ଖଇରା,୨୨।୯(ଡି.ଏନ.ଏ.)-ବାଲେଶ୍ୱର ଜିଲା ଖଇରା ତହସିଲ କୁପାରୀ ରାଜସ୍ବ କ୍ଷେତ୍ର ଅଧୀନ ବରପଦା, ହରିପୁର, ବାରାଯୋଡି ତଥା କୁପାରୀ କଲେଜ ପଛପଟ ଗୋଚର ଜମିରେ ବେଆଇନ ଭାବେ ଚାଲିଥିବା ଅନ୍ୟୁନ ୩୫ ଖଣିରୁ ମାଙ୍କଡା ପଥର ଉତ୍ତୋଳନ କରାଯାଉଛି ା ରାତିଦିନ ମେଶିନ ବ୍ୟବହାର କରି ମାଫିଆମାନେ ଶହ ଶହ ଟ୍ରିପ ମୋରମ ଜିଲା ବାହାରକୁ ଚାଲାଣ କରୁଛନ୍ତି। କୋଭିଡ-୧୯ କଟକଣା କି ପ୍ରଶାସନ ଲୋକଦେଖାଣିଆ ତାଦିଦ୍ର କୌଣସି ଫରକ ପଡୁନାହିଁ ା ଖଇରାର ଅର୍ଦ୍ଧାଧିକ କର୍ମଚାରୀ ଏଥିରେ ସମ୍ପୃକ୍ତ ଥିବାରୁ ଚଢାଉ ପାଇଁ ରାଜସ୍ବ ଅଧିକାରୀଙ୍କ ଗାଡି ଖଣି ଅଞ୍ଚଳକୁ ବାହାରିବା ପୂର୍ବରୁ ଖଣି ମାଫିଆମାନେ ଅବଗତ ହୋଇ ଯାଉଛନ୍ତି ା ଫଳରେ ଅଧିକାରୀମାନେ ପହଞ୍ଚିବା ପୂର୍ବରୁ ଖଣି ମାଫିଆମାନେ ତାଙ୍କର ପାୱାର ଟିଲର ଏବଂ କଟର ମେଶିନଗୁଡିକୁ ସୁରକ୍ଷିତ ସ୍ଥାନରେ ଲୁଚାଇ ଦେଉଛନ୍ତି। ଅଧିକାରୀମାନେ ବାଧ୍ୟ ହୋଇ ଖଣି ଅଞ୍ଚଳ ବୁଲାବୁଲି କରି ନିରାଶ ହୋଇ ମୁକ୍ତ ହସ୍ତରେ କାର୍ଯ୍ୟାଳୟକୁ ଫେରି ଆସୁଛନ୍ତି ା ଖଣି ମାଫିଆ ଓ ଅଧିକାରୀଙ୍କ ମଧ୍ୟରେ ଏଭଳି ଲୁଚାଲୁଚି ଖେଳ ଭିତରେ କୁପାରୀ ପର୍ଯ୍ୟଟନ କ୍ଷେତ୍ରର ମାନଚିତ୍ର ବଦଳିବାରେ ଲାଗିଛି। ମାଙ୍କଡା ପଥର ଉତ୍ତୋଳନ ହୋଇଥିବା ଶହ ଶହ ଏକର ଜମି କୃତ୍ରିମ ହ୍ରଦ ପାଲଟିବା ପରିବେଶ ଓ ବୁଦ୍ଧିଜୀବୀଙ୍କ ପାଇଁ ଚିନ୍ତାର କାରଣ ପାଲଟିଛି ା ତୁରନ୍ତ ଏହା ଉପରେ ଅଙ୍କୁଶ ଲଗାଇବାକୁ ଏବଂ ଖଣି ଉତ୍ତୋଳନକାରୀଙ୍କ ସହ ସମ୍ପୃକ୍ତ ଥିବା କେତେଜଣ ତହସିଲ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୁପାରୀର ବିଭିନ୍ନ ସଙ୍ଗଠନ ତରଫରୁ ଦାବି କରାଯାଇଛି ା
କୁପାରୀକୁ ୧୯୯୯ରେ ପର୍ଯ୍ୟଟନ କ୍ଷେତ୍ର ଭାବେ ଘୋଷଣା କରାଯାଇଛି। ଏଥିପାଇଁ କୁପାରୀ ସଂଲଗ୍ନ ଖାଲି ପଡିଥିବା ବିଭିନ୍ନ ସରକାରୀ ଜମିରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ପ୍ରଶାସନ ତରଫରୁ ହାତକୁ ନିଆଯାଇଛି। ସେହିଦିନଠାରୁ ମାଙ୍କଡା ଖଣି ନିଲାମ ମଧ୍ୟ ବନ୍ଦ ଅଛି ା ହେଲେ କେତେଜଣ ଖଣି ମାଫିଆ ଏହା ଉପରେ ଲୋଲୁପ ଦୃଷ୍ଟି ପକାଇ କ୍ରମାଗତ ସମୟ ବ୍ୟବଧାନରେ ମାଙ୍କଡା ପଥର କାଟି ବିକ୍ରି କରୁଥିବା ଅଭିଯୋଗ ହୋଇଛି। ବର୍ତ୍ତମାନ କୁପାରୀ ହରେକୃଷ୍ଣ ମହତାବ କଲେଜ ପଛ ପଟ ଜାଗାକୁ ଦୃଷ୍ଟି ନିକ୍ଷେପ କଲେ କୁପାରୀ ଭୂଇଁ ଯେ ଖୁବ୍ଶୀଘ୍ର ଶ୍ମଶାନରେ ପରିଣତ ହେବ ତାହା ଅନୁମାନ କରାଯାଇପାରିବ। ଘଟଣାକ୍ରମେ ରବିବାର ରାତିରେ ମାଙ୍କଡା ପଥର ଉତ୍ତୋଳନ ବେଳେ ସ୍ଥାନୀୟ ଗ୍ରାମବାସୀ ଖଇରା ତହସିଲଦାରଙ୍କୁ ଖବର ଦେଇଥିଲେ ା ତହସିଲଦାର ପ୍ରସ୍ତୁତ ହୋଇ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଉତ୍ତୋଳନକାରୀମାନେ ନିଜ ନିଜର ଯନ୍ତ୍ରପାତି ଧରି ସୁରକ୍ଷିତ ସ୍ଥାନକୁ ପଳାଇ ଯାଇଥିଲେ। ସମସ୍ତଙ୍କ ସମ୍ମୁଖରେ ମାଙ୍କଡା ଖୋଳା ଚାଲିଥିବା ବେଳେ ରାଜସ୍ବ ବିଭାଗ ହାତରେ ଧରା ନ ପଡିବା ଉକ୍ତ ବିଭାଗ ତଥା ଜିଲା ପ୍ରଶାସନର ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ତହସିଲଦାର ପ୍ରଦୀପ କୁମାର ସାହୁଙ୍କୁ ପଚାରିବାରେ ସେ ଯେତେବେଳେ ବି ଅଭିଯୋଗ ପାଇଯାଉଛନ୍ତି ଖଣି ଉତ୍ତୋଳନକାରୀମାନେ କୌଣସି ସୂତ୍ରରୁ ଖବରପାଇ ଖସି ଯାଉଛନ୍ତି ବୋଲି କହିଛନ୍ତି ା
