ନ୍ୟୁୟର୍କ: କୋଭିଡ୍ ମହାମାରୀ କାରଣରୁ ବ୍ୟକ୍ତି ବିଶେଷଙ୍କ ଜବନଶୈଳୀରେ ଅନେକ ପରିବର୍ତ୍ତନ ଦେଖାଯାଉଛି। ମହିଳା, ପୁରୁଷ, ଶିଶୁ, ଯୁବକ, କିଶୋର ଏବଂ ବୃଦ୍ଧ ପ୍ରତ୍ୟେକ ବୟସ୍କ ବର୍ଗଙ୍କ କ୍ଷେତ୍ରରେ ପୂର୍ବ ଅପେକ୍ଷା ମାନସିକ ଚାପ ବୃଦ୍ଧି ଘଟିଥିବା ପିଟର୍ସବର୍ଗ ୟୁନିଭର୍ସିଟି ପକ୍ଷରୁ କରାଯାଇଥିବା ଗବେଷଣାରୁ ଜଣାପଡ଼ିଛି। ବଢ଼ିଥିବା ଷ୍ଟ୍ରେସ୍ ଯୋଗୁ ମହିଳା ଓ କିଶୋରୀଙ୍କ ମାସିକ ଋତୁସ୍ରାବରେ ବିଭିନ୍ନ ପ୍ରକାର ବ୍ୟତିକ୍ରମ ଦେଖାଯାଇଛି। ମେନ୍ଷ୍ଟ୍ରୁଆଲ ସାଇକେଲ୍ ଲେନ୍ଥରେ ମଧ୍ୟ ବହୁ ପରିବର୍ତ୍ତନ ଘଟିଥିବା ବିଶେଷଜ୍ଞଙ୍କ ପକ୍ଷରୁ କୁହାଯାଇଛି। ଏହି କାରଣରୁ ମହିଳାଙ୍କ ପ୍ରଜନନ କ୍ଷେତ୍ରରେ ମଧ୍ୟ ବହୁ ପରିବର୍ତ୍ତନ ଦେଖାଯାଇଛି।
ଅଧ୍ୟୟନରେ ସାମିଲ ହୋଇଥିବା ମହିଳା ଓ ଯୁବତୀମାନଙ୍କ ପକ୍ଷରୁ ଦିଆଯାଇଥିବା ପ୍ରତିକ୍ରିୟା ଅନୁସାରେ, କୋଭିଡ୍ ପରେ ମେନ୍ଷ୍ଟ୍ରୁଆଲ ସାଇକେଲ୍ରେ ବହୁ ପରିବର୍ତ୍ତନ ହୋଇଛି। ଅଧ୍ୟୟନର ମୁଖ୍ୟ ପ୍ରଫେସର୍ ମାର୍ଟିନା ଆଣ୍ଟୋ ଓକ୍ରାହ କହିଛନ୍ତି, ମହିଳାଙ୍କଠାରେ ଦେଖାଯାଉଥିବା ଏହି ମାସିକ ନିୟମିତ କ୍ରିୟାରେ ପରିବର୍ତ୍ତନ ଦେଖାଯିବା ପଛରେ ମୁଖ୍ୟ କାରଣ କରୋନା ମହାମାରୀ ଯୋଗୁ ବଢ଼ିଥିବା ମାନସିକ ଚାପ।
ଏ ନେଇ ଦୁଇ ପ୍ରକାର ସର୍ଭେ କରିଛନ୍ତି। ବିଶେଷ କରି ୨୦୨୦ ମାର୍ଚ୍ଚରୁ ୨୦୨୧ ମେ ମଧ୍ୟରେ ମାସିକ ଋତୁସ୍ରାବରେ ବହୁ ପରିବର୍ତ୍ତନ ପରିଲଖିତ ହୋଇଥିବା ଗବେଷକମାନେ କହିଛନ୍ତି। ୩୫୪ ଜଣ ମହିଳା ଯେଉଁମାନେ ଉଭୟ ସର୍ଭେରେ ଭାଗ ନେଇଥିଲେ ସେହିମାନଙ୍କଠାରେ ଷ୍ଟ୍ରେସ୍ର ମାତ୍ରା ସର୍ବାଧିକ ୧୦.୫ ପ୍ରତିଶତ ରହିଥିବା ଜଣାପଡ଼ିଛି। ସେହିମାନଙ୍କ ଋତୁସ୍ରାବରେ ପରିବର୍ତ୍ତନ ଦେଖାଯାଇଛି। କେତେଜଣଙ୍କ କ୍ଷେତ୍ରରେ ଅଧିକମାତ୍ରାରେ ରକ୍ତପ୍ରବାହ ହେଉଥିବାବେଳେ କେତେଜଣଙ୍କର ଅନିର୍ର୍ଦ୍ଦିିଷ୍ଟ ସମୟରେ ସାଇକେଲ୍ ଆରମ୍ଭ ହେଉଥିବା ଅଧ୍ୟୟନରୁ ଜଣାପଡ଼ିଛି। ଚାକିରି କରିଥିବା ଓ ଗୃହିଣୀମାନଙ୍କ କ୍ଷେତ୍ରରେ ମଧ୍ୟ ସମାନ ସ୍ଥିତି ଦେଖାଯାଇଛି। ଏପରିସ୍ଥଳରେ ପରିଷ୍କାର ପରିଚ୍ଛନ୍ନତାକୁ ଦୃଷ୍ଟିରେ ରଖୁଥିବା ମହିଳା ସାନିଟାରୀ ନାପ୍କିନ୍ଠାରୁ ଆରମ୍ଭ କରି ହାଇଜିନ ପାଇଁ ବ୍ୟବହୃତ ସମସ୍ତ ପ୍ରଡକ୍ଟ ଅଧିକମାତ୍ରାରେ କିଣିବାକୁ ଲାଗିବେ, ଯାହାର ପ୍ରଭାବ ସେମାନଙ୍କ ପର୍ସ ଉପରେ ପଡ଼ିବାର ଆଶଙ୍କା ରହିଛି।
