ଭୁବନେଶ୍ୱର,୨୨।୬: ଇଞ୍ଜିନିଅରିଂ କଲେଜ ଛାତ୍ରୀ ମୃତ୍ୟୁ ଘଟଣାରେ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ମଙ୍ଗଳବାର ପ୍ରଥମ ଥର ପାଇଁ ପ୍ରତିକ୍ରିୟା ରଖିଛନ୍ତି। ମନ୍ତ୍ରୀ ପ୍ରତିକ୍ରିୟାରେ କହିଛନ୍ତି, ଇଞ୍ଜିନିଅରିଂ କଲେଜ ଛାତ୍ରୀ ମୃତ୍ୟୁ ଘଟଣାରେ ମୋ ପୁତୁରାଙ୍କ ନାଁ ଆସୁଥିଲା, ପୋଲିସ ତାଙ୍କୁ ଗିରଫ କରିଛି। ଆଇନ୍ ଊଦ୍ଧର୍ବରେ କେହି ନୁହଁନ୍ତି, ଆଇନ ତା ବାଟରେ ଯାଇଛି। ଭାଜପା ସରକାର ଘଣ୍ଟ ଘୋଡ଼ାଇବା ସରକାର ନୁହେଁ ବୋଲି ମନ୍ତ୍ରୀ ଦୃଢୋକ୍ତି ପ୍ରକାଶ କରିଥିଲେ।
ଏପରିକି ମନ୍ତ୍ରୀ ବିଜେଡି ସରକାର ସମୟରେ ଘଟିଥିବା ମମିତା ମେହେର ଏବଂ ମାହାଙ୍ଗା ଡବଲ ମର୍ଡର କଥା ଉଠାଇ ମମିତା ମାମଲାରେ କ୍ୟାପଟେନ ଗିରଫ ହୋଇ ନ ଥିବା ବେଳେ ମାହାଙ୍ଗା ଡବଲ ମାର୍ଡରରେ ପ୍ରତାପ ଜେନାଙ୍କୁ ତଦନ୍ତ ପରିସରଭୁକ୍ତ କରାଯାଇ ନ ଥିଲା କାହିଁକି ବୋଲି ପ୍ରଶ୍ନ କରିଥିଲେ। ସେହିପରି କେତେଜଣ ରାଜନେତାଙ୍କ ନାଁନେଇ ଖୋଲାଖୋଲି ଟାର୍ଗେଟ କରି ପ୍ରଶ୍ନ କରୁଥିବା ନେତା ହତ୍ୟାକାରୀ, ବଳାତ୍କାରୀ, ହତ୍ୟା ଷଡ଼ଯନ୍ତ୍ରକାରୀ ବୋଲି କହିଥିଲେ।
ସୂଚନା ଯୋଗ୍ୟ, ଗଞ୍ଜାମ ଜିଲା ଗୋଳନ୍ଥରା ଥାନା ଅଞ୍ଚଳର ଏକ ଘରୋଇ କଲେଜ ହଷ୍ଟେଲରେ ଛାତ୍ରୀ ବୁଗୁଡା ଘୋଡ଼ାପଡ଼ା ଗ୍ରାମର ଶୃତି ଭୋଳଙ୍କ ସନ୍ଦେହଜନକ ମୃତ୍ୟୁ ହୋଇଥିଲା। ଏହି ଘଟଣାରେ ମନ୍ତ୍ରୀଙ୍କ ପୁତୁରାଙ୍କ ସମ୍ପୃକ୍ତି ଥିବା ପରିବାର ଲୋକେ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ ଗୋଳନ୍ଥରା ପୋଲିସ ଏକ ମାମଲା(ନଂ.୨୨୬/୨୬) ରୁଜୁ କରି ଘଟଣାରେ ସମ୍ପୃକ୍ତ ଥିବା ବିଶ୍ୱଜିତ୍ ଜେନାଙ୍କୁ ଗିରଫ କରିଛି।