ନୂଆଦିଲ୍ଲୀ,୯।୪: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ର ୧୪ ସିଜିନର ପ୍ରଥମ ମ୍ୟାଚ୍ ଶୁକ୍ରବାର ଖେଳାଯିବ। ଏଥିରେ ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରଙ୍କୁ ଭେଟିବ। ପାଞ୍ଚଥର ଟାଇଟଲ ବିଜେତା ଏମ୍ଆଇ ସିଜିନର ପ୍ରଥମ ମ୍ୟାଚ୍ ନିଜ ନାମରେ କରିବାକୁ ଚେଷ୍ଟା କରିବ। ଦଳର ଖେଳାଳିମାନେ ଭଲ ଫର୍ମରେ ଥିବାରୁ ସେମାନେ ଉଲ୍ଲେଖନୀୟ ପ୍ରଦର୍ଶନ କରିବେ ବୋଲି ଆଶା କରାଯାଉଛି। ଅପରପକ୍ଷେ କୋହଲିଙ୍କ ଟିମ୍ ମଜଭୂତ ସ୍ଥିତିରେ ଅଛି। ଏଣୁ ଆଜିର ମ୍ୟାଚ୍ ବେଶ ରୋମାଞ୍ଚକର ରହିବ।
ଏଯାବତର ରେକର୍ଡ ଦେଖିଲେ ଉଭୟ ଟିମ୍ ଆଇପିଏଲ୍ ଇତିହାସରେ ୨୯ଥର ପରସ୍ପରକୁ ଭେଟିଛନ୍ତି। ଏଥିରେ ମୁମ୍ବାଇ ଇଣ୍ଡିଆନ୍ସ ସର୍ବାଧିକ ମ୍ୟାଚ୍ ଜିତିଛି। ୨୯ ମୁକାବିଲାରୁ ଦଳ ୧୯ ମ୍ୟାଚ୍ ଜିତିଥିବା ବେଳେ ବିରାଟଙ୍କ ଟିମ୍ କେବଳ ୧୦ ମ୍ୟାଚ୍ରେ ବିଜେତା ହୋଇଛି।
ଗତ ସିଜିନରେ ଉଭୟ ଟିମ୍ ମଧ୍ୟରେ ଦୁଇଟି ମୁକାବିଲା ଖେଳାଯାଇଥିଲା। ଗୋଟିଏ ମୁମ୍ବାଇ ଇଣ୍ଡିଆନ୍ସ ଜିତିଥିବା ବେଳେ ଆରଟି କୋହଲିଙ୍କ ଦଳ ଜିତିଥିଲା।
ବିଶେଷକରି ଚେନ୍ନାଇ ଷ୍ଟାଡିୟମରେ ତୃତୀୟ ଥର ପାଇଁ ଉଭୟ ଟିମ୍ ମୁହାଁମୁହିଁ ହେବାକୁ ଯାଉଛନ୍ତି। ପୂର୍ବରୁ ଉଭୟ ଟିମ୍ ଦୁଇଥର ଖେଳିଥିବା ବେଳେ ୧-୧ ସ୍ଥିତି ରହିଛି।
ଟିମ୍ଦ୍ୱୟଙ୍କ ମଧ୍ୟରେ ହୋଇଥିବା ମ୍ୟାଚ୍ରେ କୋହଲି ସର୍ବାଧିକ ୬୩୭ରନ୍ କରିଛନ୍ତି। ସେହିଭଳି ଉଇକେଟ ନେବା ମାମଲାରେ ୟୁଜବେନ୍ଦ୍ର ଚହଲ ସବୁଠାରୁ ଆଗରେ ରହିଛନ୍ତି। ମୁମ୍ବାଇ ବିପକ୍ଷରେ ସେ ୧୯ ଉଇକେଟ ନେଇଛନ୍ତି।
