ଦୀର ବ୍ୟବହାର ଯୋଗୁ ପ୍ରାଚୀନ ଭାଷାଗୁଡ଼ିକ ବିଲୁପ୍ତ ହେଉଛି। ବିହାର ଏବଂ ଉତ୍ତର ପ୍ରଦେଶ କେବେ ବି ହିନ୍ଦୀ ଭାଷାର ଅଞ୍ଚଳ ନ ଥିଲା। ଏବେ ଏଠାକାର ମୂଳ ଭାଷା ଅତୀତର ପ୍ରତୀକ ଭାବେ ରହିଛି।
ତେବେ ଏହି ବିବାଦ କେନ୍ଦ୍ର ସରକାରଙ୍କ ନୂତନ ଶିକ୍ଷାନୀତି ଲାଗୁ ସମୟରେ ସାମ୍ନାକୁ ଆସିଛି। ଏନ୍ଇପି ୨୦୨୦ରେ ପ୍ରସ୍ତାବିତ ୩ ଭାଷାର ଫର୍ମୁଲା କହୁଛି ଯେ ଛାତ୍ରୀଛାତ୍ରଙ୍କୁ ୩ଟି ଭାଷା ଶିଖିବା ଉଚିତ, ଯେଉଁଥିରେ ଅତି କମ୍ରେ ଦୁଇଟି ଭାରତୀୟ ଭାଷା ରହିଥିବ। ସରକାରୀ ଏବଂ ବେସରକାରୀ ସ୍କୁଲରେ ଏହି ଫର୍ମୁଲା ଲାଗୁ ହେବ ଏବଂ ରାଜ୍ୟମାନଙ୍କୁ ବିନା କୌଣସି ଚାପରେ ଭାଷାକୁ ବାଛିବାକୁ ଅନୁମତି ରହିବ। ତେବେ ଏହି ପଦକ୍ଷେପକୁ ଷ୍ଟାଲିନ୍ ସରକାର ‘ଭଗ୍ବା ନୀତି’ କହିଥିଲେ। ଏପରିକି ଏହାକୁ ଲାଗୁ କରିବାକୁ ମନା କରିଦେଇଥିଲେ। ଏହାପରେ କେନ୍ଦ୍ର ସରକାର ରାଜ୍ୟକୁ ମିଳିବାକୁ ଥିବା ସମଗ୍ର ଶିକ୍ଷା ଅଭିଯାନ ସହାୟତା ରାଶି ୫୭୩ କୋଟି ଟଙ୍କାର ପ୍ରଥମ କିସ୍ତି ଉପରେ ରୋକ ଲଗାଇଥିଲେ। ସେବେଠାରୁ ଷ୍ଟାଲିନ ସରକାର କେନ୍ଦ୍ର ସରକାରଙ୍କ ଉପରେ ଖପ୍ପା ଅଛନ୍ତି।
