ନୂଆଦିଲ୍ଲୀ,୧।୯: ମୋଟୋ ଗ୍ରାଣ୍ଡପ୍ରିକ୍ସ(MOTOGP) ଚାଳକ ମିଗୁଏଲ୍ ଓଲିଭେରା ନିଜ ସାବତ ଭଉଣୀ ଆନ୍ଦ୍ରିୟା ପେମେଣ୍ଟାଙ୍କ ସହ ନିର୍ବନ୍ଧ କରିଛନ୍ତି। ଏହି ଖୁସି ଖବରକୁ ତାଙ୍କ ବାପା ସମସ୍ତଙ୍କୁ ଜଣାଇଛନ୍ତି। ଦୀର୍ଘ ୧୩ ବର୍ଷ ବୟସରୁ ଉଭୟ ଉଭୟଙ୍କୁ ଭଲ ପାଇ ଆସୁଥିଲେ। ୧୧ ବର୍ଷ ଧରି ନିଜର ସମ୍ପର୍କକୁ ନେଇ ଚୁପ୍ ରହିବା ପରେ ୨୦୧୯ରେ ଏନେଇ ପ୍ରଥମ ଥର ମୁହଁ ଖୋଲିଥିଲେ। ଏବେ ସେମାନେ ନିର୍ବନ୍ଧ କରି ପ୍ରଶଂସକଙ୍କୁ ଚମକାଇ ଦେଇଛନ୍ତି।
ପର୍ତ୍ତୁଗାଲର ଅଲମାଣ୍ଡାରେ ୧୯୯୫ ଜାନୁୟାରୀ ୪ ତାରିଖରେ ଓଲିଭେରାଙ୍କ ଜନ୍ମ ହୋଇଥିଲା। ସେ ପେସାରେ ଜଣେ ମୋଟରସାଇକେଲ ରେସର। ଇଟାଲିଆନ ମୋଟରସାଇକେଲ ଗ୍ରାଣ୍ଡ ପ୍ରିକ୍ସ ଜିତିଥିବା ପ୍ରଥମ ପର୍ତ୍ତୁଗାଲ ଚାଳକ ହେଉଛନ୍ତି ସେ। ପେମେଣ୍ଟା(୨୪) ଓଲିଭେରାଙ୍କ ବାପା ପାଉଲୋଙ୍କ ଦ୍ୱିତୀୟ ସ୍ତ୍ରୀ କ୍ରିଷ୍ଟିନାଙ୍କ ଝିଅ। ପିଲାଦିନରୁ ଉଭୟ ଭଲ ବନ୍ଧୁ ଥିଲେ। ବଡ଼ ହେବା ପରେ ସେମାନେ ପ୍ରେମରେ ଥିବା ଜାଣିବାକୁ ପାଇଥିଲେ। ହେଲେ ଦୀର୍ଘ ବର୍ଷ ଧରି ସମାଜଠାରୁ ଏହି କଥାକୁ ସେମାନେ ଲୁଚାଇ ଆସୁଥିଲେ। ହେଲେ ୨୦୧୯ରେ କଥା ଲୋକଲୋଚନକୁ ଆସିଥିଲା। ଏବେ ଉଭୟ ଖୁବ୍ଶୀଘ୍ର ବିବାହ କରିପାରନ୍ତି।
