ରାଜନଗର, ୨୩।୩ (ଡି.ଏନ.ଏ.): ମୃତ୍ୟୁ କେତେବେଳେ ଆସେ କହିବା କଷ୍ଟକର। ସେ ବୁଢା କି ଯୁବକ ଦେଖେ ନାହିଁ। ପରିବାରର ରୋଜଗାରକ୍ଷମ ବ୍ୟକ୍ତିଙ୍କୁ ବି ସେ ଛାଡେ ନାହିଁ। ସ୍ତ୍ରୀଠାରୁ ସ୍ବାମୀ, ମାଆଠାରୁ ପୁଅକୁ ସେ ଛଢାଇ ନିଏ। ଏମିତି ବର୍ଷକ ଭିତରେ ଡକା ଡକି ହୋଇ ବାପାଙ୍କ ପରେ ପୁଅ ଆରପାରିକୁ ଚାଲି ଯାଇଛନ୍ତି। ଫଳରେ ପରିବାର ପୁରୁଷ ଶୂନ୍ୟ ହୋଇପଡିଛି। ଏଭଳି ହୃଦୟ ବିଦାରକ ଦୁଃଖଦ ଘଟଣା ରାଜନଗର ବ୍ଲକ ଈଶ୍ୱରପୁର ପଞ୍ଚାୟତ ରାଜବିଜୟନଗର ଗଁାରୁ ଆସିଛି। ରାଜବିଜୟନଗର ଗାଁର ମିଥୁନ ପାତ୍ର (୨୫) ଭଦ୍ରକ ଅଞ୍ଚଳରେ ଟ୍ରାକ୍ଟର ଡ୍ରାଇଭର ଭାବେ କାମ କରୁଥିଲେ। ୭ଦିନ ତଳେ ଚିଙ୍ଗୁଡି ଘେରି ଖୋଳା ହେବା ବେଳେ ଟ୍ରାକ୍ଟର ଓଲଟି ପଡିବାରୁ ମିଥୁନଙ୍କ ମୃତ୍ୟୁ ଘଟିଥିଲା। ମିଥୁନଙ୍କ ବିୟୋଗ ପରେ ତାଙ୍କ ପରିବାରରେ କଳାର ବାଦଲ ଘୋଟି ଯାଇଛି। ବର୍ଷେ ତଳେ ରୋଗରେ ପଡି ବାପା ଚାଲି ଯାଇଥିଲେ। ପରିବାର ପୁରୁଷ ଶୂନ୍ୟ ହୋଇଯାଇଛି। ୯ ମାସ ତଳେ ବିବାହ କରିଥିବା ମିଥୁନଙ୍କ ସ୍ତ୍ରୀ ଏବେ ଗର୍ଭବତୀ ଅଛନ୍ତି। ଏବେ ପରିବାରରେ ମିଥୁନଙ୍କ ଗର୍ଭବତୀ ପତ୍ନୀ, ମା’ ଓ ଜେଜେମା’। ପରିବାରର ଏକମାତ୍ର ରୋଜଗାରକ୍ଷମ ପୁଅର ମୃତ୍ୟୁ ପରେ ୭ଦିନ ହେଲା ଘରେ ଚୁଲି ଜଳିନି। କାହାରି ମୁହଁରେ ଭାଷା ନାହିଁ। କାନ୍ଦି କାନ୍ଦି କାହାର ଚେତା ପଳାଉଛି ତ, ଆଉ କିଏ ମୂର୍ଚ୍ଛା ଯାଉଛି। ପରିବାର ଅତ୍ୟନ୍ତ ଗରିବ ହୋଇଥିବାରୁ ଓ ଖାଇବା ଦୂରର କଥା, ମିଥୁନଙ୍କ ଶୁଦ୍ଧିକ୍ରିୟା ପାଇଁ ପରିବାର ପାଖରେ ଅର୍ଥ ନାହିଁ। ପରିବାର ଏବେ ପୁରୁଷ ଶୂନ୍ୟ ହୋଇପଡିଛି। ପ୍ରଶାସନ ଏହି ଅସହାୟ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଅଞ୍ଚଳବାସୀ ଦାବି କରିଛନ୍ତି। ଅପରପକ୍ଷେ ଏହି ପରିବାରକୁ ରାଜନଗରର ଦୁଇ ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ଆର୍ଥିକ ସହାୟତା ପ୍ରଦାନ କରାଯାଇଛି।
