ବରଗଡ଼,୨୩।୨(ପ୍ରେମାନନ୍ଦ ଖମାରୀ):ପରିବେଶ ପ୍ରଦୂଷଣ ବଢ଼ି ଚାଲିଛି। ସ୍ବାସ୍ଥ୍ୟହାନିର ଏହା ପ୍ରମୁଖ କାରଣ ସାଜିଛି। ଏହାକୁ ରାଜ୍ୟ ସରକାର ମଧ୍ୟ ଗୁରୁତ୍ୱର ସହିତ ନେଇଛନ୍ତି। ଏଥିପାଇଁ ସରକାର ନିୟମ କଡ଼ାକଡ଼ି କରିଛନ୍ତି। କ୍ରମବର୍ଦ୍ଧିଷ୍ଣୁ ପରିବେଶ ପ୍ରଦୂଷଣ ରୋକିବା ପାଇଁ ବାଇକ୍ଠାରୁ ଆରମ୍ଭ କରି ବିଭିନ୍ନ ଯାନବାହନ ପାଇଁ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର(ପିୟୁସିସି) ବାଧ୍ୟତାମୂଳକ କରିଥିବାବେଳେ ଏହାକୁ ଅବମାନନା କଲେ ମୋଟାଅଙ୍କର ଜରିମାନା ବ୍ୟବସ୍ଥା କରାଯାଇଛି। ଅନ୍ୟପଟେ ଛତୁ ଫୁଟିବା ଭଳି ବିଭିନ୍ନ ଶିଳ୍ପାନୁଷ୍ଠାନ ଗଢ଼ି ଉଠୁଛି। ଶିଳ୍ପାନୁଷ୍ଠାନଗୁଡ଼ିକ ପ୍ରଦୂଷଣ ନିୟନ୍ତ୍ରଣ ନିୟମକୁ ଫୁ କରି ଚାଲିଛନ୍ତି। ତଥାପି ପ୍ରଦୂଷଣ ନିୟନ୍ତ୍ରଣ ବିଭାଗ ସେମାନଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନେଉ ନ ଥିବା ଅଭିଯୋଗ ହୋଇଛି। କେବଳ କାରଣ ଦର୍ଶାଅ ନୋଟିସ୍ରେ କାର୍ଯ୍ୟାନୁଷ୍ଠାନ ସୀମିତ ରହି ଯାଉଥିବାରୁ ପ୍ରଦୂଷଣ ନିୟନ୍ତ୍ରଣ ବିଭାଗର କାର୍ଯ୍ୟକଳାପ ମଧ୍ୟ ସାଧାରଣରେ ନାନା ସନ୍ଦେହ ସୃଷ୍ଟି କରିଛି।
ଗତ ସପ୍ତାହକ ମଧ୍ୟରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ପରିଷଦ, ସମ୍ବଲପୁର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ବରଗଡ଼ ଜିଲାର ୬ମିଲର୍ସଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ସେହି ରାଇସ୍ ମିଲ୍ଗୁଡ଼ିକ ହେଲେ, ବରଗଡ଼ ବ୍ଲକ ଗୋବିନ୍ଦପୁରସ୍ଥିତ ନବଦାନ୍ୟ ଫୁଡ୍ସ ପ୍ରାଇଭେଟ୍ ଲିମିଟେଡ୍, କ୍ରିଷ୍ଣା ମର୍ସରିଜର୍ସ ୟର୍ଣ୍ଣ କଟନ୍ ମିଲ୍(ସୂତାମିଲ୍), ନାଗେନପାଲିସ୍ଥିତ ଓମ୍ ଫୁଡ୍ସ ପ୍ରଡ଼କ୍ଟସ୍, ଅତାବିରା ବ୍ଲକ ଭୋଇପାଲିର ବାଲାଜୀ ଆଗ୍ରୋ ପ୍ରଡକ୍ଟସ୍, ରେଙ୍ଗାଲିକ୍ୟାମ୍ପସ୍ଥିତ ବିଜୟଲକ୍ଷ୍ମୀ ରାଇସ୍ ମିଲ୍, ଜହ୍ନାପଡ଼ା ପଞ୍ଚାୟତ ବରାହମୁଣ୍ଡାସ୍ଥିତ ଶଙ୍କର ରାଇସ୍ ଇଣ୍ଡଷ୍ଟ୍ରିଜ୍। ନିର୍ଦ୍ଧାରୀତ ସମୟ ସୁଦ୍ଧା ସ୍ପଷ୍ଟୀକରଣ ନ ଦେଲେ ସମ୍ପୃକ୍ତ ରାଇସ୍ ମିଲ୍ଗୁଡ଼ିକ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ନୋଟିସ୍ରେ ଉଲ୍ଲେଖ ରହିଛି। ଏପରିକି ସନ୍ତୋଷଜନକ ସ୍ପଷ୍ଟୀକରଣ ନ ଦେଲେ କେତେକ ନିର୍ଦ୍ଦିଷ୍ଟ ରାଇସ୍ ମିଲ୍କୁ ଦିଆଯାଇଥିବା ସହମତି ପତ୍ର(କନସେଣ୍ଟ ଲେଟର୍) ରବ୍ଦ କରାଯିବା ସହିତ ବନ୍ଦ ନୋଟିସ୍ ମଧ୍ୟ ଜାରି କରାଯିବ ବୋଲି ନୋଟିସ୍ରେ ସ୍ପଷ୍ଟ କରି ଦିଆଯାଇଛି।
ଶନିବାର ଦ୍ୱିତୀୟଥର ପାଇଁ ନବଦାନ୍ୟ ଫୁଡ୍ସ ପ୍ରାଇଭେଟ୍ ଲିମିଟେଡ୍କୁ ଦିଆଯାଇଥିବା ନୋଟିସ୍ରେ ଉଲ୍ଲେଖ ରହିଛି, ପ୍ରଥମେ ଗତ ଜାନୁୟାରୀ ମାସ ୨୨ତାରିଖ ଉକ୍ତ ରାଇସ୍ ମିଲ୍କୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ପରିଷଦ, ସମ୍ବଲପୁର ଆଞ୍ଚଳିକ କାର୍ଯ୍ୟାଳୟର ଏକ ପ୍ରତିନିଧି ଦଳ ପରିଦର୍ଶନ କରିଥିଲେ। ପ୍ରଦୂଷଣ ଆଇନ ଅବମାନନା କରିଥିବା ଜଣାପଡ଼ିବା ପରେ ଗତ ୭ତାରିଖ ସମ୍ପୃକ୍ତ ରାଇସ୍ ମିଲ୍ ମାଲିକଙ୍କୁ ଏକ ନୋଟିସ୍(ନଂ-୬୬୧) ଦିଆଯାଇଥିଲା। ଏହାପରେ ଉକ୍ତ ରାଇସ୍ ମିଲ୍ ପକ୍ଷରୁ ଗତ ୯ତାରିଖ ରାଜ୍ୟ ପ୍ରଦୂଷଣ ନିୟନ୍ତ୍ରଣ ପରିଷଦ, ସମ୍ବଲପୁର ଆଞ୍ଚଳିକ କାର୍ଯ୍ୟାଳୟକୁ ଏକ ସ୍ପଷ୍ଟୀକରଣ ଦିଆଯାଇଥିଲା। ତେବେ ଗତ ୧୧ତାରିଖ ପୁଣିଥରେ ସମ୍ବଲପୁର ଆଞ୍ଚଳିକ କାର୍ଯ୍ୟାଳୟର ଏକ ପ୍ରତିନିଧି ଦଳ ଉକ୍ତ ରାଇସ୍ ମିଲ୍କୁ ପରିଦର୍ଶନରେ ଯାଇ ପ୍ରଦୂଷଣ ନିୟନ୍ତ୍ରଣ ସ୍ଥିତି ନିରୀକ୍ଷଣ କରିଥିଲେ ଏବଂ ଏଠାରେ ପ୍ରଦୂଷଣ ନିୟନ୍ତ୍ରଣ ବ୍ୟବସ୍ଥା ସନ୍ତୋଷଜନକ ନ ଥିବା ଜାଣିବାକୁ ପାଇଥିଲେ। ବର୍ଜ୍ୟବସ୍ତୁ ପରିଚାଳନା ଠିକ୍ ନ ଥିବାବେଳେ ମିଲରୁ ନିଷ୍କାସିତ କଠିନ ବର୍ଜ୍ୟବସ୍ତୁ ପାର୍ଶ୍ୱବର୍ତ୍ତୀ ଅଞ୍ଚଳରେ ପଡ଼ିଥିବାବେଳେ ମିଲ୍ରୁ ନିର୍ଗତ ପାଉଁଶ(ଆଶ୍)କୁ ଖୋଲା ରଖାଯାଇଥିବା ଦେଖିବାକୁ ମିଳିଥିଲା ବୋଲି ନୋଟିସ୍ରେ ଉଲ୍ଲେଖ ରହିଛି। ତେବେ ଏ ନେଇ ଆସନ୍ତା ୨୧ଦିନ ମଧ୍ୟରେ ସ୍ପଷ୍ଟୀକରଣ ଦେବା ତଥା କାରଣ ଦର୍ଶାଇବାକୁ ସମ୍ପୃକ୍ତ ରାଇସ୍ ମିଲ୍ର ମାଲିକଙ୍କୁ ନୋଟିସ୍ କରାଯାଇଛି। ସେହିପରି ଆସନ୍ତା ୨୭ତାରିଖ ସମସ୍ତ ଆବଶ୍ୟକ କାଗଜାତ୍ ସହିତ ରାଜ୍ୟ ପ୍ରଦୂଷଣ ନିୟନ୍ତ୍ରଣ ପରିଷଦର, ସମ୍ବଲପୁର ଆଞ୍ଚଳିକ କାର୍ଯ୍ୟାଳୟର ଅଧିକାରୀଙ୍କଠାରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି।
ଅନୁରୂପଭାବେ ପ୍ରଦୂଷଣ ନିୟନ୍ତ୍ରଣ ପରିଷଦ, ସମ୍ବଲପୁର ଆଞ୍ଚଳିକ କାର୍ଯ୍ୟାଳୟର ପ୍ରତିନିଧି ଦଳ ଗତ ୧୬ତାରିଖ ଓମ୍ ଫୁଡ୍ସ ପ୍ରଡ଼କ୍ଟସ୍, ଗତ ୧୧ତାରିଖ ଶଙ୍କର ରାଇସ୍ ଇଣ୍ଡଷ୍ଟ୍ରିଜ୍, ଗତ ୪ତାରିଖ ବାଲାଜୀ ଆଗ୍ରୋ ଫୁଡ୍ସ, ଗତ ଜାନୁୟାରୀ ୧୯ତାରିଖ ବିଜଲଲକ୍ଷ୍ମୀ ରାଇସ୍ ମିଲ୍ ପ୍ରାଇଭେଟ୍ ଲିମିଟେଡ୍ ଏବଂ ଜାନୁୟାରୀ ୨୨ତାରିଖ କ୍ରିଷ୍ଣା ମର୍ସରିଜର୍ସ ୟର୍ଣ୍ଣ କଟନ୍ ମିଲ୍କୁ ପରିଦର୍ଶନ କରିଥିଲେ ଏବଂ ସେଠାରେ ମଧ୍ୟ ପ୍ରଦୂଷଣ ନିୟନ୍ତ୍ରଣ ପାଇଁ ଉଦ୍ଦିଷ୍ଟ ବ୍ୟବସ୍ଥା ହୋଇ ନ ଥିବା ନିରୀକ୍ଷଣ କରିଥିଲେ। ଏହାପରେ ସମ୍ପୃକ୍ତ ଶିଳ୍ପାନୁଷ୍ଠାନଗୁଡ଼ିକୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ପରିଷଦ, ସମ୍ବଲପୁର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ତେବେ ପ୍ରଦୂଷଣ ନିୟନ୍ତ୍ରଣ ବିଭାଗର ଏଭଳି ନୋଟିସ୍ ନୂଆ ନୁହେଁ, ପ୍ରତିବର୍ଷ ପ୍ରଦୂଷଣ ନିୟନ୍ତ୍ରଣ ଆଇନ ଅବମାନନା ପାଇଁ ଥରକୁ ଥର ନୋଟିସ୍ ଜାରି କରାଯାଉଛି ଏବଂ ସେହି ନୋଟିସ୍ରେ ସମ୍ପୃକ୍ତ ବିଭାଗ ନିଜ ଦାୟିତ୍ୱ ଓ କାର୍ଯ୍ୟାନୁଷ୍ଠାନ ସାରି ଦେଉଥିବାରୁ ପ୍ରଦୂଷଣ ନିୟନ୍ତ୍ରଣ କ୍ଷେତ୍ରରେ ଉକ୍ତ ବିଭାଗର ଦକ୍ଷତା, ପାରଦର୍ଶିତାକୁ ନେଇ ମଧ୍ୟ ଚର୍ଚ୍ଚା ଜୋର୍ ଧରିଛି।
Dharitri – Odisha’s No.1 Odia Daily
