ଥୁଆମୂଳ ରାମପୁର,୬ା୮(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ ସିନ୍ଧିପଦର ଗ୍ରାମପଞ୍ଚାୟତ ବାର୍ସିକନା ଗ୍ରାମର କାଲୁଆ ମାଝୀଙ୍କ ୧୬ ବର୍ଷୀୟା ଝିଅ ମାଧୁରୀଙ୍କର ସାପ କାମୁଡ଼ାରେ ମୃତ୍ୟୁ ପରେ ପୋଷ୍ଟମୋର୍ଟମ ପାଇଁ ପରିବାରକୁ ଦୀର୍ଘ ୩୬ ଘଣ୍ଟା ଧରି ହଇରାଣ ହେବାକୁ ପଡ଼ିଥିଲା। ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସୁବିଧା ଥାଇ ବି ଡାକ୍ତର ମୃତଦେହ ବ୍ୟବଚ୍ଛେଦ ନ କରି ଜୟପାଟଣା ପଠାଇବା ଏବଂ ପୋଲିସ-ସ୍ବାସ୍ଥ୍ୟ ବିଭାଗର ଦାୟିତ୍ୱହୀନତା ବିରୋଧରେ ଆଜି ‘ୟୁଥ ୟୁନାଇଟେଡ ଫର୍ ଦି ଭିଜନ ଅଫ ଆମ୍ବେଦକର’ (ୟୁଭା) ପକ୍ଷରୁ ପ୍ରଶାସନକୁ ଦାବିପତ୍ର ପ୍ରଦାନ କରାଯାଇଛି।
ସଂଗଠନ ପକ୍ଷରୁ ଥୁଆମୂଳ ରାମପୁର ସିଏଚ୍ସି ମୁଖ୍ୟ ଚିକିତ୍ସାଧିକାରୀ, ଥାନା ଅଧିକାରୀ, ବିଡିଓ ଓ ତହସିଲଦାରଙ୍କୁ ସିଧାସଳଖ ଦାବିପତ୍ର ଦିଆଯାଇଥିବା ବେଳେ ଇମେଲ ଜରିଆରେ ଜିଲାପାଳ, ଉପଜିଲାପାଳ ଓ ସିଡିଏମ୍ ଆଣ୍ଡ ପିଏଚ୍ଓଙ୍କୁ ନକଲ ପଠାଯାଇଛି। ରାମପୁର ସିଏଚ୍ସିରେ ମୃତଦେହ ବ୍ୟବଚ୍ଛେଦ ମନା କରାଯିବାର ଲିଖିତ ସ୍ପଷ୍ଟୀକରଣ, ଦାୟୀ ଅଧିକାରୀଙ୍କ ବିରୋଧରେ ଉଚ୍ଚସ୍ତରୀୟ ତଦନ୍ତ ଓ ଦୃଢ଼ କାର୍ଯ୍ୟାନୁଷ୍ଠାନ ସହ ମୃତକଙ୍କ ଗରିବ ପରିବାରକୁ ତୁରନ୍ତ ସରକାରୀ ଆର୍ଥିକ ସହାୟତା ଯୋଗାଇ ଦେବାକୁ ଦାବି କରାଯାଇଛି। ଦାବିପତ୍ର ଗ୍ରହଣ ପରେ ଯାହା ବି ସରକାରୀ ସହାୟତା ଯଥାଶୀଘ୍ର ଯୋଗାଇ ଦିଆଯିବ ବୋଲି ବିଡିଓ ଏବଂ ତହସିଲଦାର ପ୍ରତିଶ୍ରୁତି ଦେଇଥିବା ବେଳେ ଆଗାମୀ ଦିନରେ ଏପରି ସମସ୍ୟା ନ ହେବା ପାଇଁ ମେଡିକାଲ କର୍ତ୍ତୃପକ୍ଷ ସୂଚନା ଦେଇଛନ୍ତି। ଏହି କାର୍ଯ୍ୟକ୍ରମରେ ‘ୟୁଭା’ ସଦସ୍ୟ ସୁରେନ୍ଦ୍ର ନାଏକ, ବୈଷ୍ଣବ ନାଏକ, ଗମୟ ରଞ୍ଜନ ନାଏକ, ମହେଶ ଧଙ୍ଗଡ଼ା ମାଝୀ, ମଣିଭଦ୍ର ନାଏକ, ରଘୁନାଥ ନାଏକ, ରୋହିତ ନାଏକ, ଜଗନ୍ନାଥ ଠାକୁର, ଅନନ୍ତ ନାଏକ ପ୍ରମୁଖ ଉପସ୍ଥିତ ଥିଲେ।
