ନୂଆଦିଲ୍ଲୀ,୮ା୨: ଗତ କିଛିବର୍ଷ ହେବ ଦେଶରେ ନିତ୍ୟ ବ୍ୟବହାର୍ଯ୍ୟ ଜିନିଷଠାରୁ ଆରମ୍ଭ କରି ଖାଦ୍ୟ ସାମଗ୍ରୀର ଦରଦାମ୍ କ୍ରମାଗତ ବଢ଼ିବାରେ ଲାଗିଛି। ଘରେ ଘରେ ବହୁଳ ବ୍ୟବହାର କରାଯାଉଥିବା କ୍ଷୀରର ଦାମ୍ ମଧ୍ୟ ବଢ଼ିଛି। ଲୋକାଲ୍ସର୍କଲ୍ ସଙ୍ଗଠନ ପକ୍ଷରୁ କରାଯାଇଥିବା ସର୍ଭେ ଅନୁସାରେ କ୍ଷୀର ଦର ବୃଦ୍ଧି ଯୋଗୁ ପ୍ରତି ୧୦ରୁ ୪ଟି ପରିବାର ପ୍ରଭାବିତ ହେବା ଯୋଗୁ ବିକଳ୍ପ ପନ୍ଥା ଆପଣାଇବାରେ ଲାଗିଛନ୍ତି। କେତେକ ପରିବାର ଆବଶ୍ୟକତାଠାରୁ କମ୍ କ୍ଷୀର ବ୍ୟବହାର କରିବା ଆରମ୍ଭ କରିଛନ୍ତି। ଅନ୍ୟପକ୍ଷେ କିଛି ପରିବାର କମ୍ ମୂଲ୍ୟର କ୍ଷୀର କିଣୁଥିବାବେଳେ ଆଉ କେତେକ ପରିବାର କ୍ଷୀର କିଣିବା ବନ୍ଦ କରି ଦେଇଛନ୍ତି।
ଦେଶର ୩୦୩ ଜିଲାର ୧୦,୦୦୦ ଘରକୁ ନେଇ ଲୋକାଲସର୍କଲ୍ ପକ୍ଷରୁ ଏହି ସର୍ଭେ କରାଯାଇଛି। ଗୁଜରାଟ କୋଅପରେଟିଭ୍ ମିଲ୍କ ମାର୍କେଟିଂ ଫେଡେରେଶନ୍ ଚଳିତ ମାସରେ ଅମୂଲ କମ୍ପାନୀକୁ ଲିଟର ପିଛା ୩ ଟଙ୍କା ବର୍ଦ୍ଧିତ ଦରରେ କ୍ଷୀର ବିକ୍ରି କରିଛି। ଗତବର୍ଷ ଅକ୍ଟୋବରରେ ଅମୂଲ କ୍ଷୀର ଲିଟର ପିଛା ଦର ୨ଟଙ୍କା ବଢ଼ାଇଥିଲା। କ୍ଷୀର ମୂଲ୍ୟ ବଢ଼ିବା ଯୋଗୁ ଗତ ଅଗଷ୍ଟରେ ୪% ପରିବାର କମ୍ ମୂଲ୍ୟରେ ବିକ୍ରି ହେଉଥିବା କ୍ଷୀର କିଣିବା ଆରମ୍ଭ କରିଥିବାବେଳେ ଚଳିତ ମାସରେ ୧୬% ପରିବାର ଏହି ଧାରାକୁ ଆପଣାଇଛନ୍ତି। ୧୯% ପରିବାର ଆବଶ୍ୟକତାଠାରୁ କମ୍ କ୍ଷୀର କିଣୁଛନ୍ତି। ଅନ୍ୟପକ୍ଷେ ୩% କ୍ଷୀର କିଣିବା ବନ୍ଦ କରିଦେଇଛନ୍ତି। ୫୬% ପରିବାର (ପ୍ରତି ୧୦ ମଧ୍ୟରୁ ୬) ଦାମ୍ ବଢ଼ିବା ସତ୍ତ୍ୱେ ନିୟମିତ ଭାବେ ବ୍ୟବହାର କରୁଥିବା ବ୍ରାଣ୍ଡର କ୍ଷୀର ହିଁ କିଣୁଛନ୍ତି। କମ୍ପାନୀଗୁଡ଼ିକ ପ୍ରତିବର୍ଷ ନିଜ ଉତ୍ପାଦିତ ପ୍ରଡକ୍ଟର
ମୂଲ୍ୟ ଥରକରୁ ୫ଥର ବୃଦ୍ଧି କରୁଛନ୍ତି, ଯେଉଁଥିରେ ସେମାନେ ୧ରୁ ୩ ଟଙ୍କା ପର୍ଯ୍ୟନ୍ତ ମୂଲ୍ୟ ବଢ଼ାଉଥିବା ସର୍ଭେରୁ ଜଣାପଡ଼ିଛି। ଅମୂଲ ଲିଟର ପିଛା ଦର ସର୍ବାଧିକ ୩ ଟଙ୍କା ବଢ଼ାଇଥିବାବେଳେ ଗୋବର୍ଦ୍ଧନ ଏବଂ ଅନ୍ୟ ବ୍ରାଣ୍ଡର କ୍ଷୀର କମ୍ ମୂଲ୍ୟରେ ମିଳୁଥିବା କାରଣରୁ ସେମାନଙ୍କ ଚାହିଦା ଏବେ ବଢ଼ିବାରେ ଲାଗିଛି।
