ଦେବଗଡ଼,୧୬ା୬(ଶଶାଙ୍କ ଶେଖର ଝାଙ୍କର): ବାରକୋଟ ବ୍ଲକ ସଇଡ଼ା ପଞ୍ଚାୟତର ଶରଣକୋଟ ଗ୍ରାମରେ ଚାଲାଣ ହେବା ପୂର୍ବରୁ ଅଳ୍ପକେ ବର୍ତ୍ତି ଯାଇଛନ୍ତି ଏକ ୧୫ ବର୍ଷର ନାବାଳିକା। ସରୁଆଳି ପଞ୍ଚାୟତର ଖୁଣ୍ଟା ଗ୍ରାମରୁ କିଛି ଯୁବକ ଶରଣକୋଟ ଗ୍ରାମକୁ ଏକ ବୋଲେରୋ ଯୋଗେ ଆସି ମୁଣ୍ଡା ସାହିର ବିଜୁ ମୁଣ୍ଡା ଘରେ ମଦ ଓ ମାଂସର ଆସର ଜମାଇଥିଲେ ଓ ବିଜୁ ମୁଣ୍ଡା ଓ ତା’ ପୁଅକୁ ଘରେ ଥିବା ୧୫ ବର୍ଷୀୟା ନାବାଳିକା ଝିଅକୁ ସେମାନଙ୍କ ସାଙ୍ଗରେ ଛାଡ଼ିବାକୁ ପ୍ରଲୋଭିତ କରିଥିଲେ । ବିଜୁ ମୁଣ୍ଡା ଓ ତାଙ୍କ ପୁଅ ମଧ୍ୟ ମଦ ନିଶାରେ ସେ ଯୁବକମାନଙ୍କ ପ୍ରସ୍ତାବରେ ରାଜି ହୋଇଯାଇଥିଲେ ଓ ନାବାଳିକା ଝିଅକୁ ସେମାନଙ୍କ ସାଙ୍ଗରେ ଯିବାକୁ ବାଧ୍ୟ କରିଥିଲେ। ହେଲେ ଝିଅ ଓ ମା’ ଏ ପ୍ରସ୍ତାବକୁ ବିରୋଧ କରିଥିଲେ। ଝିଅର ଭାଇ ମାଡ଼ ମାରି ଝିଅକୁ ଚେତାବନୀ ଦେଲେ ଯେ, ସେମାନଙ୍କ ସାଙ୍ଗରେ ଯଦି ସେ ନ ଯାଏ ତେବେ ବଡ ଭଉଣୀର ମୃତ୍ୟୁ ପରେ ଏକା ରହୁଥିବା ଭିଣୋଇ ପାଖରେ ରହି ତା’ ଦୁଇ ପିଲାଙ୍କ କଥା ବୁଝିବାକୁ। ନିଶାଶକ୍ତ ବାପା ପୁଅର ଭୟରେ ମା’ ମଧ୍ୟ ଶେଷରେ ରାଜି ହୋଇଥିଲେ ଝିଅକୁ ସେମାନଙ୍କ ସାଙ୍ଗରେ ଛାଡ଼ିବାକୁ। ହେଲେ ଝିଅ କୌଶଳ କ୍ରମେ ନିଜ ଘରୁ ଖସିଆସି ଶରଣକୋଟ-୨ର ଅଙ୍ଗନବାଡ଼ି କର୍ମୀ ନିରୂପମା ପାତ୍ରଙ୍କୁ ତାଙ୍କ ବାପଭାଇ ସେ ଯୁବକମାନଙ୍କ ସାଙ୍ଗରେ ରବିବାର ସନ୍ଧ୍ୟାରେ ବାହାରିଯିବା ପାଇଁ ବାଧ୍ୟ କରୁଥିବା ବିଷୟରେ ଅଭିଯୋଗ କରିଥିଲେ।
ଅଙ୍ଗନବାଡ଼ି କର୍ମୀ ନିରୂପମା ପାତ୍ର ଉପସ୍ଥିତ ବୁଦ୍ଧି ଖଟାଇ ଝିଅକୁ ନିଜ ଘରକୁ ନେଇ ସଇଡ଼ାର ଅଙ୍ଗନବାଡି କର୍ମୀ ପ୍ରତିମା ପ୍ରଧାନଙ୍କୁ ଗ୍ରାମ୍ୟ ବାଲ୍ୟ ବିବାହ ମଞ୍ଚର ସମସ୍ତ ସଦସ୍ୟଙ୍କୁ ସୁଚିତ କରି ତୁରନ୍ତ ସମସ୍ତେ ଏକତ୍ରିତ ହେବାକୁ କହିଥିଲେ। ଏହି ସମୟରେ ଝିଅକୁ ଘରେ ନ ପାଇ ବୋଲେରୋରେ ଆସିଥିବା ୫ ରୁ ୬ ଜଣ ଯୁବକ ଗାଁସାରା ଖୋଜିବାକୁ ଲାଗିଲେ ଓ ଶେଷରେ ନିରୂପମାଙ୍କ ଘରେ ଝିଅ ଥିବାର ସନ୍ଧାନ ପାଇ କେମିତି ଝିଅକୁ ସେଠାରୁ ନେବେ ବୋଲି ସୁଯୋଗର ଅପେକ୍ଷାରେ ରହିଲେ। ଠିକ୍ ସମୟରେ ଗ୍ରାମ୍ୟ ବାଲ୍ୟ ବିବାହ ଟାସ୍କ ଫୋର୍ସର ସଦସ୍ୟ ଜ୍ୟୋତ୍ସ୍ନାମୟୀ ସାହୁ , ଜୟନ୍ତୀ ସାହୁ, ମଞ୍ଜରୀ ମହାନ୍ତ, ସୁକାନ୍ତି ସାହୁ , ଦୀପ୍ତି ପ୍ରଧାନ ଓ ଅନ୍ୟ ୨୦ରୁ ୨୫ ସଦସ୍ୟ ଘଟଣାସ୍ଥଳରେ ଉପସ୍ଥିତ ହୋଇ ଝିଅକୁ ସୁରକ୍ଷା ଦେଲେ।
ଅନ୍ୟପଟେ ବୋଲେରୋରେ ଆସିଥିବା ଯୁବକମାନେ ମଧ୍ୟ ପାଖ ଜଙ୍ଗଲରେ ସୁଯୋଗ ଅପେକ୍ଷାରେ ଛକି ବସିଲେ। ସନ୍ଧ୍ୟା ହୋଇଯିବା ପରେ ବିପଦ ଥିବାରୁ ଟାସ୍କ ଫୋର୍ସର ସଦସ୍ୟମାନେ ଜିଲା ଶିଶୁ ସୁରକ୍ଷା ଅଧିକାରୀଙ୍କୁ ଯୋଗାଯୋଗ କରି ସହାୟତା ଲୋଡ଼ିଥିଲେ। ଜିଲା ଶିଶୁ ସୁରକ୍ଷା ଅଧିକାରୀ ରୋମିଓ ମହାପାତ୍ର ବିଭାଗୀୟ ସୁରକ୍ଷା ଅଧିକାରୀ ଚିନ୍ମୟ ସ୍ବାଇଁ, ସଖୀ କେନ୍ଦ୍ରର କର୍ମକର୍ତ୍ତା ରେଖା ସାହୁ , ଜ୍ୟୋତିର୍ମୟୀ ସାହୁ , ଶକ୍ତି ସଦନର ନିର୍ମଳା ଜେନା ଓ ଚାଇଲ୍ଡ ହେଲ୍ପ ଲାଇନର କରିସ୍ମା ମହାକୁଳଙ୍କ ସହ ସନ୍ଧ୍ୟାରେ ଶରଣ କୋଟ ଗ୍ରାମରେ ପହଞ୍ଚି ନାବାଳିକା ଝିଅକୁ ଉଦ୍ଧାର କରି ଦେବଗଡ଼ରେ ଥିବା ସାଖୀ କେନ୍ଦ୍ରରେ ଆନୁଷ୍ଠାନିକ ଯତ୍ନ ମଧ୍ୟର ରହିଥିବା ସୂଚନା ମିଳିଛି।
