ମାଲକାନଗିରି,୫ା୫(ଡି.ଏନ୍.ଏ.): ମାଲକାନଗିରି ଜିଲା ସ୍ବାସ୍ଥ୍ୟ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରି ବିଭିନ୍ନ ସମୟରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ପୁରସ୍କୃତ ହୋଇଛି। ଗୁରୁବାର ମାନସିକ ବିକାରଗ୍ରସ୍ତ ରୋଗୀଙ୍କ ପାଇଁ ମିଶନ ଆଶ୍ରା କେନ୍ଦ୍ର ଲୋକାର୍ପିତ ହୋଇଛି। ଫଳରେ ସ୍ବାସ୍ଥ୍ୟସେବା କ୍ଷେତ୍ରରେ ଜିଲା ଆଉ ପାଦଟିଏ ଆଗେଇଛି। ରାଜ୍ୟ ସରକାରଙ୍କ ପରିଚାଳିତ ପିପୁଲ୍ସ ଫୋରମ ସଙ୍ଗଠନ ମାଧ୍ୟମରେ ଗୁରୁବାର ଜିଲା ସଦର ମହକୁମାସ୍ଥିତ ପୁରୁଣା ଜିଲା ସ୍ବାସ୍ଥ୍ୟକେନ୍ଦ୍ର ପରିସରରେ ମିଶନ ଆଶ୍ରା ସ୍ବାସ୍ଥ୍ୟକେନ୍ଦ୍ର ଉଦ୍ଘାଟିତ ହୋଇଛି। ମାଲକାନଗିରି ବିଧାୟକ ଆଦିତ୍ୟ ମାଢି ଏହି କେନ୍ଦ୍ରକୁ ଉଦ୍ଘାଟନ କରିଛନ୍ତି। ଆୟୋଜିତ କାର୍ଯ୍ୟକ୍ରମରେ ସ୍ବତନ୍ତ୍ର ବିକାଶ ପରିଷଦ ଅଧ୍ୟକ୍ଷ ଆଡମା ରାବା, ଜିଲାପାଳ ବିଶାଳ ସିଂ, ମୁଖ୍ୟ ଉନ୍ନୟନ ଅଧିକାରୀ ରତ୍ନାକର ସାହୁ, ଅତିରିକ୍ତ ଜିଲାପାଳ ତ୍ରିନାଥ ମାଝି, ଜିଲା ମୁଖ୍ୟ ଚିକିତ୍ସାଧିକାରୀ ପ୍ରଫୁଲ୍ଲ ନନ୍ଦ, ଉପଜିଲାପାଳ ଅକ୍ଷୟ ଖେମୁଣ୍ଡୁ, ଜିଲା ଅତିରିକ୍ତ ମୁଖ୍ୟ ଚିକିତ୍ସାଧିକାରୀ ଅନିଲ ମିଶ୍ର, ସନ୍ଧ୍ୟାରାଣୀ ପଟ୍ଟନାୟକ, ଜିଲା ସାମାଜିକ ସୁରକ୍ଷା ଅଧିକାରୀ ସସ୍ମିତା ସ୍ବାଇଁ ପ୍ରମୁଖ ଉପସ୍ଥିତ ଥିଲେ। ଏହି କେନ୍ଦ୍ର ଉଦ୍ଘାଟନ ପୂର୍ବରୁ ବିଶେଷକରି ମାଲକାନଗିରି ଜିଲା ସଦର ମହକୁମାରୁ ଆରମ୍ଭ କରି ଜିଲାର ବିଭିନ୍ନ ଅଞ୍ଚଳର ଅନେକ ମାନସିକ ବିକାରଗ୍ରସ୍ତ ମହିଳାପୁରୁଷ ସହରର ବିଭିନ୍ନ ସ୍ଥାନରେ ଅସହାୟ ଅବସ୍ଥାରେ ପଡି ରହୁଥିଲେ। ଜିଲା ପ୍ରଶାସନ ପକ୍ଷରୁ ସେମାନଙ୍କୁ ଅସ୍ଥାୟୀ ଭାବେ ବୃଦ୍ଧାଶ୍ରମରେ ରଖାଯାଉଥିଲେ ମଧ୍ୟ ସେମାନଙ୍କ ଚିକିତ୍ସା ଲାଗି ବିଶେଷ ସୁବିଧା ନ ଥିବାରୁ ଅନେକ ସମୟରେ ଜିଲା ବାହାରକୁ ପଠାଯାଉଥିଲା। ଫଳରେ ରୋଗୀଙ୍କୁ ଦେଖାଶୁଣା କରିବାରେ ସମସ୍ୟା ଉପୁଜୁଥିଲା। ମାଲକାନଗିରି ଜିଲା ସଦର ମହକୁମାରେ ଏହି ମିଶନ ଆଶ୍ରା ଖୋଲିିବା ଦ୍ୱାରା ମାନସିକ ରୋଗରେ ପୀଡିତ ମହିଳା ପୁରୁଷମାନେ ଉପକୃତ ହେବେ। ସେମାନଙ୍କୁ ଖାଦ୍ୟ, ବସ୍ତ୍ର, ଚିକିତ୍ସା, ଆଶ୍ରୟ ଯୋଗାଇହେବ। ମିଶନ ଆଶ୍ରା ପକ୍ଷରୁ ମାନସିକ, ଶାରୀରିକ ଭାବେ କ୍ଷତିଗ୍ରସ୍ତ ରୋଗୀଙ୍କ ପାଇଁ ସମସ୍ତ ସୁବିଧା କରାଯାଇଛି। ରାଜ୍ୟ ସରକାରଙ୍କ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ଏବଂ ଜିଲା ପ୍ରଶାସନ ସହଭାଗିତାରେ ଏହି ମିଶନ ଆଶ୍ରା କେନ୍ଦ୍ର ଖୋଲାଯାଇଛି। ପିପୁଲ୍ସ ଫୋରମର ପରିଚାଳନା ନିର୍ଦ୍ଦେଶକ ଅଶୋକ ପାତ୍ର ଏହି କେନ୍ଦ୍ର ଦ୍ୱାରା ମାଲକାନଗିରି ଜିଲାର ମାନସିକ ଓ ଶାରୀରିକ ବିକାରଗ୍ରସ୍ତ ରୋଗୀ କି ସେବା ପାଇବେ ସେ ସମ୍ପର୍କରେ ସୂଚନା ଦେଇଥିଲେ। କାର୍ଯ୍ୟକ୍ରମକୁ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ପ୍ରମିଳା ମାଝି ପରିଚାଳନା କରିଥିଲେ।
