ଭୁବନେଶ୍ୱର,୪।୧୦(ବ୍ୟୁରୋ): ହାର୍ଡ କୋକ୍, ଚାର୍ଜକ୍ରୋମ୍ ଭଳି ମୂଲ୍ୟବାନ ଖଣିଜ ପଦାର୍ଥକୁ ବନ୍ଦର ଓ ବିଭିନ୍ନ ସ୍ଥାନକୁ ପରିବହନ ବେଳେ ଚୋରି ହେଉଛି। ଏଥିରେ ସମ୍ପୃକ୍ତ ଏକ ବଡ଼ ର଼୍ୟାକେଟକୁ ରବିବାର କ୍ରାଇମବ୍ରାଞ୍ଚର ସ୍ପେଶାଲ ଟାସ୍କଫୋର୍ସ (ଏସ୍ଟିଫ୍) ଧରିଛି। କଟକ ଜିଲା ଚୌଦ୍ୱାର ଥାନା ଅନ୍ତର୍ଗତ ଗୋପାଳପୁର ଅଞ୍ଚଳରେ ଏସ୍ଟିଏଫ୍ ଟିମ୍ ଚଢାଉ କରି ୪ ଜଣଙ୍କୁ ଗିରଫ କରିଛି। ସେମାନେ ହେଲେ ତାମିଲନାଡୁ ତିରୁଭରୁନ୍ ଜିଲା ୱାଦିଙ୍ଗମେନ୍ ଥାନା ଅଞ୍ଚଳର ଜୟବାଲ ଅରୁମୁଗଙ୍ଗ୍, ଥାଞ୍ଜାଭୁର୍ ଜିଲା କୁମ୍ବାକୋନମ୍ ଥାନା ଅଞ୍ଚଳର ରାଜେନ୍ଦ୍ରବାଳ ମୁର୍ଗାନ ଏବଂ ସ୍ଥାନୀୟ ଥାନାଞ୍ଚଳର ନିଶାକର ସ୍ବାଇଁ ଓ ଭଗବାନ ରାଉତ। ତେବେ ର଼୍ୟାକେଟର ମାଷ୍ଟର ମାଇଣ୍ଡ୍ ଗୋପାଳପୁରର ଅଜୟ ପ୍ରଧାନ ଓରଫ ଭୁଆଁ ଫେରାର ହୋଇଯାଇଛନ୍ତି। ଏଥିସହ କଜଳକଣାରୁ ୩୭ ଟନ୍ ହାର୍ଡ କୋକ୍, ୩ ଟନ୍ ଚାର୍ଜ କ୍ରୋମ୍, ୨ଟି ଟ୍ରକ୍, ଗୋଟିଏ ଜେସିବି ଓ ୨ଟି ବାଇକ ଜବତ ହୋଇଛି। ଏନେଇ ଚୌଦ୍ୱାର ଥାନାରେ ମାମଲା (ନଂ.୪୧୩) ରୁଜୁ କରାଯାଇ ଅଧିକ ତଦନ୍ତ ଚାଲିଛି। ସୋମବାର ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ। ତେବେ ଏମାନେ କେତେଦିନ ହେଲା ଏହି କାରବାର ଚଳାଇଥିଲେ, ଏଥିରେ ଆଉ କେଉଁମାନେ ସମ୍ପୃକ୍ତ ସେନେଇ ଏସ୍ଟିଏଫ୍ ତଦନ୍ତ ଜାରି ରଖିଛି।
ଚୌଦ୍ୱାର ୫୫ ନଂ. ଜାତୀୟ ରାଜପଥ ଦେଇ ରାଜ୍ୟ ତଥା ରାଜ୍ୟ ବାହାରକୁ ଖଣିଜ ପଦାର୍ଥ ରପ୍ତାନି କରାଯାଉଛି। ଅଭିଯୁକ୍ତମାନେ ବିଳମ୍ବିତ ରାତିରେ ଟ୍ରକର ଡ୍ରାଇଭରମାନଙ୍କୁ ହାତଗୁଞ୍ଜା ଦେଇ
ସେଥିରୁ ୪ରୁ ୫ କୁଇଣ୍ଟାଲ ବିଭିନ୍ନ
ପ୍ରକାର ଖଣିଜ ପଦାର୍ଥ କାଢିଦିଅନ୍ତି। ତେବେ ଏମାନେ ଉକ୍ତ ଖଣିଜ ପଦାର୍ଥକୁ
ଜାତୀୟ ରାଜପଥ ନିକଟ କଜଳକଣା ନିକଟରେ ଗଚ୍ଛିତ କରି ରଖୁଥିଲେ। ସୁବିଧା ଦେଖି ଏମାନେ ସେସବୁକୁ ଟ୍ରକ ମାଧ୍ୟମରେ ରାଜ୍ୟ ବାହାରକୁ ଚାଲାଣ କରୁଥିଲେ। ତେବେ ଏନେଇ ଏସ୍ଟିଏଫ୍ ବିଶ୍ୱସ୍ତ ସୂତ୍ରରୁ ଖବର ପାଇବା ପରେ ରବିବାର ସକାଳେ ଏସ୍ଟିଏଫ୍ର ଏକ ଟିମ୍ ସେଠାରେ ଚଢାଉ କରିଥିଲା।
ଉଲ୍ଲେଖଯୋଗ୍ୟ, ଚଳିତ ବର୍ଷ ଏସ୍ଟିଏଫ୍ ଓଡ଼ିଶାର ବିଭିନ୍ନ ଅଞ୍ଚଳରେ ଖଣିଜ ପଦାର୍ଥ ଚୋରି ରାକେଟକୁ ଠାବ କରି ସମ୍ପୃକ୍ତ ୩୨ ଜଣଙ୍କୁ ଗିରଫ କରିଛି। ଏପର୍ଯ୍ୟନ୍ତ ଏସ୍ଟିଏଫ୍ ୨୯୯ ଟନ୍ ହାର୍ଡ କୋକ୍, ୨୧୯ ଟନ୍ ଚାର୍ଜକ୍ରୋମ୍, ୧୫୦ ଟନ୍ କୋଇଲା ଜବତ କରିଛି।
