କଟକ ଅଫିସ, ୧୮।୯: ମୂର୍ତ୍ତି ଉଚ୍ଚତା ବୃଦ୍ଧି ଓ ପରଦା ଆଢୁଆଳରେ ପୂଜା କରିବା ପ୍ରସଙ୍ଗକୁ ନେଇ ଶୁକ୍ରବାର ସ୍ଥାନୀୟ ଦେଉଳସାହିସ୍ଥିତ ମୋନାଲିସା ପ୍ୟାଲେସ୍ରେ କଟକ ମହାନଗର ଓ ପୂର୍ବାଞ୍ଚଳ ଶାନ୍ତି ପକ୍ଷରୁ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବିଭିନ୍ନ ପୂଜାକମିଟି ସଦସ୍ୟ ଯୋଗଦେଇ ଭିନ୍ନଭିନ୍ନ ମତ ରଖିଥିଲେ। ଏମ୍ପି ଭର୍ତ୍ତୃହରି ମହତାବ ଯୋଗଦେଇ କହିଛନ୍ତି, ଉଭୟ ଶାନ୍ତ କମିଟି ଯାହା ନିଷ୍ପତ୍ତି ନେବ ତାହାକୁ ସମସ୍ତ କମିଟି ସଦସ୍ୟ ଗ୍ରହଣ କରିବେ। ହେଲେ ସରକାରଙ୍କ ୪ଫୁଟ ମୂର୍ତ୍ତି ଉଚ୍ଚତା ନିଷ୍ପତ୍ତି ସହ କେବେ ସହମତ ହୋଇପାରିବି ନାହିଁ ା ଆଶା ଓ ଆଶଙ୍କା ମଧ୍ୟରେ କଟକବାସୀ ଆଉ ରହିବାକୁ ଚାହୁଁ ନାହାନ୍ତି ବୋଲି ସେ କହିଛନ୍ତି ା ବୈଠକ ଶେଷ ନ ହେବା ପୂର୍ବରୁ ଉଭୟ ଶାନ୍ତି କମିଟି ସଭ୍ୟମାନେ ଉକ୍ତ ସ୍ଥାନ ଛାଡି ପଳାଇ ଯାଇଥିଲେ ା ଫଳରେ କୌଣସି ନିଷ୍କର୍ଷ ବାହାରିପାରିନାହିଁ। ଏନେଇ ମହାନଗର ଶାନ୍ତି କମିଟି ସମ୍ପାଦକ ଭିକାରୀ ଦାସ କହିଛନ୍ତି, ବୈଠକରେ ନିଷ୍କର୍ଷ ବାହାରିଲା ନାହିଁ। ହାଇକୋର୍ଟ ବାଲୁବଜାର ପୂଜା କମିଟିକୁ ଦେଇଥିବା ରାୟ ନେଇ ଆମେ ତର୍ଜମା କରୁଛୁ ା ଏନେଇ ଶନିବାର ଆମେ ନିଷ୍ପତ୍ତି ଶୁଣାଇବୁ ବୋଲି ସେ କହିଛନ୍ତି। ଉକ୍ତ ବୈଠକରେ କଂଗ୍ରେସ ନେତା ସୁରେଶ ମହାପାତ୍ର, ପୂର୍ବତନ ମନ୍ତ୍ରୀ ସମୀର ଦେ, ନଗର କଂଗ୍ରସ ସଭାପତି ଗିରିବାଳା ବେହେରା, ମହାନଗର ଶାନ୍ତି କମିଟି ସଭାପତି ପ୍ରଭାତ ତ୍ରିପାଠୀ, ପୂର୍ବାଞ୍ଚଳ ଶାନ୍ତି କମିଟି ସଭାପତି ପ୍ରଫୁଲ୍ଲ କୁମାର ସାହୁ ପ୍ରମୁଖ ଉପସ୍ଥିତ ଥିଲେ।
ସୂଚନାଯୋଗ୍ୟ, ମଣ୍ଡପରେ ୪ଫୁଟର ମୂର୍ତ୍ତି ନିର୍ମାଣ ଓ ପରଦା ଆଢୁଆଳରେ ପୂଜା କରିବା ପାଇଁ ନିଆଯାଇଥିବା ସରକାରୀ ନିଷ୍ପତ୍ତିର ପୁନର୍ବିଚାର କରିବାକୁ କଟକ ମହାନଗର ଓ ପୂର୍ବାଞ୍ଚଳ ଶାନ୍ତି କମିଟି ପକ୍ଷରୁ ମୁଖ୍ୟମନ୍ତ୍ରୀଙ୍କୁ ଚିଠି ମାଧ୍ୟମରେ ଅବଗତ କରାଯାଇଥିଲା। ୧୬ ତାରିଖ ସୁଦ୍ଧା ମୁଖ୍ୟମନ୍ତ୍ରୀ ଏହି ଚିଠିର ଉତ୍ତର ଦେବେ ବୋଲି ଆଶା କରାଯାଇଥିଲା। ହେଲେ ଏହି ସମୟ ମଧ୍ୟରେ ଚିଠିର ଉତ୍ତର ନ ଆସିବାରୁ ଉକ୍ତ ବୈଠକ ଡକାଯାଇଥିଲା।
