କୋରାପୁଟ/ପଟ୍ଟାଙ୍ଗି, ୪।୪(ଅମିତାଭ ବେହେରା/ ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ସଦର ମହକୁମା ସମେତ ଆଖପାଖ ଅଞ୍ଚଳରେ ଶନିବାର ମୃଦୁ ଭୂକମ୍ପ ଅନୁଭୂତ ହୋଇଛି। ଶନିବାର ରାତି ପ୍ରାୟ ୧୧ଟା ୩୧ ମିନିଟ ସମୟରେ ହଠାତ ପୃଥିବୀ ପୃଷ୍ଠ ଥରିବା ସହ କିଛି ଶବ୍ଦ ଶୁଭା ଯାଇଥିଲା। ଯଦିଓ ଏହି କମ୍ପନ ମାତ୍ର ୨ ରୁ ୩ ସେକେଣ୍ଡ ପାଇଁ ରହିଥିଲା, ତଥାପି ଏହା ସ୍ଥାନୀୟ ବାସିନ୍ଦାଙ୍କ ମଧ୍ୟରେ ପ୍ରବଳ ଭୟ ସୃଷ୍ଟି କରିଛି। ଭୂକମ୍ପ ଯୋଗୁ ଲୋକେ ଘରୁ ବାହାରକୁ ଚାଲି ଆସିଥିବା ଦେଖିବାକୁ ମିଳିଛି।
ଜିଲାର କୋରାପୁଟ ସମେତ ଜୟପୁର, ପଟ୍ଟାଙ୍ଗି, ସୁନାବେଡ଼ା, ନନ୍ଦପୁର ଆଦି ବିଭିନ୍ନ ସ୍ଥାନରେ ଭୂକମ୍ପ ଅନୁଭୂତ ହୋଇଛି। ବିଳମ୍ବିତ ରାତିରେ ଶୋଇଥିବା ଅବସ୍ଥାରେ ହଠାତ ଘର ହଲିବାରୁ ଲୋକେ ଭୟଭୀତ ହୋଇ ପଦାକୁ ବାହାରି ଆସିଥିଲେ। ଅନେକ ନିଜର ବନ୍ଧୁବାନ୍ଧବ ଓ ସାଙ୍ଗସାଥିଙ୍କୁ ଫୋନ କରି ଏହି ଅନୁଭୂତି ବାବଦରେ ପଚାରି ବୁଝୁଥିବା ଦେଖାଯାଇଥିଲା। ତେବେ ପଟ୍ଟାଙ୍ଗି ଅଞ୍ଚଳରେ ଏଭଳି ଘଟଣା ପ୍ରଥମ ଥର ପାଇଁ ଘଟିଥିବାରୁ ସାଧାରଣରେ ଭୟ ସୃଷ୍ଟି ହୋଇଛି।
ଏନେଇ ପଚାରିବାରୁ ପଟ୍ଟାଙ୍ଗିର ଜଣେ ବାସିନ୍ଦା କହିଛନ୍ତି ଯେ, “ହଠାତ ଘରଟା ଥରିଉଠିଲା ଏବଂ ବାହାରେ ଏକ ବଡ଼ ଧରଣର ଶବ୍ଦ ହେଲା। ଆମେ କିଛି ବୁଝିବା ପୂର୍ବରୁ ସବୁ ଶାନ୍ତ ହୋଇଯାଇଥିଲା, କିନ୍ତୁ ଭୟରେ ଆମେ ବାହାରକୁ ପଳାଇ ଆସିଲୁ”। ତେବେ ଅଞ୍ଚଳରେ କୌଣସି ପ୍ରକାରର ଧନଜୀବନ ହାନି ହୋଇଥିବାର ଖବର ମିଳିନାହିଁ, କିନ୍ତୁ ଏହି ପ୍ରାକୃତିକ ବିପର୍ଯ୍ୟୟ ଏବେ ସ୍ଥାନୀୟ ଲୋକଙ୍କ ପାଇଁ ଚର୍ଚ୍ଚାର ବିଷୟ ପାଲଟିଛି।
