ବାରିପଦା/ମୋରଡ଼ା,୧୭ା୬(ନୀଳାଦ୍ରି ବିହାରୀ ଦଣ୍ଡପାଟ/ସ୍ମାରକ ମାଜୀ): ବିବାଦୀୟ ମୋରଡ଼ା ଥାନା ଅଧିକାରୀ ସୁମିତ କୁମାର ସୋରେନ ଅଭିଯୋଗ ଦେବାକୁ ଯାଇଥିବା ଜଣେ ନାବାଳିକାଙ୍କୁ ଥାନାରେ ଧମକ ଦେବା ଘଟଣାକୁ ନେଇ ବୁଧବାର ଅପରାହ୍ନରେ ନାବାଳିକାଙ୍କ ମା-ବାପା ରାଷ୍ଟ୍ରପତିଙ୍କ ଉଦେଶ୍ୟରେ ମୟୂରଭଞ୍ଜ ଜିଲାପାଳଙ୍କୁ ଏକ ଅନୁରୋଧ ପତ୍ର ପ୍ରଦାନ କରିଛନ୍ତି। ତେବେ ଜିଲାପାଳ କୌଣସି କାରଣ ବଶତଃ କାର୍ଯ୍ୟାଳୟରେ ନ ଥିବାରୁ ଅତିରିକ୍ତ ଜିଲାପାଳ ଈଶ୍ୱରଚନ୍ଦ୍ର ନାଏକ ଉକ୍ତ ଅନୁରୋଧ ପତ୍ର ଗ୍ରହଣ କରିଛନ୍ତି। ଆସନ୍ତା ୧୯ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ରାଇରଙ୍ଗପୁର ଗସ୍ତ ଥିବାରୁ ତାଙ୍କୁ ଉକ୍ତ ଅନୁରୋଧପତ୍ର ପ୍ରଦାନ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଭିଯୋଗ ପତ୍ରରେ ଉଲ୍ଲେଖ ରହିଛି ।
ଅଭିଯୋଗ ମୁତାବକ, ମୋରଡ଼ା ଥାନାକୁ ଗତ ମେ’ ୧୬ ତାରିଖରେ ନାବାଳିକାଙ୍କ ଉପରେ ହୋଇଥିବା ଅତ୍ୟାଚାରକୁ ନେଇ ନାବାଳିକାଙ୍କ ପରିବାର ଅଭିଯୋଗ କରିବା ପାଇଁ ଯାଇଥିବା ବେଳେ ଥାନା ଅଧିକାରୀ ସୁମିତ କୁମାର ସରେନ କେସ୍ ନ ଦେବାକୁ ଚାପ ପକାଇବା ସହ କେସ୍ କଲେ ନାବାଳିକାଙ୍କୁ ୭ବର୍ଷ ଜେଲ୍ ହେବ ବୋଲି ଧମକ ଦେଇଥିଲେ। ଯାହାଫଳରେ ନାବାଳିକା ଚେତାଶୂନ୍ୟ ଅବସ୍ଥାରେ ପ୍ରଥମେ କିଶାନତାଣ୍ଡି ପରେ ବାରିପଦା ପିଆରଏମ୍ ମେଡିକାଲ କଲେଜ ଆଣ୍ଡ ହସ୍ପିଟାଲରେ ଭର୍ତ୍ତି ହୋଇ ଦୀର୍ଘ ୪ ଘଣ୍ଟା ପରେ ଚେତା ଫେରିଥିଲା। ଉକ୍ତ ଘଟଣା ବାବଦରେ ପରିବାରବର୍ଗ ଜିଲା ଆରକ୍ଷୀ ଅଧୀକ୍ଷକ ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଅଭିଯୋଗ କରିଥିଲେ ମଧ୍ୟ ବର୍ତ୍ତମାନ ସୁଦ୍ଧା ଥାନା ଅଧିକାରୀ ସୋରେନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ତେଣୁ ଉକ୍ତ ଘଟଣାର ସଠିକ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଉଲ୍ଲେଖ ରହିଛି।