କୋଲକାତା/ନୂଆଦିଲ୍ଲୀ,୬ା୩: ପଶ୍ଚିମବଙ୍ଗର ପୂର୍ବ ମେଦିନୀପୁର ଜିଲା ହଳଦିଆ ସବ୍ସିଡିଭିଜନ୍ ଅଧୀନ ଏକ ଛୋଟ ସହର ନନ୍ଦିଗ୍ରାମ। ୨୦୦୭ରେ ପଶ୍ଚିମବଙ୍ଗର ତତ୍କାଳୀନ ବୁଦ୍ଧଦେବ ଭଟ୍ଟାଚାର୍ଯ୍ୟ ସରକାର ସଲିମ ଗ୍ରୁପ୍କୁ ଏଠାରେ ସ୍ବତନ୍ତ୍ର ଅର୍ଥନୈତିକ ଜୋନ୍ (ଏସ୍ଇଜେଡ୍) ଅଧୀନରେ ଏକ କେମିକାଲ ହବ୍ ପ୍ରତିଷ୍ଠା ପାଇଁ ଅନୁମତି ଦେଇଥିଲେ। ଶିଳ୍ପ ପାଇଁ ଜୋରଜବରଦସ୍ତ ଜମି ଅଧିଗ୍ରହଣକୁ ଗ୍ରାମବାସୀ ଘୋର ବିରୋଧ କରିଥିଲେ। ସେହି ବର୍ଷ ମାର୍ଚ୍ଚ ୧୪ ରାତିରେ ପୋଲିସ ଓ ସ୍ଥାନୀୟ ଲୋକଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ଘଟି ୧୪ ଜଣଙ୍କ ଜୀବନ ଯାଇଥିଲା। ଅନେକେ ଆହତ ହୋଇଥିଲେ। ବହୁ ମହିଳାଙ୍କୁ ବଳାତ୍କାର ମଧ୍ୟ କରାଯାଇଥିଲା। ଏସବୁ ଘଟାଯାଇଥିଲା ଶାସକ ଭାରତୀୟ କମ୍ୟୁନିଷ୍ଟ ପାର୍ଟି-ମାର୍କ୍ସବାଦୀ (ସିପିଆଇଏମ୍)ର ବଳରେ। ନନ୍ଦିଗ୍ରାମରେ ବାମପନ୍ଥୀ ଏବଂ ପୋଲିସର ବର୍ବରତାକୁ ସେତେବେଳେ ସାରା ଦେଶରେ ନିନ୍ଦା କରାଯାଇଥିଲା। ଏଇଠୁ ବାମପନ୍ଥୀଙ୍କ ୩୪ ବର୍ଷ ଶାସନ ପତନର ମୁଳଦୂଆ ପଡ଼ିଥିଲା, ଯାହାର ନେତୃତ୍ୱ ନେଇଥିଲେ ତତ୍କାଳୀନ ବିରୋଧୀ ଦଳ ତୃଣମୂଳ କଂଗ୍ରେସ (ଟିଏମ୍ସି) ନେତ୍ରୀ ମମତା ବାନାର୍ଜୀ। ଏହି ନାଁକୁ ନେଇ ଏବେ ପୁଣିଥରେ ଦେଶବ୍ୟାପୀ ଚର୍ଚ୍ଚା।
୨୦୦୯ ଉପନିର୍ବାଚନ ପରଠାରୁ ନନ୍ଦିଗ୍ରାମ ଟିଏମ୍ସି ଦଖଲରେ ରହିଛି। ୨୦୧୧ରେ ମମତା ବାନାର୍ଜୀ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ହେଲେ। ସେତେବେଳେ ମମତାଙ୍କ ପ୍ରଚାର ମଙ୍ଗ ଧରିଥିଲେ ତାଙ୍କ ଡାହାଣ ହାତ ଶୁଭେନ୍ଦୁ ଅଧିକାରୀ। ୨୦୧୬ରେ ଏହି ଆସନକୁ ନନ୍ଦିଗ୍ରାମ ଲଢ଼େଇର ସ୍ଥପତି ଶୁଭେନ୍ଦୁ ୧,୩୪,୬୨୩ ଭୋଟ ପାଇ ଦଖଲ କଲେ। ମମତା ତାଙ୍କୁ ପରିବହନ ମନ୍ତ୍ରୀ କରିଥିଲେ। ତେବେ ଶୁଭେନ୍ଦୁ କିଛି ମାସ ତଳେ ଟିଏମ୍ସି ଛାଡ଼ି ଭାଜପାରେ ମିଶିଛନ୍ତି। ଶୁଭେନ୍ଦୁ ନିଜ ଲୋକପ୍ରିୟତାକୁ ଦେଖି ନନ୍ଦିଗ୍ରାମରେ ମମତାଙ୍କୁ ୫୦ ହଜାରରୁ ଊର୍ଦ୍ଧ୍ୱ ଭୋଟ ବ୍ୟବଧାନରେ ହରାଇବେ ବୋଲି ଭାଜପାର କେନ୍ଦ୍ରୀୟ ନେତୃତ୍ୱଙ୍କ ଆଗରେ ଦୃଢ଼ୋକ୍ତି ପ୍ରକାଶ କରିଛନ୍ତି। ତେଣୁ ଭାଜପା ତାଙ୍କୁ ନନ୍ଦିଗ୍ରାମରୁ ପ୍ରାର୍ଥୀ କରିବାକୁ ଯାଉଛି। ଯୁଦ୍ଧଭୂଇଁ ନନ୍ଦିଗ୍ରାମରେ ଏଥର ମମତା ବନାମ ଶୁଭେନ୍ଦୁ ଲଢ଼େଇ ହେବା ଏକପ୍ରକାର ନିଶ୍ଚିତ।
୨୯୧ ପ୍ରାର୍ଥୀଙ୍କ ତାଲିକା ପ୍ରକାଶ କଲା ଟିଏମ୍ସି
ପଶ୍ଚିମବଙ୍ଗରେ ସର୍ବାଧିକ ୮ ପର୍ଯ୍ୟାୟରେ (ମାର୍ଚ୍ଚ ୨୭ରୁ ଏପ୍ରିଲ ୨୯) ଭୋଟ ଗ୍ରହଣ କରାଯିବ। ଏଥିପାଇଁ ସବୁ ଦଳ ରଣନୀତି ପ୍ରସ୍ତୁତି ଓ ଗୋଟି ଚାଳନାରେ ବ୍ୟସ୍ତ ଥିବାବେଳେ ୨୯୪ ଆସନ ବିଶିଷ୍ଟ ବିଧାନସଭା ନିର୍ବାଚନ ଲାଗି ଟିଏମ୍ସି ଶୁକ୍ରବାର ୨୯୧ ପ୍ରାର୍ଥୀଙ୍କ ତାଲିକା ପ୍ରକାଶ କରିଛି। ମୁଖ୍ୟମନ୍ତ୍ରୀ ତଥା ଟିଏମ୍ସି ଅଧ୍ୟକ୍ଷା ମମତା ବାନାର୍ଜୀ ନନ୍ଦିଗ୍ରାମ ଆସନରୁ ନିର୍ବାଚନ ଲଢ଼ିବେ ବୋଲି ଘୋଷଣା କରିଛନ୍ତି। ଫଳରେ ଉକ୍ତ ଆସନରେ ଭାଜପା ପ୍ରାର୍ଥୀ ଶୁଭେନ୍ଦୁ ଅଧିକାରୀଙ୍କ ସହ ମମତାଙ୍କର ଜୋର୍ଦାର ଲଢ଼େଇ ହୋଇପାରେ। ମମତାଙ୍କୁ ନନ୍ଦିଗ୍ରାମରୁ ପ୍ରାର୍ଥୀ ହେବା ଲାଗି ଶୁଭେନ୍ଦୁ ଚ୍ୟାଲେଞ୍ଜ ଦେଇଥିଲେ, ଯାହାକୁ ସେ ଗ୍ରହଣ କରିନେଇଛନ୍ତି। କହିଛନ୍ତି, ମାର୍ଚ୍ଚ ୯ରେ ମୁଁ ନନ୍ଦିଗ୍ରାମ ଯାଉଛି। ୧୦ ତାରିଖରେ ହଳଦିଆରେ ନାମାଙ୍କନପତ୍ର ଦାଖଲ କରିବି।
ପ୍ରାର୍ଥୀ ତାଲିକାରେ ସୋସିଆଲ ଇଞ୍ଜିନିୟରିଂ ବା ସାମାଜିକ ସମୀକରଣର ମଜଭୁତ ଚିତ୍ର ଦେଖିବାକୁ ମିଳିଛି। ଘୋଷଣା ବେଳେ ମମତା କହିଥିଲେ, ସେ କେବଳ ନନ୍ଦିଗ୍ରାମରୁ ଲଢ଼ିବେ। ତାଙ୍କ ଭବାନୀପୁର ଆସନରୁ ଶକ୍ତିମନ୍ତ୍ରୀ ଶୋଭନଦେବ ମୁଖାର୍ଜୀ ପ୍ରତିଦ୍ୱନ୍ଦ୍ୱିତା କରିବେ। ସେହିପରି ନିକଟରେ ଟିଏମ୍ସିରେ ଯୋଗଦେଇଥିବା କ୍ରିକେଟର ମନୋଜ ତିଓ୍ବାରୀ ହାଓଡା ଜିଲାର ଶିବପୁର ନିର୍ବାଚନମଣ୍ଡଳୀରେ ପ୍ରଥମ ଥର ପାଇଁ ଭାଗ୍ୟପରୀକ୍ଷା କରିବେ। ଏଥର ଟିଏମ୍ସି ମୋଟ ୨୯୧ ଆସନରେ ଲଢ଼ିବ ଏବଂ ଅବଶିଷ୍ଟ ୩ ଆସନ (ଦାର୍ଜିଲିଂ, କଲିମପୋଙ୍ଗ ଓ କୁର୍ସେଓଙ୍ଗ) ସହଯୋଗୀ ଦଳ ଗୋର୍ଖା ମୁକ୍ତି ମୋର୍ଚ୍ଚା(ଜିଜେଏମ୍)କୁ ଛାଡ଼ି ଦିଆଯିବ। ଏଥର ୮୦ ବର୍ଷରୁ ଊର୍ଦ୍ଧ୍ୱ ବୟସ୍କ ପ୍ରାର୍ଥୀଙ୍କୁ ଟିଏମ୍ସି ଟିକେଟ ଦେଇନାହିଁ। ସେହିପରି ୨୮ ବିଧାୟକଙ୍କୁ ମଧ୍ୟ ସୁଯୋଗ ମିଳିନାହିଁ। ଅନ୍ୟପକ୍ଷରେ ଏଥର ୫୦ ଜଣ ମହିଳାଙ୍କୁ ଦଳ ପ୍ରାର୍ଥୀ କରିଛି। ୪୨ ମୁସଲମାନ, ୭୯ ତଫସିଲଭୁକ୍ତ ଜାତି(ଏସ୍ସି) ଏବଂ ୧୭ ତଫସିଲଭୁକ୍ତ ଉପଜାତି(ଏସ୍ଟି) ଲୋକଙ୍କୁ ଟିକେଟ ଦିଆଯାଇଛି।
ଭାଜପାରେ ମନ୍ତ୍ରଣା
ସେପଟେ ନନ୍ଦିଗ୍ରାମ ଓ ଭବାନୀପୁର ସମେତ ୧୫ ଆସନରେ କାହାକୁ ପ୍ରାର୍ଥୀ କରାଯିବ ସେନେଇ ଭାଜପାର ଶୀର୍ଷ ନେତୃତ୍ୱ ମନ୍ତ୍ରଣା ଚଳାଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ଓ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ଏନେଇ ଖୁବ୍ଶୀଘ୍ର ନିଷ୍ପତ୍ତି ନେବେ ବୋଲି ଜଣାପଡ଼ିଛି।
ବାମଦଳର ପ୍ରାର୍ଥୀ ଘୋଷଣା
ପଶ୍ଚିମବଙ୍ଗ ବିଧାନସଭା ନିର୍ବାଚନ ପାଇଁ ବାମ ସାମ୍ମୁଖ୍ୟ, କଂଗ୍ରେସ ଏବଂ ନବଗଠିତ ଇଣ୍ଡିଆନ ସିକ୍ୟୁଲାର ଫ୍ରଣ୍ଟ (ଆଇଏସ୍ଏଫ୍) ମଧ୍ୟରେ ମେଣ୍ଟ ହୋଇଛି। ଶୁକ୍ରବାର ବାମ ସାମ୍ମୁଖ୍ୟ ପ୍ରଥମ ଦୁଇ ପର୍ଯ୍ୟାୟ ନିର୍ବାଚନ ପାଇଁ ପ୍ରାର୍ଥୀ ତାଲିକା ପ୍ରକାଶ କରିଛି। ସହଯୋଗୀ କଂଗ୍ରେସ ଏବଂ ଆଇଏସ୍ଏଫ୍ ଖୁବ୍ ଶୀଘ୍ର ପ୍ରାର୍ଥୀ ଘୋଷଣା କରିବେ। ଆଉ କେତେକ ଆସନ ଭାଗବଣ୍ଟା ଚୂଡ଼ାନ୍ତ ହୋଇ ନ ଥିବା ବାମ ସାମ୍ମୁଖ୍ୟ ଅଧ୍ୟକ୍ଷ ବିମାନ ବୋଷ କହିଛନ୍ତି।
